熱爆娛樂: 養草三十年　鄧家兄妹賣地袋一億 [壹週刊 - 1414

2017年4月13日星期四

養草三十年　鄧家兄妹賣地袋一億 [壹週刊 - 1414 - 財經] __,M1,

出售地皮事宜，鄧兆尊（中）稱由弟弟鄧兆榮（右）負責，鄧小艾（左）也佔四分之一權益。

中環人語

養草三十年　鄧家兄妹賣地袋一億

粵劇名伶新馬師曾兒子鄧兆尊，不知是否如母親祥嫂所言，想拍戲搏出位，透過身邊三位女伴而再度成為娛樂新聞主角；此舉令祥嫂「撻着」，一度在魯芬喪禮上哭着責子，又主動透露已立平安紙，把遺產留給子女云云，令人回想起廿年前鄧家爭產事件。

無獨有偶，新馬師曾名下遺產之一——西貢一幅四萬呎獨立屋地皮，正積極透過戴德梁行放售，這幅地雖然冇海景且有高度限制，但在現時樓價癲狂市況下，叫價四至五億元，此地皮業權由一間海外公司持有，估計祥嫂四名子女，鄧兆尊、鄧兆榮、鄧碧玉和鄧翠玉（即鄧小艾）各佔四分之一，阿媽係冇份嘅，呢幅地由新馬師曾於九○年以二千四百萬買入，養草近三十年，愈升愈有兼冇按揭，如以四億出售，鄧家四兄妹每人袋一億銀，咁鄧兆尊又點會冇條件風流呢？

黃色箭嘴為前《鏡報》月刊社長徐四民「契仔」許智明的行宮「智盧」，是九九年向「鷓鴣菜」老闆娘張紫珊購入。（關永浩攝）

鄧家四兄妹持有的地皮位於西貢坑口路迴旋處旁，有一荒廢磚屋及泳池。（關永浩攝）

$32蚊歎老細級早餐

何文田地王——高銀集團主席潘蘇通喺佢竇口、九龍灣高銀金融國際中心開咗多間高檔食肆，有中式、法式及日式，佢老哥最鍾意喺一樓嘅「江南庭敍」「烚吓、烚吓」，踎喺間貴賓房，搵啲靚海鮮打邊爐，聽講呢位大老細要求好高，樣樣要新鮮又要精，伙記唔敢唔打醒十二分精神；呢度食肆，唔係一般打工仔食得起，不過江南庭敍個早餐例外，料靚分量足，都係三十二蚊咋，平過茶餐廳，仲可以喺咁幽靜環境歎老細級早餐，真係 value for money㗎！

這間江南庭敍為四間食肆中最平民化，日間賣粥粉麵飯。（梁正平攝）

呢款早餐盛惠三十二蚊，抵食過茶餐廳，現外賣更有八五折，優惠期至四月底。

潘蘇通自行在其九龍灣總壇開設四間高檔食肆，但他最愛打邊爐。

中環寸嘴　城寨𡁻大鱷

楊國佳

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

啲鬼佬講起「玩」就特別精神，好彩我都有飛士，啲銀行佬又送 Rugby Sevens門票，又送 T恤、帽俾我，坐住包廂有得飲有得食，須知道場內一 Jug啤酒要二百幾銀㗎， T恤都五百幾銀一件！咁我都趁吓熱鬧全副武裝去大球場兜個圈，接近吓年輕人，人家抗通脹我就要抗衰老嘛。

有老友幫朋友擺風水陣，叫我去指點吓，咪去九龍城大家觀摩吓，睇吓呢間「城寨風味」，舊年播完套《城寨英雄》之後，人氣有冇跌 watt；不過港鐵工程喺正佢門口動工都有啲相沖，個廚𡃁仔時喺沙田龍華酒店學師，隻乳鴿都令我有小小回憶，成隻上，一人一隻，夠晒 juicy，不過龍華同太平館乳鴿分別在於後者有檸檬跟尾，所以如果識食，加啲青檸粉仲和味，呢樽 Lime粉係啲親戚朋友清明節返港認祖歸宗，喺美國帶返嚟嘅手信，嗰邊都賣斷市。嗰晚阿太最受落係嗰味「掌聲齊鳴」——鱷魚掌，骨膠原黐實個口，有個阿太食完第二日去做運動，話好上力喎，平時做六十下操腹已投降，食完鱷魚掌做足一百二十下仲有氣有力。祝君食完之後，男士變大鱷，女士就好似鱷魚掌咁，𢱑緊些少個衰佬！

呢味「掌聲齊鳴」要預訂先有得食，個廚阿 B都好俾面出嚟亮一亮相。

原隻上乳鴿，如果加埋我嘅來佬貨 Lime粉（右）就更和味。

李澤楷俾面派對

習大大與侵侵在佛羅里達州 Mar-a-Lago莊園會晤，在背後安排的美國國安會亞洲事務資深主任—— Matt Pottinger（博明）在香港有唔少足跡，在他加入《亞洲華爾街日報》做記者之初，已一顯其建立人際網絡的高超手腕，當時正值李澤楷收購香港電訊後科網股熱潮爆破，電盈股價跌到四腳朝天，有乃父之風的 Richard Li深懂與洋人打交道之藝術，小宗猶記得， Matt Pottinger一支公居於灣仔皇后大道東樂滿大廈數百呎單位，有次搞天台 party廣邀記者朋友參加， Richard Li竟然也是賓客之一，好平民化咁跟在場賓客摸酒杯底，當時記者都八卦問：「嘩，乜李澤楷咁俾面阿 Matt？」所謂十年人事幾番新， Matt由記者去到阿富汗當兵打仗再成為美國總統智囊，今日回帶，真係邊個俾面邊個都未知！