9:32pm
助手一號 Edith
Fiona從後箍住，女助手亦樂於接受，伸手搭番 Fiona膊頭。
封面
唔受林二汶溝 薛凱琪後巷醉攬美少女
馬賽 BB暗撻有米 TB汪子琦，初時死口唔認仲鬧傳媒斷章取義，但轉個頭就被影到兩個啜爆上海外灘，大話女神即時現形。
同性唔止三分親，同房祖名分手後一直未搵到長久關係的薛凱琪，多年來緋聞有男有女，早前更傳出被林二汶力追，但最後冇曬下文。請人食檸檬，全因 Fiona根本不愁寂寞，上週四（ 7日）晚，本刊發現 Fiona搞音樂會慶功，其間與身邊的美少女非常親密，飲大兩杯的 Fiona仲攬實對方唔願放手！
男人花心信唔過，又唔怪得阿 Fi轉投同性密友懷抱喎！
32歲薛凱琪自從同澳門威尼斯人酒店外籍黑人高層 Reggie Martin分手後，一直冇仔埋身，去年被人影到同舞台劇男演員湯駿業街頭激咀，以為終於有着落，點知原來係「光明會」會員，咀得幾激都只能做「好姊妹」。
愈攬愈實
Dry足咁耐，怕悶 Fiona近期再黐實一班同性圈中好友，仲密密聚會。
上週四（ 7日）九點幾， Fiona做完《 WeChat live show》後，拉隊去大圍蠔吧慶功。成班人有男有女，偏偏 Fiona在後巷等位期間，全程黐實一名細佢一截嘅長髮女子，又攬又箍，其間女友人亦伸手反拖 Fiona。見對方有反應， Fiona唔顧歌星身份，索性成個頭埋在女友條頸唔鬱，愈哄愈近；突如其來的親密舉動嚇到身邊人呆一呆，惟有扮篤電話解圍，而同場其他朋友亦唔敢行近騷擾。
辭職做助手
據知該長髮美少女係 Fiona新女助手，全名鄭懿德（ Edith），曾在商台製作部做過 3年，與圈中人頗為熟絡，亦認識曾追 Fiona的林二汶， Edith在商台任職期間認識 Fiona，直至去年叱咤頒獎禮後辭職唔做。
「 Edith同商台講話會去讀書所以唔做，但轉個頭又走去做阿 Fi助手，呢個圈咁細，邊有得呃！不過佢同阿 Fi真係好好感情，雖然只係助手，但阿 Fi有咩會預佢一份，就算私人時間都嗌埋佢一齊出嚟，或者上阿 Fi屋企傾偈。」知情人士透露。
Fiona：要陪瞓
其實 Fiona性向成謎都唔係第一次，初入行 Wyman一首〈男孩像你〉已經唱出心聲，當時仲經常蒲 les bar，曾被傳與一個有米 TB Ann行埋，對方曾在銅鑼灣耀華街開酒吧，一班圈中女星如鄧麗欣、阿嬌等，都當成私竇晚晚蒲，而曾經都係 les女的陳樂瑤和中性打扮的王若琪亦是座上客。
後來 Fiona同房祖名拍拖，分手後又有黑人新歡，可惜都係唔長久。冇仔陪的日子， Fiona又開始黐番班女同志 friend，「阿 Fi身邊一向有班 les玩得好埋，之前有拖拍梗係戀愛大過天啦，不過一甩咗就會搵番佢哋一齊蒲吧，佢嘅口味可以變得好快㗎！」
本週一（ 11日），本刊致電 Fiona，她就解釋︰「唉！其實我請兩個助手，係因為轉咗公司之後，好多創作上嘅嘢都要親力親為，又買道具又要借衫咁，自己一個做唔曬！我又一定要請女仔，工作時換衫都方便啲，最重要係，出 trip時我唔敢自己一個瞓㗎！真係要陪瞓！我請助手亦唔會理佢哋係唔係 TB，心地好同夾得埋咪得囉，佢哋好好㗎！」要陪埋瞓，唔怪得感情咁好啦！
悄悄話
Fiona同新密友 Edith感情好，原來亦唔介意俾人知！睇番 Fiona嘅 Instagram，唔係講工作就係同 Edith嘅密密傾， Fiona仲玩埋呢期勁 hit嘅 Bitstrips，化身公仔同 Edith齊齊玩，形影不離咪呢隻囉！
時直時攣
Fiona揀 partner口味多元化，由 ABC初戀男友、有米 TB、星二代房祖名到黑人酒店高層，個個唔同 type，睇得出 Fiona真係幾大愛 open mind！
|
鍾意就快D Share啦！
|
|
|