Sammi與安仔在女方家中過母親節。安仔知鄭母喜歡食水蜜桃，為冧未來嶽母，便到附近生果店買生果，更成箱買走。
滾熱辣
生仔起爭拗 安仔送貓𠱁Sammi
近日未有工作在身的許志安與鄭秀文，日日糖黐豆。其實兩人自前年 3月復合以來，愛得坦蕩，不介意在鬧市拖手攬腰，安仔更不時上女方家，儼如鄭家半邊仔。
據知一直拖住婚期的 Sammi，在家人催婚下，終於與安仔夾定日期，部署下年尾結婚。不過，就生仔問題上，安仔與 Sammi卻未能取得共識。其實安仔好恨生仔，但 Sammi每次都耍手擰頭，有次仲企硬話︰「咪搞我，我寧願養貓！」兩人因此口角，冷戰了兩天。不過，安仔最終認低威，為了𠱁番女友，答應送短毛貓女俾女方，讓 Sammi的愛貓 Mike有個伴。
今個母親節，安仔亦在女友寓所大寶閣慶祝，兩人外出買外賣時，安仔更陪女友到寵物店睇貓，甜到漏！
自從前年 3月 Sammi與安仔復合，兩人一直屢傳婚訊。兩年多相處以來， Sammi與安仔愈來愈有夫妻 feel。為了爭取雙方見面的時間，女方更減少工作，積極鑽研廚藝，為做安仔背後的煮飯婆作好準備。
母親節傾婚期
安仔這幾年為了儲老婆本，不斷與 Big 4在世界各地巡迴演唱，又密密返內地登台掘金。去年尾，安仔其實已成功求婚，不過當時因為兩人尚有不少工作在身。 Sammi接拍了杜琪峯的《盲探》，而安仔今年亦要與 Big 4巡迴演唱，一直未夾到時間傾婚事。近日，趁着五月中的空檔，安仔與鄭氏父母正式坐低傾婚期。為了有充足時間準備，兩人夾定 14年尾辦婚事，婚宴地點選在日本的輕井澤。
據知母親節前夕，安仔已上了 Sammi大寶閣寓所拜見未來嶽父及嶽母，初步傾禮金同婚宴。安仔還趁母親節，買了隻翡翠手鈪送給未來嶽母，冧得鄭母十分高興。自兩人復合， Sammi家人已多次催婚，尤其鄭父近年身體病痛多，鄭家上下都想盡快了結這心願。
Sammi與安仔情投意合，但就生仔問題上卻有拗撬。知情者說︰「安仔有次出席朋友囝囝嘅百日宴，抱住人哋個仔一副慈父相，咁班 friend咪講笑叫佢生番個，點知佢嘴扁扁呻︰『唉！你估我唔想咩！有人話咪搞我，寧願養貓喎！』」
鍾情英國短毛貓
據知就生仔問題發生爭拗，安仔與 Sammi冷戰了兩天。但一向遷就 Sammi的安仔，最後亦主動冧番女友，更答應送貓給她。安仔心知 Sammi愛貓如命，而 Sammi亦曾透露想 Mike多個伴，怕自己出 trip時，貓貓會寂寞。 5月 12日母親節黃昏時分，安仔與 Sammi駕車到跑馬地買外賣。其間， Sammi兩度到源遠街的寵物店睇貓，更對一隻一歲大白色的英國短毛貓情有獨鍾。
據寵物店員 Cherry透露︰「 Sammi係嚟過兩次，安仔都有陪佢睇。 Sammi同隻一歲白色英國短毛貓女玩得好投契，仲玩咗好耐，睇得出佢好鍾意隻貓。我哋老闆可以幫客搵配種貓，咩色咩品種都可以搵到，價錢由 2千至 2萬不等。」
生仔恐懼症
去年 8月， Sammi在訪問中曾透露婚一定會結，但對生仔卻頗為拒抗︰「結婚係人生一個終極目標……希望有一天由天父帶領我入教堂結婚……但冇諗過做媽咪角色，依家未有衝動要生仔……」加上今年 3月發生倫常慘案，她有感而發︰「之前已好恐慌做媽媽、生仔，對呢個領域好陌生，好多事唔到自己掌握。」更直言會做足避孕措施︰「除非突然有了（意外懷孕），但盡量都不會給這件事突然發生。」
女友這一刻企硬唔生，安仔亦冇符，惟有暫時妥協。「安仔都有自己嘅計劃，佢知道呢啲（生仔）唔逼得， Sammi話鍾意貓咪順佢囉。安仔話依家最重要係雙方感情，只要感情好，將來好多嘢會遷就到。佢話一步步嚟，先搞掂明年尾結婚。加上有 Sammi阿媽幫口，成日話想抱孫，所以安仔說服女友生仔係遲早嘅事。」知情者說。
本刊致電安仔手提電話，其電話卻長期接駁到留言信箱，至截稿前仍未回覆。
Sammi樂做煮飯婆
去年開始，鄭秀文為做安仔煮飯婆，苦練廚藝，她早前亦透露學做小女人：「雖然我跑 8公里，不過佢（安仔）一定勁過我。即使有時我狀態好，也會自動落後讓他更有自豪感。」講到明俾安仔攞威。
短毛貓易養
鄭秀文鍾情的英國短毛貓，性格溫馴，易於適應城市或鄉村生活，和其他的貓能和諧相處，雖然貪玩但並不給人添麻煩。售價由$2千至 2萬不等，根據血統優良、毛色罕有定價。
打理英國短毛貓亦很簡單，每周替牠梳理一次毛髮即可，但到脫毛季節，便要每天梳理一次。
記者曾到 Sammi當日所光顧的寵物店 Noble House，店員 Cherry話 Sammi睇中的英國短毛貓售$6,800。當問及 Sammi玩貓一事， Cherry承認：「佢嗰日係同隻貓玩咗好耐。」但再問她 Sammi是否落實買貓女時， Cherry表示：「唔方便講喇！」
|
鍾意就快D Share啦！
|
|
|