港姐麥明詩（Louisa）、韓毓霞（Wendy）連日來與攝製隊四出搵機會採訪各國運動員及周邊新聞。已擔任奧運七屆主持的韓毓霞當然識搵窿路，跟實巴西女導遊齊齊「打獵」，向爆肌型男選手集郵，相反Louisa就不時慘「食檸檬」，遇着型男選手只敢遠距離Selfie。想不到呢位十優港姐，原來有咁怕醜一面。
奧運明日舉行開幕禮，已為咗今次採訪已經喺巴西逗留咗兩個幾星期嘅麥明詩同韓毓霞可謂忙到不得了，四處搜刮奧運第一手消息為觀眾報道。由於每年各國都有唔少靚仔、靚女運動員選手，難得做到主持「近距離接觸」，正常人都唔會放過集郵機會。可惜Louisa就相當輸蝕，唔單止向運動員要求做訪問時多次慘「食檸檬」，最搞笑的是，「宅氣」攻心的她，面對匈牙利一班高大健碩又靚仔的男選手時，竟不敢埋身合照，只敢悄悄遠距離Selfie，相當搞笑！
食檸檬當學嘢
Louisa接受《東網》記者訪問時，就話「食檸檬」係一件好事，她說：「同運動員訪問，有時連佢哋條圍繩都唔可以越過，免得騷擾到佢哋，但有啲friendly嘅，你揮手佢哋會行過嚟。其實有啲未必想接受訪問，所以我都有食檸檬。（第一次食檸檬？）我份人向來比較含蓄，好少會勉強人，不過依家工作需要，唔理三七二十一都要問，不過食吓檸檬都好，都係一個學習，面皮厚啲嘛！」
唔敢交換電話
談到Wendy有向晒肌運動員集郵，問Louisa是否喜歡肌肉男？她坦言：「有健康體態係好，但唔係我擇偶條件。」Louisa亦透露有跟外國男記者交換襟章，她說：「呢個係一個傳統，好多電視台、國家隊都會出，我有好多TVB襟章，所以都有同佢哋換。（咁換完襟章有冇換電話？）梗係唔會」
讚麥明詩優秀
而Wendy接受《東網》訪問時，亦大讚瘋狂「集郵」嘅好玩之處，Wendy說：「巴西人好熱情，加上位女導遊個性比較開放，見到靚仔就鼓勵我哋出擊，喺沙灘排球場就同兩位智利選手影相，兩個都係爆肌型男，好多女性朋友都話羨慕！」談到拍檔麥明詩，Wendy則讚不絕口：「佢係一位好優秀嘅女仔，性格活潑開朗、用心又聰明，同佢合作好舒服。」
|
鍾意就快D Share啦！
|
|
|
