2017年4月13日 星期四

203磅帶來產後抑鬱 梁慧恩搞自家童裝品牌回復自強 [壹週刊 - 1414] __,梁慧恩,M1,

名人動態203磅帶來產後抑鬱 梁慧恩搞自家童裝品牌回復自強前RoadShow主持梁慧恩(Viann),拍過電影做過DJ又出過書,12年嫁給「百億工廈大 ...


名人動態

203磅帶來產後抑鬱 梁慧恩搞自家童裝品牌回復自強

前 RoadShow主持梁慧恩( Viann),拍過電影做過 DJ又出過書, 12年嫁給「百億工廈大王」楊耀松外孫林忠澤( Arthur)後淡出娛樂圈做少奶奶, 14年誕下囡囡 Bethel,當上全職媽媽的 Viann一度患上產後抑鬱,幸接受醫治得以康復。

一個好學不倦的媽媽,湊女豈可完全滿足。故近日決定重建事業,聯同兩位叻媽媽 Cherrie及 Michelle聯成黃金組合創業,搞自家品牌童裝。

回復女人自強, Viann發現是最大抗抑鬱方法。

懷孕重達 203磅

三十七歲的梁慧恩與婦產科名醫老公林忠澤結婚五年,女兒 Bethel已兩歲多,做全職媽媽的她,患過產後抑鬱,服藥一年終康復。她稱抑鬱主因,是懷孕時接受不了由曲條變成二百幾磅的大肥婆。

「當時諗啲嘢好灰但唔算嚴重,主要係唔習慣個身形突然間咁大,衫都冇件著得落,胃口又唔好。

「我生嘅時候係二百零三磅,當時唔識點去郁動,坐喺梳化起身要扶住啲嘢,塞唔入去浴室嘅玻璃門,入咗去又唔係好轉到身。生完後第一時間跳落個磅,睇吓係咪會走晒啲水冇咗二十磅,發現個 B有七磅我就輕七磅,好沮喪。後來都減番去一百二十幾磅,但食咗賀爾蒙啲藥後又上番一百四十磅,要努力再減吓。」她說。

14年,佗住 Bethel的 Viann,當時體重高達 203磅。

Viann懷孕時挺着巨肚,行動極為不便,連沖涼也有難度。

當上全職媽媽的 Viann,因接受唔到生活上及身形上的轉變,而患上產後抑鬱。

誕下 Bethel後,肥了很多的 Viann曾經成功減磅,但卻因服抗抑鬱藥而再增磅。

工作成治療

一直是衝鋒陷陣的事業型女性,故 Viann患病後,連醫生也建議,工作是她治療之一。她說:「賀爾蒙啲藥食到呆呆滯滯,啲精神科藥又食到唔舒服,用咗一年左右醫治,而家好好多。因為要睇你係心理上還是身體上有啲 chemicals嘅變動,要長期睇先睇到,問過醫生,有啲人產後抑鬱要食一世藥,有啲人唔使,我個 case唔使,叫我搵番啲嘢做就 OK。」

Viann老公林忠澤除了是「百億工廈大王」楊耀松外孫,又是林忠豪的堂細佬。

Viann表示女兒性格似她,一樣獨立自主。

老公 Arthur放假及放工會在屋企幫手湊女,是位好爸爸。

角色改變最大學問

Viann自小讀書叻,性格獨立,沒料孩子出世後的生活轉變,成為她最大的難題。「全職媽媽係人生上嘅角色轉換,男人有咗小朋友,最多同佢玩吓覺得好得意,第二日會照常返工。但女人會有機會放棄份工,由自己有啲積蓄,使吓使吓又冇啲,慢慢變咗要個男人養。對於獨立性比較強嘅女仔而言,會有唔開心、冇安全感、甚至抑鬱,所以需要丈夫俾好多 support,好了解你。 BB仔又嘈又喊,有種精神上嘅轟炸。」

Viann平日愛為 Bethel打扮,只要款式好睇,就算是街邊貨色也沒所謂。

童裝有教育意義

為了重拾自己, Viann決定與兩位媽媽好友 Cherrie及 Michelle合作創業,搞自家童裝品牌, Viann說:「我哋幾個係媽咪 group認識嘅,之前都係好事業型嘅女士,一個係 banker負責睇數、一個係 fashion designer負責畫圖,再加上我以前做開媒體可以負責度橋,所以就有呢個組合。」

拍檔 Michelle說:「我哋預計八月中推出,係個創意 project,一開始會係 online shop,唔排除之後會有 pop up store。」而另一拍檔 Cherrie就話:「個 idea係 Viann提出,暫時香港未有 BB衫係咁做,加上好有教育意義。另外,我哋會係 Made in Hong Kong,唔係話大陸廠唔好,但香港人幫番香港,仲有啲好好嘅細廠。」

負責睇數的 Michelle是 banker, Cherrie是時裝設計師,加上曾做媒體的 Viann,可說是個黃金組合。

訪問當天, Viann相約 Cherrie及 Michelle開會。

女主角•才女•講師•碩士

身為楊耀松孫新抱的梁慧恩,是圈中難得學歷高兼瓣數多的藝人才女。入行前於理工大學物理治療系畢業,是香港註冊物理治療師。不過愛心爆棚的她,曾在跑馬地一獸醫診所及香港賽馬會作短期獸醫實習。

不斷增值的梁慧恩, 08年到北京電影學院修讀一年,之後正式踏入娛樂圈,任 RoadShow主持及電影演出。受過演藝的正統訓練,她在電影《得閒飲茶》更擔正做女一,拍住方力申。 07年推出以校園兒歌為主的唱片《學聯動感 Never End》,歌、影、司儀未為夠,做埋才女出書,三本著作包括《瘦身攻防》、《我的寵物窩》及《瑜伽瘦身健體》。

唔想浪費滿肚墨水, 09年梁慧恩邊做幕前,邊任大學講師,之後加入跨國能源管理公司匯能集團,成為社企責任及可持續發展總監。 12年嫁入豪門,當人母前還向博士研究生進發,魄力

驚人。

學歷及銜頭

00年:畢業於香港理工大學物理治療系,為香港註冊物理治療師。

09年:為香港中文大學地球系統科學系碩士研究生。

11年:以優異成績的理學碩士畢業,並被列入 2011年度中文大學社會科學院院長榮譽錄,被邀到科技大學作客席講師。

12年:為香港中文大學生命科學學院環境科學系哲學博士研究生,集中研究珊瑚、海洋生態及保育工作。後因做人母要專注湊女,被迫停學。

Viann(右一)當年是任 RoadShow主持而入行。

06年, Viann被初執導的林子聰睇中,成為他首部愛情作品《得閒飲茶》的女主角,劉華亦有份客串一角。

13年, Viann曾為商台節目《一圈圈》做主持人。

13年, Viann與五位朋友集資近一千萬,投資專賣貓山皇的甜品店,最後因當上媽媽後無時間打理而退股。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...