哈哈哈哈哈，唔係武則天年代！（真實對白）
被問到男主持爭寵，陳志雲上週回答記者時「雞汁 May」上身：「哈哈哈哈！我哋唔係清朝、呢度唔係武則天年代，唔使爭寵㗎！」
真面目
新仔上場 愛將爭寵 陳志雲𥄫中商台新肌男
凡係有志雲大師嘅地方，男藝人就唔愁有出頭之日！不過紅得幾耐，就要睇你得到志雲大師寵幸幾耐。
昔日無綫一眾愛將鄧健泓、崔建邦爭寵局面，隨着去年 3月陳總加入商台移師到廣播道。
上週商業 1台節目《起來！大龍鳳！》主持人宣布，下週一起由昔日王喜變為新愛將化妝師 Rick Chin同千語 BB，本刊收到消息，另外一個陳總旗下愛將梁泰來主持的《一圈圈》亦有變動，取而代之的原來係綽號「大胸基」的大隻 DJ何基佑，加入商台九個月就上位，之唔係陳總欽旨囉！
33歲何基佑， 02年曾經在新城任職《聯 fan所》主持人， 06年離開新城後加入無綫，主力主持明珠台生活節目及擔任品牌活動司儀。絕跡廣播界足足七年，今年 2月突然加盟商台，更加一開咪即有得拍住王喜主持《起來！大龍鳳！》，以及每週日晚個人音樂節目《又愛上子夜場》。據悉，何基佑入職冇耐即扶搖直上，全靠陳總寵愛扶持。
「睇得 TVB宮廷劇多？」
上週四(7日)，陳志雲率領王喜、 Rick Chin及吳千語在商台舉行的《起來！大龍鳳！》接棒儀式記招，美其名接棒，其實係正式宣布陪住陳總度過風風雨雨的王喜即將離開主持一職。
除了王喜退下主持寶座，本刊收到消息，由陳總愛將梁泰來一手搞起的娛樂節目《一圈圈》亦換血，落到剛加入商台不久的何基佑手上。陳總接受本刊訪問時笑騎騎賣關子：「哈哈哈哈，呢度唔係清朝，冇皇上，又何來失寵呢？(梁泰來被踢出《一圈圈》？)電台節目時不時都要換吓模式、換吓主持，間中加啲新元素，好快《一圈圈》都有新公布，改變一浪接一浪。(係重用何基佑換走梁泰來？)我都係留番一浪接一浪再講啦……都話冇皇帝囉！唔係武則天年代囉！唔使爭寵唔會失寵㗎！大家係唔係睇得 TVB宮廷劇多呀？」
失寵梁泰來
有傳即將被轟出《一圈圈》的梁泰來傍住志雲接受訪問，聽到志雲話《一圈圈》改動容後公布，笑而不語。
冇得撈王喜
林以諾撮合
據悉，其實陳總仍在無綫任職期間，本來因為《東張西望》與當時任主持的何基佑有一面之緣，不過當時他旗下由於太多愛將，「草」多眼亂，對何印象不深。
直到離開無綫、改信基督教，陳總反而因為常與林以諾牧師合作，而與虔誠教友何基佑愈混愈熟。週日記者致電何基佑，當事人不否認陳總關照：「佢叫我基佑、我叫佢 Stephen，佢鍾意人咁叫佢。我哋私底下冇聯絡，更加冇上過佢屋企，係每年幫林以諾牧師做騷會碰頭，佢對我了解多咗，至會問我有冇興趣入商台。 Stephen對我嚟講係老闆又係恩師，每次節目都親力親為參與創作，同其他高層作風的確唔同。王喜係要拍戲至會走，梁泰來亦都保留《一圈圈》專訪，得寵？我又唔覺我係喎！」
陳總愛背心仔？
至於有傳因為身材大隻、返工愛穿背心因而獲陳總留意，何基佑極力否認：「吓？我平時着西裝，淨係星期日返去至會着背心，星期日 Stephen都唔返工、都見唔到？」唔使着背心都喺芸芸男 DJ中跑出，呢啲咪實力囉！
大胸基多瓣數
已婚的何基佑 21歲從加拿大回流、加入新城電台任 DJ，入行 12年，雖然主打做明珠台主持、間中客串劇集，知名度未算高，不過形象健康又口齒伶俐，深受品牌歡迎，是不少國際品牌、公益活動禦用司儀，和電視廣告幕後配音。除此之外，還身兼歌手、舞台劇演員、作家、填詞人及大學客席講師，兩年前再同老死高皓正合辦教會《使徒行傳教會》，身兼多職不下於恩師陳志雲。
愛爭才會贏
陳總口講話電台唔係清朝、冇武則天，唔使爭寵喎。不過事實證明，陳總去到邊，身邊都有多位男性密友包圍，享受爭寵局面。
|
鍾意就快D Share啦！
|
|
|