我不嬲都為所欲為！（設計對白）
上流滙
李嘉欣 暗箭
一入豪門深似海，做得名媛望族，就預咗規行矩步，行事說話都要大方得體。不過躋身上流社會多年嘅李嘉欣，偏偏語不驚人誓不休。周日（ 4月 28日），李嘉欣現身馬場，當日佢雖然意氣風發，但輪廓離奇突出，眼皮出現怪痕。
牙尖嘴利外，李嘉欣更滿肚密圈。周一（ 4月 29日），佢不甘老公許晉亨被抄牌，於是將交警相片擺上網獻世，又暗示對方執勤時間要求跟明星合照，隨時飯碗不保。暗箭難防就係咁解！
眼現痕鼻再尖
周日（ 4月 28日），李嘉欣現身沙田馬場，為「愛彼女皇盃」擔任頒獎嘉賓，記者發現李嘅雙眼皮摺痕位置扯高咗，眼皮與上眼線間亦離奇出現疤痕。除咗眼皮有怪痕外，李現在對比 05年一張舊相，鼻骨較前向外斜，而且鼻頭亦多咗幾両肉。
微博爆大鑊
周一（ 4月 29日）早上，李嘉欣同老公許晉亨遊車河，但許因超速被交警攔截兼抄牌。同時，李嘉欣將過程於微博公諸於世，仲話該名執勤交通警要同自己影合照。
許晉亨閃縮現身
一向同老婆李嘉欣係連體嬰嘅許晉亨，賽事當日竟然離奇地與老婆前後腳現身馬場。咁又啱嘅，事關當日佢老婆李嘉欣喺傳媒面前猛彈佢衣着冇品味，佢又點好意思同老婆曬恩愛。
語出驚人
雖然李嘉欣結婚生仔後，甚少出席公開場合，但每次現身，都語出驚人，辭鋒銳利過政府高官。
爆老公禁洗手
早前，李嘉欣出席活動，提及內地爆發 H7N9禽流感，她大爆自己不時用酒精幫囝囝 JM抹手，令老公許晉亨有微言。「有人叫我唔好再用酒精同囝囝抹手，話搞到隻手嚡曬，我話你寧願隻手嚡，定係囝囝用隻手揩面，搞到有病入醫院？佢話好介意人隻手嚡。」
七千呎屋話細
12年尾，李嘉欣被指再懷孕，不過她冷笑說：「未知，唔可以講得俾你知，仲心大心細緊有定冇。老公驚間屋已經好細，再有小朋友就逼爆。」不過她家住七千呎豪宅，竟然出口話間屋細。
佗仔話愛女
10年尾，懷胎 5個月的李嘉欣，公布一索得男，她風騷話：「冇特別研究佢哋（老爺奶奶）係仔定女開心啲，只係知佢哋好開心。仔女都係骨肉，但其實我想生女。」
自動獻禮
李嘉欣唔好惹，但好多名媛淑女就隨和得多，識得自動波送禮。
紅姑風騷任錫
上周五（ 4月 26日），鍾楚紅（紅姑）以裸命 deep V裝出席活動，不時向傳媒及在場嘉賓挺胸施展電眼。大會其中一名男嘉賓一見紅姑就忍唔住錫對方手仔，難得紅姑主動遞手任錫。 53歲仲咁有魅力，難怪紅姑拒拍《春嬌 3》，唔做餘文樂阿媽。
何家姊妹鬥爆料
名利場上最出風頭嘅何家，除咗何鴻燊一家外，睇嚟都要講吓何傲芝同何傲兒兩姊妹。事關呢對自稱富戶出身嘅兩姊妹，近排頻頻由視壇跳入 ball場。佢哋周日就齊齊入馬場，家姐傲芝（右）主動分享自己贏馬秘技，阿妹（左）就大談緋聞，咁又順利見報。
|
鍾意就快D Share啦！
|
|
|