上周六（ 14日），蔡少芬一家四口現身尖沙嘴山林道，為有份投資的童裝店剪綵。其間，蔡不時捉實細女信兒隻手和傳媒揮手，認真識做。
娛樂喧
轉名避稅慳百萬 蔡少芬半億炒樓
台慶頒獎禮在爭議聲中落幕，憑膠劇《金枝慾孽貳》有份角逐視後的蔡少芬，最終五強不入，認真失威。
不過蔡少芬懶理賽果，事關她決心做一位有家室的女強人。上周六（ 14日），她投資千萬的童裝店正式開幕，出動老公張晉和兩個愛女剪綵，更豪言短期內再泵水，開多幾間分店。
千萬開舖不特止，蔡少芬連月來更豪花三千萬連掃凱旋門及囍滙兩樓。雖然呎價高見三萬，但睇好樓市的蔡少芬則說：「唔係好貴啫！」
年前一套《後宮甄嬛傳》，令蔡少芬在內地爆紅，廣告代言及內地商演接唔停。老公張晉亦憑今年初的《一代宗師》鹹魚翻生，內地片約不絕。
避樓市雙辣招
兩公婆賺到盤滿缽滿，為將嚿錢愈滾愈大，即使樓市淡靜如一池死水，更隨時有回落風險，但他們仍冒險入市，三個月內連掃兩樓。「唔好以為 Ada（蔡之洋名）平時食住老公，但其實佢對金錢冇乜概念，唔知點樣發大。所以佢搵到啲錢，都會交曬俾老公投資，由老公話事。張晉話要炒樓， Ada都冇異議。」知情者說。
位於元朗錦綉花園的獨立屋，原本屬蔡少芬和張晉的聯名物業。但今年 8月，蔡突然除名，將物業以低於市場價轉俾老公。兩星期後，蔡少芬就以千二萬買入凱旋門一個實用面積只得 400多呎的單位。看來蔡將錦綉花園的單位轉手俾老公，只是避過「樓市雙辣招」免交雙倍印花稅，以過千萬樓印花稅 7.5%計算，今回兩夫妻慳了成 90萬。
不過避無可避，事關張晉炒癮未竭。本月初，他再遊說太太以千七萬買入位於灣仔新樓盤囍滙，購入一個五百多呎細單位，呎價高達三萬元。「佢哋一家四口，邊有可能住咁細單位呀，張晉見灣仔市區租盤因為多外國商人承接，供不應求，所以先買嚟收租，等租客供樓。」知情者說。
上海連開兩舖
張晉負責炒樓，至於童裝生意則由蔡少芬揸弗。為了幫生意打開知名度，她一早決定搵自己一家四口拍廣告硬照做生招牌，刺激銷售量。起初她與兩位圈外好友合資近七位數，先將童裝放在百貨公司寄賣，小試牛刀。「可能真係明星效應，加埋 Ada成日落嘴頭叫啲教友幫襯，所以啲生意真係愈做愈好。於是 Ada個人再揼多千幾萬出嚟喺尖沙嘴開舖，遲啲仲打算喺上海連開兩舖。」知情者說。
上周六（ 14日），蔡少芬一家四口，出席她新舖的開幕儀式。提到童裝生意，蔡少芬滿腹大計，她說：「我諗住搞大佢㗎！遲啲唔單止女仔衫，會出埋男童同親子裝。我都打算再喺香港開新舖同發展內地市場。」
對於近日秘買灣仔囍滙一事，她哈哈笑說：「係呀，我唔可以俾自己做閒人㗎，鍾意嗰個地方嘛，位置好好，咪買囉！（成三萬蚊一呎喎！）唔係好貴啫！我唔係要嚟住㗎，用嚟投資啫，我老公主意嚟㗎！（要俾雙倍印花稅喎？）冇辦法啦，係政府政策。」提到早前將錦綉花園獨立屋由夫妻聯名改為張晉名下，是為避辣招行動，蔡少芬尷尬說：「係呀，冇辦法啦！」
中高檔童裝
蔡少芬與好友創立的童裝品牌「童夢工場（ Motion Picture）」，位於尖沙嘴山林道。雖然舖位面積細小，約一百多呎，由於屬於旺區地舖，所以月租要四萬多。
店內專售歲半至 11歲女童裝，走中高檔路線，一件普通公主型衞衣賣三百多元。不過所有童裝衫只少量生產，而且用料講究。店內亦售賣一些玩具、文具等雜物。現時品牌正對外招募形象大使，獲選的小朋友除享有購物優惠外，還會被安排拍攝廣告相及參與慈善活動。
周一（ 16日）記者親自去過店舖，兩位店員服務態度良好，能夠詳細介紹每件童裝。不過由於天雨關係，人流不算太多。記者當日亦訪問過幾個顧客，一名不願開名的女顧客說：「我唔識呢個品牌呀，但覺得啲衫設計幾靚，於是入去睇下，不過覺得價錢偏貴。」
|
鍾意就快D Share啦！
|
|
|