娛樂偵訊
王維基愛將 翻版楊恭如轉投李逸朗
一度是失蹤人口的李逸朗， 15年回歸香港娛圈出歌密密拍戲外，更被指挑戰難度力追特首女梁齊昕，前年初，又被發現跟港姐朱晨麗麥記撐枱腳，不過統統係無米粥。最近 Don（李逸朗）終於有着落，撻着王維基港視愛將、有翻版楊恭如之稱的鮑康兒，二人早前更秘密飛紐約旅行。
護士女神
李逸朗去年十月跟鮑康兒合作內地網絡電影《化妝屍》，在戲中飾演情侶，雖然開工十幾日，不過日對夜對擦出真火，戲拍完，二人感情有增無減，李逸朗更會拖鮑康兒出席朋友聚會。
有意在娛圈發展的鮑康兒，○八年曾參選亞姐，一二年王維基港視開台，她成為第一批藝訓班畢業生兼備受力捧，先後拍過《選戰》、《警界線》等劇集，一五年與陳栢宇合作《大眾情性》，扮演女神護士而一度人氣急升。
搵女友拍戲
拍拖幾個月，二人打得火熱，據了解，李逸朗年初飛紐約做騷，鮑康兒也有同行，慶祝第一個共度的聖誕及新年，但就分別 po相上 ig。
「阿 Don（李逸朗）早排同楊思琦一齊拍嗰部網片《神探茄哩啡》爆咗，喺內地多咗好多 job，好有景，仲由將軍澳屋苑搬去尖沙咀住。雖然好忙，好多時都飛內地開工，不過返到香港，就會補番數，陪鮑鮑（鮑康兒）周圍去。」身邊人透露。
有指二人拍戲撻着，身在北京開工的李逸朗在電話中否認：「我哋係好朋友，佢係一個好好嘅女仔，好多時都會約埋食飯睇戲。我近排籌備緊新戲，都會同好多幕後人開會傾劇本，唔通因為咁避開晒所有女仔咩。」問再做導演的他，會否搵鮑鮑做其中一個角色，他唔排除：「而家仲未定角色，不過有啱嘅都會搵佢合作。」
有朵女友
李逸朗緋聞女友一大籮，有港姐有特首女以及早年移居台灣的舊拍檔，文青女神蔣雅文，個個有朵。
梁齊昕
15年 2月，李逸朗以「哭腔」回歸香港樂壇唱《傻女》大爆，開迷你演唱會時，特首女梁齊昕突然出現捧場，有指二人經常互傳訊息傾偈，好有 feel。但事後有指梁齊昕向友人透露被利用，但李逸朗卻澄清從未邀梁齊昕睇騷，各執一詞。
撰文、攝影、攝錄：娛樂組
|
鍾意就快D Share啦！
|
|
|
