真面目
奸到出汁 敲門自薦 搶過如妃 新奸精伍詠薇： 9年前好恨拍！
全城期待的《金枝慾孽貳》今週播映， 04年《金枝》曾創下最高收視 44點全城追睇，令《金》劇成為古裝神劇，當年 4位花旦鄧萃雯、張可頤、佘詩曼和黎姿亦因此劇被視民肯定演技。
能一劇上位，眾花旦勁流口水，加上當年四大名旦如今獨剩鄧萃雯，入行 20年但冇代表作嘅伍詠薇吼準機會，上年《金枝貳》開拍前竟主動敲珍姐房門自薦。伍姑娘亦坦白講：「我 9年前已恨拍！我唔介意好似新人咁，要畀監製試戲。」
事隔 9年《金枝慾孽貳》本週播映，當年 4大花旦獨剩如妃鄧萃雯。雖然有新加入的蔡少芬，但其實今集最搶係 44歲，入行 20年嘅伍詠薇。劇中飾演如妃妹妹淳太妃嘅伍姑娘，會同如妃鬥足 30集，更係劇中最大奸精，加上《金貳》主題曲、插曲亦係佢唱（早年佢首〈失落於巴黎鐵塔下〉 hit過㗎！），搶曬如妃風頭。
唔介意試戲
能夠做到劇中最搶奸角，全因伍姑娘當日厚面皮，夠膽衝入珍姐（無綫戲劇科總監曾勵珍）房敲門自薦。
她向本刊直認其事：「我睇 04年《金》劇嗰陣已好恨怕喇！當日知佢未齊人，我咪走入去同珍姐講，我好想拍，我唔介意好似新人咁要試戲，珍姐聽見都呆咗。之後周旭明（《金》劇編審）都覺得我做到淳太妃，阿戚（監製戚其義）先畀我做。」據知當時亦有唔少花旦恨撈到一角，但最後都係由伍姑娘跑出。
陳豪最多女
劇中陳豪飾演崑曲大佬倌高流斐，基本上係女都冧佢，先撻着伍姑娘，再被蔡少芬誘惑。最後搞埋鄧萃雯，加埋其他宮女投懷送抱，成個後宮啲女俾佢嗒曬！
4日冇尿屙
爭贏重戲角色，伍姑娘即使有經驗都唔敢偷懶，日日喺製作大樓等飛紙仔，又睇大陸宮廷劇學行路儀態，但第一日同雯女拍對手戲就已經唔記得對白。
她說：「第一日同雯女拍對手戲，我記得明明背曬稿，但一 roll機，雯女一嗌『阿妹』，我即刻唔記得對白。其實我拍呢套劇超緊張，試過 4日冇小便去唔到廁所，又食唔到飯。人哋去食飯我就喺度背稿。每日靠陳豪啲咖啡吊命。」等足一年套劇終於出街，唔知伍姑娘今次又會緊張到點呢？
如妃又唔使死
《金枝慾孽貳》人物眾多，不過到尾好多角色都不得善終。第一輯得雯女留宮中，後來亦只得佢冇死。據知續集結局雯女都係一人獨自留在紫禁城，而鬥餐死嘅伍詠薇及蔡少芬都會死，至於陳豪、黃德斌就冇明顯交代下場。
如妃歎奶
《金》劇除咗大奸角伍姑娘外，雯女繼續係焦點。週日（ 21日）出席完宣傳活動後，雯女先到洲際酒店做訪問，做咗 3個鐘之後去咗佐敦牛奶公司，做足成日都係食咗個燉奶就算。
|
鍾意就快D Share啦！
|
|
|