大台8點半新劇，近排俾網民瘋狂洗板，網民討論嘅唔係劇情，而係喺劇中做人妻、媽咪嘅趙希洛。
07年港姐晉身五強，可惜入唔到三甲嘅趙希洛，喺大台捱足8年。喺呢8年裡面，趙希洛唔係做癲婆、殺人犯、就係做變性人，通通都係重口味角色。雖然係閒角，不過喺《實習天使》做殺人犯嘅趙希洛，就係嗰吓癲喪凶狠嘅眼神、喪心病狂嘅演繹，終於得到網民加持，獲得「御用癲婆」嘅稱號。新劇中，趙希洛終於有機會成為女二(女一係同趙希洛同屆港姐黃智雯)，飾演陳智燊老婆兼育有一對仔女嘅趙希洛，喺劇中母性出晒嚟，賢妻良母形竟然成網民新一類型嘅追捧對象，估唔到演人妻都有market！網民對佢有無限幻想，最多留言嘅一句係「如果趙希洛做我老婆唔知點算？」不過俾大台捧到上女二嘅趙希洛，明知自己唔係親生女，就預咗有朝一日撻番落地做人肉布景板。趙希洛接受《蘋果》訪問時，就話：「我演戲8年，今次係最重戲份，都多謝網民讚賞，其實就算之後少番戲份，都冇得揀，係公司安排。不過做咗咁多年戲，以前唔覺得需要做女主角，但o依家都希望將來有機會。其實自己做完每一套戲，都會檢討同作出分析，最重要係得到大家認同。」趙希洛老竇做石油生意，媽咪係前藝人梁小玲，起跑線理應快人一步，不過趙希洛就唔係咁認為：「其實自己4、5歲已經好有表演慾，喺聖誕節做drama嗰陣，我係做一粒星星，我有問媽咪點解自己唔係做瑪利亞，媽咪當時就答我『因為你唔係白人囉！』細個輸咗俾種族，到大個就輸咗喺事業嘅起跑線，贏唔到港姐，所以咪要慢慢捱囉！」趙希洛家底厚，有人話佢係圈中繼黃翠如外，另一女筍盤，趙希洛就講笑話：「劇中我個角色就係筍盤，我老公陳智燊(Jason)都係，不過俾宋熙年搶咗之嘛，哈哈，其實我有叫Jason介紹細佬俾我識，佢三兄弟好ok㗎，又喺英國讀書，不過Jason唔肯之嘛！其實都想搵真心愛自己嘅人，而唔係為錢！」
| 「御用癲婆」趙希洛話輸咗喺事業起跑線，唔介意慢慢捱出頭！ |  趙希洛喺07年選港姐，同屆冠軍係張嘉兒，但趙希洛五強止步。 |  趙希洛自言自己塊面圓碌碌，樣貌身形都有人妻feel。 |
 趙希洛讀幼稚園，同同學仔做drama，不過佢就話自己輸咗俾種族，只可以扮一粒星，冇得做瑪利亞。 |  |  |
 喺劇集《實習天使》中，做殺人犯嘅趙希洛，俾網民激讚。（劇照） |
|
鍾意就快D Share啦！
|
|
|
