有鋪小三癮的馬賽，由歐遊到成功獨攬 TB汪遊越南，她都使出耍家的肉緊啜功，箍住獵物。
探熱針
偷情足本版 TB汪認 馬賽歐遊誘開房
被揭攣情做小三，「純情」馬賽形象破產，加上與辣媽聯手閹割汪子琦千萬豪宅事敗，露出「馬腳」的她，唯有無鞋挽屐走，袋住三個月來擸到的百萬家用走人。人財兩空，據悉 TB汪終於醒覺，向 Laura認錯並把偷情惡行和盤托出，指馬賽在黐飲黐食的歐遊之旅中出招誘開房。日前， TB汪首度開腔向本刊默認，與馬賽早在三人歐遊已展開孽緣之旅。
益咗江美儀
有指馬賽早在今年八月出發歐遊前，已跟友人爆響口，稱無綫內部敲定她憑《法外風雲》奪台慶「最佳女配角」。可惜搞攣情做小三聲譽破產，間接親手將獎項轉贈江美儀。
為求翻身，馬賽早前硬住頭皮在《東張西望》公開解畫，但對攣情與做小三指控迴避，甚至拉埋辣媽編造不知女兒搞攣情的謊言，一味唧出黑色眼淚搏加分；結果被 TB汪正印 Laura公開照片，證實「潛水」日子，兩母女其實是陪住 TB汪在東南亞風騷遊，馬賽媽還負責為愛女操刀影啜爆相，再次提證踢爆馬賽大話連篇。
坐大髀撩火
遭馬賽擸完錢狠撇的汪子琦，亦在微博力斥馬賽是大話精，「存心不良者必遭天收。」認清白兔真面目後，據悉悔疚的汪子琦不但向前度 Laura認錯求原諒，還把偷情實錄寫成悔過書向正印和盤托出。
原來馬賽為求達到目的，不顧 Laura豪使數十萬請她歐遊的情義，竟在旅行期間誘掂汪子琦，吼 Laura返房休息空檔，二人到另一酒店開房偷歡。不擇手段的馬賽跟 Laura攤牌時，更擺出一副挑釁態度，將歪理當真理：「不被愛嗰個先至係第三者！」
「奸情」爆破至今，馬賽堅持迴避小三惡行，甚至繼續扮可憐，向公司高層及同事指稱自己遭 Laura咬住唔放，以掩飾歐遊時使橫手搞掂 TB汪的豐功偉績。
「當日馬賽為黐到汪子琦呢條水，知道對方同 Laura計劃歐遊，就專登呻自己俾朋友甩底無得去旅行，汪子琦即刻落疊話請埋佢去；馬賽仲蠱惑到叫汪子琦喺樂易玲同佢經理人嘅微信朋友圈相片設限，都係唔想俾佢哋知道佢黐食黐玩。喺上海一上機，馬賽已經好熱情咁坐喺汪子琦大髀影相，又成日趁 Laura未起身，捉汪子琦一齊去散步，見對方唔抗拒，馬賽嘅暗示愈做愈密，亦愈來愈曖昧。」
胸壓按摩
「去到羅馬後，馬賽開始進一步行動，用身體誘惑目標，每晚佢哋三個圍埋玩啤牌，馬賽開始著得性感，仲不停喺枱底撩汪子琦隻腳，玩輸咗，主動話幫汪子琦按摩抵債，仲成日一邊按一邊將個胸壓埋對方度，到 Laura去沖涼，馬賽更加把握時機，鬱手幫汪子琦抹面，務求有肌膚接觸。牛唔飲水唔㩒得牛頭低，馬賽不停出招，色心起嘅汪子琦梗係迷曬。」知情者爆。
教堂打茄輪
為求刺激，馬賽專登揀了神聖的梵蒂岡教堂頂樓，做偷情撻著之地。
「 Laura畏高，所以唔行上頂樓，馬賽睇準呢個好時機埋手，喺教堂頂樓同汪子琦講：『如果呢刻係同最愛嘅人一齊就好浪漫。』話口未完，兩個就打茄輪。去到八月十八日， Laura上晝留喺酒店房休息，佢兩個扮出街，查實走咗去隔籬酒店開房。俾人又食又拎嘅 Laura仲好心到塞咗幾百歐羅等馬賽有錢傍身，仲叫定午餐等佢哋返嚟食，估唔到，佢兩個真係可以若無其事咁，繼續同 Laura開餐，馬賽仲成日攬住 Laura扮 friend影合照，好得人驚。之後佢兩個喺每個月十八日都慶祝開房日，馬賽要求汪子琦同佢搞勻上海每間五星級酒店！」知情者說。今年十一月，本刊拍得二人啜爆上海時，馬賽入住的正是五星級希爾頓酒店。
TB汪自責
被馬賽「用完即棄」，汪子琦一直拒接電話訪問。本刊透過電郵向她求證馬賽歐遊誘開房一事，以及有關為力捧馬賽開拍電影等問題，汪子琦終首度開腔，以電郵回覆，默認二人歐遊時開房偷食，並暗寸馬賽愛講大話。
「因為我的自私，愛上不該愛的人，傷害了 Laura我很後悔，事後已經完全向她坦白我犯下的過錯……我在歐洲確實跟另外一個犯下沒有底線的過錯，背叛了我們七年的愛情……對於喜歡講大話的人……希望她也正視我們犯下的錯誤，而非再以說謊傷害別人。」
|
鍾意就快D Share啦！
|
|
|