患癌高危 安祖蓮娜切乳保命

4月第三階段前夕

第二階段後，安祖蓮娜胸部已塞入暫時性填充物，為日後乳房重建做準備。至截稿前，安祖蓮娜未有露面，但就 G8會議當日（ 4月 11日）所見，塞入填充物嘅胸部望落頗自然，相信安裝義乳後，效果必定跟以往一樣咁靚。

來路貨

患癌高危　安祖蓮娜切乳保命

母愛偉大，即使度過多少個母親節，做子女嘅仍難以報答。

六子之母嘅國際女星安祖蓮娜祖莉，本周二（ 14日）於《紐約時報》親自撰文，公布切除雙乳嘅消息。背後目的，除減低患癌風險，更係為咗 6名仔女，避免佢哋承受自己經歷過嘅喪母之痛。

即將 38歲嘅安祖蓮娜祖莉（ Angelina Jolie）以《 My Medical Choice》（我的醫療選擇）為題，講述自身防癌經過。行文第一段，以已故母親 Marcheline Bertrand嘅病例開首。

原來安祖蓮娜媽媽 1999年患上卵巢癌，經過 8年苦戰，最終於 2007年初逝世，終年 56歲。向來跟母親感情深厚嘅安祖蓮娜當時不堪打擊，情緒崩潰致體重暴跌，更引嚟厭食症傳聞。而最令佢耿耿於懷，莫過於亡母未能睇住餘下孫仔孫女出世，三代同堂嘅場面無奈只能成追憶。

安祖蓮娜喺文中提及，每當仔女問到婆婆嘅病會唔會遺傳俾自己時，佢都會安慰仔女唔使擔心。但實情係安祖蓮娜得到家族病變基因 BRCA1，患乳癌、卵巢癌嘅機會分別高達 87%同 50%，可以話係高危一族。

手術前

未接受手術嘅安祖蓮娜身形正常，上圍喺長裙之下依然豐滿。

2月手術第一階段

「 Nipple Delay」手術係將乳腺中嘅病菌剔除，過程疼痛並留有大量瘀痕，不過日後若切除乳房仍能保留乳頭。安祖蓮娜 2月初接受療程，一星期後首度曝光，出席 2月 11日嘅頒獎典禮。當時佢談笑風生，但胸前罕有離罩。

3月手術第二階段

大概 2月中旬，安祖蓮娜進行歷時 8小時嘅乳房切除手術。佢笑指滿身插滿喉管，恍如科幻小說咁。經過半個月休息，安祖蓮娜出發到盧旺達考察。佢容顏略帶憔悴，而且胸口瘦到見骨，我見猶憐。

本周二（ 14日），安祖蓮娜於《紐約時報》撰文講述自己嘅防癌歷程，但當中未有提供任何照片。

安祖蓮娜於 Pink Lotus Breast Center接受治療，其防癌細節將會陸續喺網站發布。曾患乳癌嘅女歌手 Sheryl Crow（小圖）同樣係該中心嘅病人，佢早前就喺網站分享自己嘅抗癌經過。

手術成功

為防患於未然，安祖蓮娜首先接受「 Nipple Delay」嘅乳頭檢測，兩星期後正式切除乳房組織，九星期後進行乳房重建，並安裝義乳。整個過程歷時 3個月，完成後，患乳癌機率大幅降低至 5%以下。安祖蓮娜毋須再擔心步母親後塵，對未婚夫畢彼特（ Brad Pitt）以及 6個仔女嚟講，必定係莫大喜訊。

安祖蓮娜 2006年懷上第一胎，當時已患癌嘅媽媽（左）苦撐至 2007年，見過孫女無耐即病逝，終年 56歲。據知安祖蓮娜母系親友向來唔長命，外婆 45歲已經過身。

繼續行善

事實上，安祖蓮娜今次開誠布公，主要想提高大眾防癌意識，鼓勵女性勇於面對逆境。喺接受療程期間，佢亦繼續行善。今年 3月先後以聯合國難民署大使身份到盧旺達、剛果考察， 4月初更攜子到倫敦出席 G8八國集團外長會議。一代性感女神無「胸」一身輕，或多或少令人惋惜，不過比起空有 38D而無內涵嘅明星，「重生」嘅安祖蓮娜的確嚟得更有愛心，更胸懷大志。

2008年，安祖蓮娜誕下龍鳳胎，當時畢佬揸機影下未婚妻餵母乳，並將相片刊登於《 W》雜誌。如今安祖蓮娜切除雙乳，以後或難以再餵哺母乳。

畢安 2005年合作《史密夫決戰史密妻》而撻着。喺治療期間，畢佬全程陪實，隨後更發聲明大讚未婚妻勇敢，慶幸一家人以後可以齊齊整整快樂咁生活落去。

鍾意就快D Share啦！

下一篇 》