李思捷做男一拍住萬綺雯，但開工無耐，兩人已不和。
探熱針
自視過高 扮黃子華狂改對白 李思捷搞㷫萬綺雯
李思捷執歐陽震華二攤，在新劇《牛頭唔搭馬嘴》中做男一，同女主角萬綺雯有大量對手戲，但一向鍾意扮大佬、要台前幕後聽佢一人指揮的李思捷，自以為同黃子華級數睇齊，經常擅自改劇本、改對白，更試過飲完酒開工，搞到神憎鬼厭，連萬綺雯都頂佢唔順，拒絕同李思捷同枱食飯。
兄弟反目
因為《玩嘢王》收視好，身為主持的李思捷自以為單飛發展一樣掂，加上愛扮大佬性格乞人憎，最終搞到同「福祿壽」其餘兩兄弟阮兆祥、王祖藍不和，各有心病唔肯再合作。
但李思捷唔介意，事關最近佢正式升格做男一，在新劇《牛頭唔搭馬嘴》中同萬綺雯做鬥氣寃家。多得歐陽震華嫌無綫拍劇人工奀辭演，李思捷才成功執二攤。
新劇是喜劇路線，自居搞笑高手的李思捷，看過劇本後，認為對白寫得唔夠精警，於是好學唔學，扮黃子華改對白。
「佢（李思捷）完全冇諗自己咩級數，啱啱先有機會孭飛做男一，就扮曬嘢，以為自己喺片場大曬，一有對白唔啱心水就大大聲鬧，完全唔俾面導演，人哋黃子華係神級，佢要改梗係無問題，仲求之不得，但李思捷算係乜呀？」一名幕後工作人員說。
導演上身
上週五（十二月六日），李思捷、萬綺雯及蝦頭（楊詩敏）在九龍城拍攝外景。李思捷未埋位前現場氣氛相當愉快，萬綺雯同蝦頭更有講有笑，但當李思捷一出現，萬綺雯即刻收起笑容，再用背脊「得」住對方，男女主角毫無交流。
每逢有休息時間，萬綺雯都會攞住劇本睇完再睇，反而李思捷全程顧住𢱑頭，事關他打算唔跟劇本、對白自由發揮，就算導演上前講解劇情，李思捷根本唔入耳，當正自己先係導演，不斷發表大篇偉論，搞到全組人都十分無癮。
由於萬綺雯都頂唔順李思捷的惡行，放飯時間拒絕再對住「李大導」，寧願自己俾錢同工作人員到另一間餐廳，食番餐耳根清靜的安樂茶飯。
改劇本
TVB嘅劇集向來都是是但但，眾所周知都係千篇一律，唔係強姦就係綁架，新進演員有劇本當然唔敢逆旨意照讀，但一班資深老手又點會頂得順呀！
|
鍾意就快D Share啦！
|
|
|