石天欣學過芭蕾舞和多種舞蹈，可是在 TVB多年一直未有發揮機會。
小報告
猜猜我是誰
近年無綫劇經常被批劇情爛，但始終是免費娛樂，差極總有班師奶客，亦造就了一班演員名成利就。
大台做星易搵大錢，但一班奮鬥十幾年的演員仔可能仍籍籍無名，正如蘇基依然係蘇基，真名冇人會記得；又正如要不是 HKTV發牌冇望，亦冇人知道「港版半澤」是誰，雖然一樣叫不出他叫陸駿光……
叫不出的名字何其多，又如 TVB的永遠冇畢業的學生妹代表石天欣，靠被「姦」入屋；眾人阿女林秀怡要「全裸」爬窗； HKTV麥子樂演過「智障人士」、朱婉儀做「八婆」出曬位……一班無名演員，做一次英雄都好！
今年 21歲的石天欣，中五畢業後考入 24期藝員訓練班，入行 4年已經拍過 51套劇，大部分行行企企。近年觀眾最有印象相信是她分別在《仁心解碼 II》及《巨輪》飾演被強姦學生妹、但因為非經理人合約，始終得個做字，上週三（ 20日）她接受本刊訪問時大吐苦水。
維基制度好
「聽過有人要敲門同高層傾偈但我唔會咁做，如果演得好嘅梗係有好機會，但𠵱家唔係嘛，有時突然空降個人落嚟，一嚟就一線，你做咩都冇用！」
她又大膽力撐王維基的 HKTV：「我撐發牌畀王維基㗎！睇到佢制度好囉！乜嘢 under show啫？唔係演員搞出嚟，係你（ TVB）唔畀嘢佢哋做咪 under show囉！王維基嗰邊就算冇嘢做成年都照出糧； TVB冇嘢畀你做，但（話）你唔夠騷喎，咩人嚟㗎？」
眾人阿女 林秀怡：搲撈都要講層次！
22歲的林秀怡 5年前入藝訓班，由於年紀輕，經常飾演囡囡角色， 10年在《女人最痛》增肥演百二磅肥妹嶄露頭角，同年處境劇《依家有喜》演秦沛和米雪女兒最為入屋，但當時月薪只得 7千，「我都唔記得做過人哋阿女幾多次啦！」
住天水圍公屋
林秀怡出自單親家庭，家住天水圍 300呎公屋單位，在惠康任收銀員只得 2千蚊月薪，由於母親有傷不能工作，她入 TVB後曾在尖沙咀日本餐廳做侍應幫補家計。
但林秀怡非常樂觀，上週二（ 19日）接受訪問時表示從未擔心過：「還可以啦，我又懶得行街買嘢，齋食唔食得幾多。媽咪話係咁㗎喇，楊怡都捱 10年啦，我亦寧願一步一步嚟！」
她曾演過很多路人甲角色，但亦好開朗地說：「一兩年冇人認出唔出奇，行街都有人細細聲講：『呢！ TVB嗰個呀。』間中有人叫得出我名已經好好，叫做有啲鼓勵，推動到我繼續做呢行啦。有時一套劇有人記得，梗係想有下一部延續人氣啦，但唔係你想就得，唔通同樂小姐講咩！」
想睇《警界線》
直至去年林秀怡才有較重要角色，好似《怒火街頭 2》她演吸毒孕婦，被迫吞毒品運毒，又要全裸只用浴巾遮身爬窗，但見報一輪又沉寂下來，她說：「 TVB好多人，只好準備好自己再等一個機會，有人識得我哋只係有啲騷接嚇。𢱑撈我未去到有高層理嘅層次，嗰啲可能係主角層次做嘅嘢，我仲有 36層咁上下，都係等囉！」
她亦直言希望 HKTV有牌：「多個台睇嘛！我哋多啲競爭好似好啲。我有睇《警界線》幾好睇，想睇第二集㗎！但佢哋啲機又唔同，又可以慢慢拍。」
續約加$50
她又說前年王維基搶人， TVB就向她和藝訓班同學出招，當時他們尚有一年半合約， TVB就提出完約後再續約一至兩年，到時便可加 300蚊人工，大部分同學都就範，石天欣拒絕了，而最近傾續約時， TVB就稱 HKTV都冇牌，續約只加 50蚊人工，她也只好照簽。「我有做 part time，拍電影，亦有做電話調查員，上個月返 13日之嘛，份糧多過 TVB。」原來大家庭，只值 50蚊！
阿佘緋聞男麥子樂：有工開只因人工最平！
喺 TVB捱生捱死拍膠劇，前年王維基搞電視吹雞搵人，有班人為理想唔怕死轉投維基台，但如今維基台俾 689整死咗，成堆演員即變孤兒仔，其中亦有大班叫唔出名嘅綠葉，即使要望天打卦，卻從未要「愛回家」！
麥子樂 02年加入 TVB，上年 3月轉投 HKTV，在無綫年代多次飾演年青版劉松仁，而離巢前在《雷霆掃毒》演智障青年及《天梯》的細奀，演技都備受讚賞。
「未想返 TVB」
麥子樂承認當年考藝訓班是發明星夢，家族做船廠，家住大坑道一號的麥子樂以為可以紅到劉德華一樣；尤其藝訓班畢業後日日有劇拍衝昏了頭腦，原來 TVB的眷顧只是錯覺。他說：「我哋成班同學鬥多工開，做路人甲就以為自己好紅，後來至知因為係實習期人工最平咋！」
他無奈說：「喺 TVB一直都覺得心淡，但心淡時又有啲好角色做嚇。」他與鄭俊弘（ Fred）是多年老友，對於老友一炮而紅，麥子樂有更深見解：「識 Fred時佢已經玩音樂夾 band，唔覺 TVB扼殺佢才華，只係當時冇《星夢》呢啲配套畀佢哋，監製知道佢識音樂，至會畀佢拍《天與地》，機會係畀有準備嘅人！」
而麥子樂 11年中決定唔續約，拍多兩齣劇集就離巢，打算跟朋友到上海學功夫及繼續演藝發展。誰知天意弄人，《雷霆掃毒》做智障細佬都唔及同阿佘傳緋聞爆，麥子樂避忌說：「同阿佘只係普通朋友，我唔想講太多，套劇出街後，咁啱 HKTV又搵我傾，主要係個製作質素畀到我好大信心，就決定唔去上海喇。」期望到 HKTV更有發展，可惜不獲發牌令他夢碎。「暫時仍未想返 TVB，遲啲再諗去向啦！」
總有出頭天
做 TVB藝員仔要捱窮又冇人識，但凡事有例外。在 TVB做了 14年的趙永洪和徐榮原來是打工皇帝，唔只有樓有車，身家仲令人羨慕。
趙永洪住凱旋門
趙永洪雖然入行以來都是做閒角，但自 07年演《同事三分親》至今年的《愛．回家》幾套處境劇，已經爆騷爆到七彩，收入亦跳升幾級，加上密密接商場騷做司儀，據知每月最高收入達 4、 5萬。今年 5月更以兩萬多元租住凱旋門約 700呎單位，雖然今年 4月他已離開《愛．回家》，但入屋程度令佢大把 job接：「我十幾年都爆騷㗎，外面都好多嘢做！」
徐榮揸三層樓
徐榮同樣入行 14年， 07年憑《同事三分親》中的「裘俊」入屋，之後 keep住月月爆騷，加上由於投資樓市有道，據知他現持有三個單位，分別於西環擁有市值約 450萬（ 400呎）和 500萬（ 500呎）單位放租， 05年結婚時再以 300萬買入馬鞍山一個 800呎單位自住，市值逾 650萬，合共接近 1,600萬，非常犀利！
八婆專家 朱婉儀：記得我係咖喱啡！
00年落選港姐朱婉儀曾經想過離開電視圈，但因渴望演戲而繼續做，但最失望是多年來冇人識，她說：「搭車仲有人講呢個咪 TVB演員，記得我係咖喱啡之嘛，係有啲角色令人記得，但係叫唔出你叫朱婉儀，我反省，一定係個制度裏面有樣嘢令人唔知你叫乜，後來發現海報冇自己名，反而戲分少過我嘅人有，呢啲就係公司親生仔女或者代理人合約藝人， TVB要推畀廣告客認識。」
借錢度日
她稱齋拍劇收入太微薄，入行頭 10年要借私人貸款度日：「雖然有底薪，但唔係個個月夠騷出到糧，咪問銀行借囉，下個月就還。」去年轉投 HKTV，出年 2月約滿，還未有打算。「 TVB拍段片叫我哋返去，可以考慮，但佢嘅表達方法好差囉，佢有曬我哋電話，點解唔打嚟呢？《東張西望》講發牌亦太偏頗，但我嬲個政府多啲，邊個養到隻老虎（狼？）咁大隻先？點解政府將我哋信嘅公義、法律改變，等於𠵱家商台一樣，政府唔畀壓力點會搞李慧玲吖？」對於將來，朱婉儀因在演藝讀過編劇，亦做過相關工作，日後即使轉做幕後總叫有後路，返 TVB？抗爭完再算啦！
《半澤》三子 未有後路
HKTV不獲發牌，卻反而令旗下藝員曝光率大增，在政總集會時上演「港版半澤」的 4位藝員更加一炮而紅，更被蕭定一以高出 50%片酬邀請拍電影《高登闊少踎監日記》，不過一套頂唔到幾耐，仲有排愁。
「半澤」陸駿光：之後點行未諗
以前在無綫不被尊重，兩年前離開時月薪仍然得 7千蚊，更冇人識佢係乜水；轉投 HKTV後向女友求婚，可惜不獲發牌要延遲婚禮，現仍替 HKTV開工的陸駿光說：「𠵱家為《 Night Shift》開工，之後點行都未諗。」
「渡真」張松枝：仲有年半約
張松枝曾在 TVB工作 18年，有「禦用二世祖」之稱，叫比較有名氣，可惜長達 12年冇加人工，個個月要慳住使，曾說過轉行紮鐵或學沖奶茶做廚，現將接拍蕭定一電影，張松枝說：「我仲有年半約，未諗跟住點呀，仲有糧出嘅，其實做乜角色都冇所謂！」
|
鍾意就快D Share啦！
|
|
|
