亞熱帶
堀北真希 銷魂機師衝上雲霄
堀北真希自從成名作《花樣少年少女》之後事業停滯不前，一時性感一時純真，睇到 fans精神分裂，幸好去年一部《小梅醫生》確立她的熱血形象，更令她榮膺三料視後。
今年堀北真希食住個勢，在日版《衝上雲霄》飾演女機師，一個人擔起成套劇，又推出性感寫真，實行做個銷魂女機師！
生成一副 baby face的堀北真希曾經嘗試轉型，在日劇《愛無罪》大玩頹廢 feel，拍電影《白夜行》更首次牀戲兼大露背，可惜反應未如理想，慘成票房毒藥。希妹於是主打電視劇，去年更放下身段，主演清晨時段劇集《小梅醫生》，平均收視 20.7%，成為該時段十年以來最高收視節目。
希妹自言當時壓力爆燈:「大家都好期待最新劇情，我都好驚滿足唔到大家要求，每次開廠我都好似上戰場咁緊張!」壓力有回報，因為在《小梅醫生》的勵志演出，希妹獲得「日刊 Sport日劇大獎」等三大最佳女主角名銜，今年更主持《紅白》，擺明升呢。
榮升視後
食住視後強勢，希妹今年重返晚間時段，在《 Miss Pilot》飾演女機師。雖然《 Miss Pilot》平均收視只有 12.3﹪，不過成套劇卡士麻麻，成績已比預期好。加上希妹更被幕後人員大讚工作態度好，背熟對白少 NG，令她仍然 keep到人氣。
不過希妹戲外好 cool，悶親唔少男星，前排由《 Flash》主辦的「最不想合作女星」，希妹就排名第一。不過希妹並非怕醜，只是睇啱心水至出招，她與山下智久、龜梨和也、松田翔太都傳過緋聞，似乎希妹 cool定熱情，好視乎對象。
論身材希妹是「牆」平公主，但戲內戲外她久唔久都行性感，又表示絕不介意露一手:「我有練開腹肌同背肌，我都想大家睇下我鍛煉嘅成果!」睇肌肉也好，睇性感也好，希妹肯露一手， fans一定支持!
清純煞食
出道 11年， 25歲的堀北真希雖然都試過玩反叛同性感，不過觀眾都係 buy佢飾演嘅清純角色。
|
鍾意就快D Share啦！
|
|
|
