熱爆娛樂: [壹週刊 1241] 叫兩飛　分區搵學位　蔡少芬二千萬入市蔡少芬,M1,

2013年12月19日星期四

[壹週刊 1241] 叫兩飛　分區搵學位　蔡少芬二千萬入市蔡少芬,M1,

今年 9月大女楚兒入讀幼稚園，蔡少芬刻意停工，全職管接送。

探熱針

叫兩飛　分區搵學位　蔡少芬二千萬入市

歷年來買磚頭目的多為自用的蔡少芬（ Ada），過去兩個月一口氣掃入九龍站上蓋的凱旋門和灣仔囍滙兩個單位，斥資二千多萬入市，兩個單位共通點是附近名校林立， Ada明顯為已經兩歲幾的長女湯圓（張楚兒），日後入讀小學作好部署，港島九龍分區插旗，夠曬穩陣。

買多重保險

蔡少芬一一年以七百零七萬買入錦綉花園作為一家幾口安樂窩後，一直未有再入市。今年樓市降溫，地產界多次傳出在內地吸金力強的 Ada，定時定候蒲頭新樓盤睇示範單位，但最終令她心動「科水」的，反而是已有七年樓齡的九龍站上蓋物業凱旋門。

今年十月，蔡少芬以個人名義，買入凱旋門一個有五百五十八呎（建築面積）的高層 studio flat，作價一千二百萬，比起○六年售價五百多萬，足足貴了一倍有多。

「呢類 studio flat喺同區都好搶手，租金有兩至三釐回報，二來呢度係 DGS（女拔萃）校網，唔少家長專登搵呢類單位，方便同小朋友報學校。」一名地產經紀透露。

好學校難求，為穩陣計，本月初，蔡少芬再掟過千萬，買入同樣名校林立的灣仔囍滙二座一個一房複式單位，買多個保障。

「同老公張晉睇過灣仔區啲盤，覺得呢區值得投資……反正資金放銀行定期利息都唔高，而家買樓又有折扣，供樓當儲錢。」蔡少芬說。

今年 10月蔡少芬用個人名義， 1200萬入市買入凱旋門，兩個月後再以過千萬買入灣仔囍滙複式單位。

推劇湊女

返內地開工都帶埋一對寶貝女在身邊的蔡少芬，對女兒將來升學尤其著緊，大女湯圓（楚兒）未滿一歲已經讀預備班，再補習英文雙管齊下，湯圓不負所望，考上陳慧琳兒子劉昇所就讀的 St Catherine's英文幼稚園。與此同時有內地劇搵上門，為免女兒上學有閃失，蔡少芬一口將幾百萬拒諸門外，專心做廿四孝媽咪。拍劇執唔少外，早前蔡少芬同友人合資開設童裝品牌「童夢工場」，並先後在金鐘和銅鑼灣區開設專櫃，開業兩個月，已拍板於尖沙咀山林道開地鋪。

上星期，蔡少芬一家四口為新鋪進行剪綵。

「金鐘嗰邊生意好好，食住個勢嘛，開地鋪都係我哋計劃之內。希望將來喺唔同地區都有分店，不過會逐步嚟，打好基礎先，因為要注重產品嘅質素，唔可以發展得太急！」蔡少芬說。