全城熱爆的娛樂八封新聞 & 時事趣聞 & 生活 + 趣聞
出爐影後楊千嬅憑《春嬌與志明》首奪金像獎影後，但有報道話佢本月初曾入院割 20粒纖維瘤，雖然千嬅事後於微博話係小手術，但聽聞位置近輸卵管，要即刻處理，搞到未徹底康復，千嬅就要忍住痛出席頒獎禮。
唔怪得金像獎慶功，平日豪飲嘅千嬅竟然滴酒不沾。第 2日瞓到黃昏 6點幾， FBI發現千嬅同老公丁子高去做按摩鬆吓，素顏嘅千嬅口腫面腫，精神麻麻，不過就一眼關七，見到 FBI仲轉身打招呼，即係話好番七七八八啦！
慶功搞到淩晨先返屋企休息，又啱啱做完手術，千嬅個樣真係殘爆，好彩有老公丁子高車佢去中環揼骨鬆吓。
發現有鏡頭，千嬅都返轉頭打個招呼，隨即登上 L Place 20樓嘅「 Ten Feet Tall」做按摩。 2小時通淋巴按摩大約 2千蚊有找。
撼贏 Sammi同周迅，千嬅憑春嬌一角封後，仲話會拍第 3集！咁同丁子高追女咪要再等？
