秘密撐枱腳
11月 7日， Herman獨自約王君馨撐枱腳，其間女方動作多多， Herman亦望實對方冧笑。
娛樂喧
威脅鍾嘉欣 王君馨冧掂高層力捧
朝中有人好辦事，原屬「星煥國際」唱片公司老闆的何哲圖（ Herman），得老婆餘詠珊引薦，近日「空降」無綫，成立「星夢娛樂」打骰做 CEO，拉埋旗下歌手過檔硬簽無綫。
何哲圖全權話曬事，除繼續「睇住」心肝椗鍾嘉欣外，下一個將會力捧跳得剝得的「處女」王君馨。日前，記者更發現 Herman秘密約君馨嘆茶。其間記者聽到何哲圖落足嘴頭：「你睇鍾嘉欣幾聽我話，你係我就知條路點行……你唔應該俾宗教規限，你明啦！」而君馨就一味點頭話
「好」，睇嚟嘉欣 BB遇勁敵了！
王君馨自 07年當選港姐亞軍以來，外界只知道她舞技了得，直至早前的《星夢傳奇》，她開金口後備受讚賞。雖然受腳傷影響表現，早已被 out出局，但無損一眾高層對她另眼相看。上周五（ 15日）正式宣布成立的「星夢娛樂」，當然預她一份。
讚王君馨夠主動
Herman在「星煥國際」時，特別偏愛鍾嘉欣，力穀她一年出一碟外，又替她開演唱會，反而對公認唱得的鄭欣宜不聞不問。本刊收到消息， Herman下一個「點燈」的對象，將會是虔誠基督徒，自稱仍是「處女」的王君馨。
知情人透露：「 Herman不嬲鍾意捧靚女，你睇欣宜下場就知。雖然 Herman錫 Linda（鍾嘉欣），不過就嫌佢唔夠主動。依家 Herman睇曬成個『星夢』，捧男仔就話睇定啲先。至於女嘅，佢就覺得 Grace（王君馨）鬼妹仔性格，熱情奔放易話為，所以講明睇好佢。 Grace亦都係醒目女嚟， Herman呢排成日搵佢傾偈，佢都冇 say no！」
密會教路
兩周前（ 11月 7日），記者發現 Herman相約王君馨在無綫 canteen撐枱腳嘆茶，二人特別揀下午兩點半過曬飯市較少人時間。其間記者在旁聽到 Herman不停發言，素顏的君馨則一直細心聆聽。記者聽到男方好有耐性教君馨要聽話及識聽歌：「……要跟我方向做，你睇鍾嘉欣幾聽我話！我俾親咩歌佢聽，佢都話好聽，佢知個好處喺邊，你明唔明？你係我你會捧邊個歌手？你係我就知條路點行。依家做歌手要識聽歌，人哋做好隻歌俾你，你唔識聽就不如返屋企瞓覺啦！」之後王君馨問 Herman樂壇中哪個歌手最識聽歌？他竟然大數昔日旗下歌手：「講真鄭融唔識聽歌，關心妍識少少， even連彭羚都唔識，但容祖兒同鍾嘉欣就好識，所以人哋咁紅有原因。」王再問：「其實我都聽好多中、英文歌，不過對神嘅歌特別有感覺。」 Herman隨即表示：「你唔應該俾宗教規限。」
貼身照顧
得 Herman射住，即使王君馨在《星夢》比賽中落敗，但依然能夠拍住冠軍鄭俊弘，在早前的《節目巡禮》做表演嘉賓。周二晚台慶夜（ 19日），她更以歌手身份打頭陣演出。據知， Herman日前已列出大堆「捧馨」大計，包括安排她唱無綫劇集主題曲，下年年中更會為對方推出個人專輯，繼而開迷你音樂會。
上周五（ 15日），「星夢娛樂」正式宣布成立，席上穿上透視晚裝的王君馨，似足主人家滿場飛，更獲 Herman貼身照顧，介紹與場中各賓客逐一握手。相反其他星夢男丁包括冠軍鄭俊弘，卻全程企埋一邊冇人理。
記者向王君馨求證獲力捧一事，她忽然誇張地爆喊說：「我由 4歲發夢到依家，等咗呢日好耐，多謝 Herman。（知你係最先一個受力捧喎？）唔……我知道公司會安排我唱主題曲同嚟緊好多大型節目都有份參加，但唔講得係咩，等公司宣布。（上次見到 Herman淨係搵你傾偈，覺唔覺佢好睇你？）佢個個都錫，不過可能想了解我多啲。我信任佢，佢係個好有經驗嘅老闆，同佢傾偈好舒服，對住佢好親切。」回應都感動成咁，睇嚟 Herman真係錫到佢燶。
|
鍾意就快D Share啦！
|
|
|
