張可頤、蒙嘉慧雖然冇上台發言，但由中環 9號碼頭行到政總，沿途冇 hea一路行一嗌口號，嗌足 10分鐘，非常有心。
真面目
怒火街頭 怕講錯嘢 蒙嘉慧、張可頤拒上台
HKTV不獲發牌，激發 12萬人上街遊行。為咗睇電視，連師奶都可以去到好盡！市民肯發聲，偏偏娛圈中人，除咗 HKTV嘅藝員，其他肯出聲嘅一隻手數得曬。講到尾都係驚被無綫秋後算賬，而當日出席集會嘅蒙嘉慧、張可頤，雖然坐足 4粒鐘，但都唔敢上台開咪撐，最後一線藝員只得林文龍夠膽上台發言。其實有 12萬人背後支持，唔怕大膽啲啦！
- 小強 Tommy都話撐
- 維基整喊美棋 BB
上週二（ 15日）香港電視不獲政府發牌，翌日即裁 320名員工，令一眾員工相當徬徨，除咗員工外，一眾藝員更為擔心，事關電視圈在可見未來仍然由 TVB一台獨大。由無綫過檔嘅藝員更驚被視為黑名單，想再喺無綫蒲頭有排講數。
「萬人齊撐！」 fb發起人
設立嘅 facebook專頁，有接近 50萬人 like，當日亦有份發起東角站集會遊行到政總，更喺集會期間上台發言，不過之後被一眾網友指「騎劫」 HKTV。
華哥低調撐
HKTV工會週日（ 20日）更喺政總搞集會，不過被稱為香港電視一哥嘅黃日華冇現身，等到週一（ 21日）先低調到政總門外支持留守同事。知情者說：「 Plan B未講得，其實星期日（ 20日）個遊行，工會已經不停 call啲紅星撐場㗎啦，林文龍同林嘉華一直都好積極，反而啲花旦就未落實，所以佢哋連日嚟都不停 call蒙嘉慧同張可頤，希望佢哋現身。」
男星如林文龍、薑文傑最積極，除上台發言外，亦幫手打點遊行示威，反而兩位女星蒙嘉慧、張可頤就表現小心，亦不太願意上台發言，結果除林文龍叫一線外，其餘只得劉玉翠、黎彼得等甘草站台，聲勢差一大截。後來集會有更多政治人物上台發言，令兩位女星更驚青，怕集會被「騎劫」入黑名單返大陸搵食無望。於是坐足 4粒鐘後，蒙嘉慧趁一眾演員休息期間，「借尿遁」早閃；而之後張可頤亦隨大隊閃人，張可頤經理人林小姐表示：「 Maggie係以市民身份去參加，冇諗過上台發言，大會亦冇叫佢上台。」都係戴定頭盔穩陣。
蒙嘉慧趁住成班藝員去洗手間時閃人，不過佢都坐足 4粒鐘有誠意。到週一（ 21日）蒙嘉慧再次現身政總，張可頤就冇影。
美棋 BB落淚
HKTV最令網友期待嘅美棋 BB（黃美棋），遊行當日因有工作在身冇撐場。上週六（ 19日）接受本刊訪問，除寫上答謝員工字句及「江湖再見」外，訪問期間談到王維基更感觸落淚。
童星出身嘅美棋 BB兩年前簽約王維基嘅 HKTV，為王維基拍咗 3套劇，可惜 HKTV不獲發牌，令黃美棋亦感到徬徨，她說：「人哋搵我做嘢係因為我可能有劇出，但𠵱家冇，咁客戶未必搵我做嘢，講真靚過我、紅過我嘅大把啦！人哋冇必要搵你。」美棋 BB前路茫茫，問到佢會唔會考慮過檔 TVB，佢就話：「同 HKTV仲有約，現階段唔會諗。」
拍維基劇得罪 TVB 劉浩龍遊行甩底
張可頤、蒙嘉慧唔敢上台，但始終身體力行現身支持。反而曾經拍過王維基劇集《第二人生》做男一嘅劉浩龍，雖然身在大連拍劇，但仍極想親身撐場，可惜最後其經理人公司驚得罪無綫，而迫令劉浩龍繼續開工，而同樣想遊行嘅關楚耀，亦因為公司勸喻而就範。
四年前申請，王維基決心搞靚個台，大手筆搵咗唔少歌手幫 HKTV拍劇，如陳柏宇、劉浩龍和關楚耀等，都分別喺 HKTV劇集擔正。但至上週二（ 15日）香港電視未獲政府發牌，成班歌手都唔敢大聲表態。
被迫消失
上年幫王維基拍劇集《第二人生》孭飛做男一嘅劉浩龍，當日更為角色增肥 20磅。據知劉浩龍得悉王維基不獲發牌後，亦曾考慮出席遊行及集會，更同劇組預早請假一天準備出席。可惜其經理人公司寰亞，怕師兄現身遊行，同無綫「冇彎轉」，加上近年師兄主力返內地拍劇搵銀，唔覺意得罪中央被封殺，兩條水路都冇埋，所以力勸師兄三思唔好去。而同樣想遊行嘅關楚耀，上年亦幫王維基拍過兩套劇《童話戀曲 201314》及《開腦儆探》，據知亦因在譚詠麟出面跟 TVB講掂數解封，為怕再得罪無綫，亦同樣被禁現身。
校長幫拖
關楚耀為 HKTV拍過兩套劇，要返無綫本難過登天，好彩得到校長譚詠麟求情，嚟緊再有機亮相無綫。
演藝人協會遲了的聲明
以往有關藝人生計問題，演藝人協會一定出聲，但今次 HKTV冇牌發及裁走 320名員工，演藝人協會至週一（ 21日）晚上始發出遲了一星期的聲明，但就 10分鐘內又改出新版，新版聲明只對發牌不公為題輕輕帶過稱「希望香港特區政府體恤民意，就個別事件能作出交代」及稱會「盡力與我們伸手協助被解僱的 30名演藝界精英……」而被指聲明取態溫和，純粹「有做嘢」當交代！
|
鍾意就快D Share啦！
|
|
|