真面目
等住嫁 12月嫁會計師男友 黃婉曼搬畢架山試婚
早前低胸暴乳出席金像獎的黃婉曼， 32F巨咪次次有驚喜，不過黄婉曼其實早被有米會計師男友私有化，更準備年尾拉埋。
而本刊日前發現她已搬離嘉亨灣舊住所，遷入非常接近有米男友屋企的畢架山花園，一面𥄫實男友一面等嫁，得閒更學打網球預演闊太生活，雖然黄婉曼話結婚後會「公一份婆一份」，聽住先啦！
以巨咪闖出名堂的「天氣女神」黃婉曼，與「四眼版」林峯的會計師男友 F君拍拖近兩年，本月初出席 nowTV活動時被梁思浩踢爆做緊待嫁新娘，將於 12月結婚，當時她未有否認，反而叫大家做定人情。
上週六（ 20日） 29歲的黃婉曼出席完活動，與經理人和朋友在尖沙咀行街濕平，約下午 3時便趕乘的士離開，原本居住嘉亨灣的她卻直駛九龍塘畢架山花園落車，步入大廈後，約 5點則換上藍色運動裝及紫色短褲，步行到附近網球場，跟外籍教練學打網球，闊太生活逐漸浮面。
而她的會計師男友 F君，亦住在只有 5分鐘車程的同區又一村，據知女神幾個月前以 2萬 3千元月租搬入畢架山花園一千呎單位，目的是方便日日見男友，做好婚前心理準備。
老外教網球
週一（ 22日）黃婉曼於電話回應時，說到等嫁顯得十分尷尬：「佢都未求婚，等男方話事啦，呢啲嘢唔係女方講。搬到咁近係因為佢返日頭工，我夜晚做《撚價》同《操控音樂》，朝早又要返新城開咪，搬近啲見面方便啲。我喺九龍塘長大，對又一村特別有感情㗎！」
佢仲話屋企人不斷催婚，「屋企人永遠都催我結婚，催都冇用啦，要儲錢又想買樓。（你男友喺又一村有樓啦！）佢同屋企人住㗎，同埋我唔想第時靠老公，佢有佢、我還我嘛，想自己儲吓錢先，結咗婚都唔可以旨意老公養自己㗎，公一份婆一份會輕鬆啲！」咁快諗定婚後生活，咪神隨時嫁得！
甜蜜等嫁
今時今日，藝人結婚已唔係秘密，唔少藝人公開會在今年拉埋天窗，除咗黃婉曼準備 12月結婚外，今年暫時有三位女星準備嫁人，大家齊齊上岸！
鄭希怡 11月嫁化妝師
鄭希怡（ Yumiko） 11月將與化妝師男友梁學儲共偕連理，她專誠請假兩個月去籌備婚禮，早前本刊拍到她試一套十多萬元的婚紗，她卻在微博指搞婚事把自己弄得神經錯亂，要將「大事」交給身邊人處理，保持愉快心情等嫁。
李蕙敏嫁英國銀行家
42歲李蕙敏將做秋天新娘，跟拍拖 3年的 38歲英籍男友 Nicallef結婚，婚禮會在外地舉行。 N先生在投資銀行任職投資部主管，被派駐來港工作而認識女方，李蕙敏大讚他浪漫及幽默。
|
鍾意就快D Share啦！
|
|
|