瓏門 II位於九龍站 ICC的示範單位外，每日都聚集大批經紀，扭盡六壬穀客入票。記者放蛇時，發現不少經紀為穀票，違規貼錢，代客出票，穀大新盤的入票額。（廖健昌攝）
封面故事
一手盤假熱賣 放蛇斷正 經紀貼錢造市
年底收爐前，氣溫愈跌愈低，新盤市場卻愈燒愈旺。遊戲玩法大不同，以往買樓要排隊，如今就真金白銀入票等抽籤，造就出一個又一個「新票王」、「凍資王」的樓盤。氣氛熱烈，灣仔囍滙和東湧昇薈未賣完，最新登場的新地壓軸大盤瓏門 II再發威，五日已收到近五千票，壓倒囍滙，成為新票王。
市場購買力彷彿耗之不盡。然而，上月底東湧昇薈在三千多票支持下，卻「消化」不了首批推售的三百多夥單位，這個穀票假局已逐步露底。本刊經過半個月放蛇調查，發現所謂凍資王，原來全靠地產代理行在背後發功，動用私夥「資金池」，代客出錢入票，打造一手盤假熱賣的局面。經紀貼錢用假票造市，不但買家被虛假氣氛蒙蔽而落疊，代理本身更隨時被釘牌，甚至坐監兼留案底。
現時樓市的玩法，就如股市，名詞如「超額認購」、「凍資」，一再出現，「炒味」濃鬱。本週二開售的瓏門 II，收票短短五日，已有超過四千九百票，凍資逾七億四千萬元，雖未能打破囍滙二期凍資九億元的紀錄，但已成為新票王！即使「水分票」之說已愈傳愈烈，但為了搶食今年標尾會的一個大盤，經紀違規造假票之舉，不但沒有收斂，更變本加厲。
偷步收票
早在半個月前，記者已接到一名美聯物業屯門分行經紀電話，力銷瓏門 II，但當時發展商新地，尚未向任何地產代理發出宣傳及銷售委託。記者佯稱對瓏門 II甚有興趣，該經紀連同其上司，車輪式致電記者，催促記者要盡早入票：「當朋友傾偈，我哋估兩房單位，五百萬以內有得揀，我只可以喺電話同你講咁多，因為而家有《一手條例》，我哋唔可以亂噏嘢。唔講嗰句都講埋啦，你真係想買，就要趕喺出價單之前打定本票俾我哋，咁先有機會幫你打尖。我哋同事日日夾好曬票、 ID、文件，成疊 file攞去見發展商高層，要夠快先有得搏，甚至可以搏頭籌。」
經紀在未得到發展商委託前，偷步收票，已違反地產代理監管局的《執業通告》，聲稱可打尖，更可能觸犯《一手住宅物業銷售條例》條文，該刑事條例禁止任何人就一手住宅物業作出「失實陳述和傳播虛假或具誤導性資料」。但是，這僅是經紀造市的第一步。原來，經紀行都會為新盤開設「資金池」，為穀市及搶客，有經紀透過以下三招，違規代客墊資入票。
造假招數一：支票空手道
之前兩名偷步收票的美聯經紀還教記者，要攬曬成家人落去入票，「 The Austin、昇薈、囍滙全部超額認購，三、四千飛爭緊百幾二百個單位，係咁誇張，要玩大包圍，好似六合彩、字花咁。」記者指可集到十個人頭，以每人可入三票，每票十五萬本票計，總數達四百五十萬元。記者指「無咁多現錢」，經紀即興奮教路：「你簽支票俾我哋啦，支票係唔過數㗎嘛，支票唔係開俾發展商喎，係開俾美聯，美聯再幫你出住（本票）先，夾埋你張身份證就可以入俾發展商。我哋美聯打新盤用過億銀，打定曬啲本票喺度。」經紀講明不會兌現支票，買家支票戶口內即使沒有現款亦不構成彈票，即無犯法。
上週三，瓏門 II的首批價單公布後，該美聯經紀心急發 WhatsApp予記者：「（你）帶個人出去登記（入票）碌卡，其他我同你打大票數（意即額外代出多幾張票）。」該經紀鼓勵記者：「集到幾多人頭就幾多人頭，擺曬落去啦，抽唔到無損失㗎。」
違規穀票
造假招數二：本票底單當錢使
勇猛的經紀又何止兩個，一名向來做二手物業的港置女經紀，本月初突然致電記者，一口氣推介數個新盤。記者佯稱，資金早前押注到 The Austin未回籠，她即獻計：「你張本票退番未？你用手機影低張本票，或者本票底單，再 WhatsApp俾我。我哋就會幫你出番相同數額嘅本票，即係 The Austin一張本票三十萬，我哋就喺昇薈或瓏門 II，總之邊個盤都得，幫你入番三十萬嘅票。」即是一票在手，便能「複製」本票到多個新盤，猶如「印票機」。
造假招數三：一票到尾
囍滙去到第三輪推售，仍有二千多票，經紀間流傳當中有六成是早兩輪的「舊飛」。一名曾認購 The Austin及囍滙的投資者，兩次均透過一名利嘉閣經紀入票，該投資者透露：「兩次首輪都抽唔到，攞番張票時，個經紀叫我簽份表，話簽咗就可以一路抽落去，抽幾多輪都得。最後我都抽唔到，佢先攞幾張表出嚟，話要補簽番。」
一名主攻新盤十多年的經紀坦言：「呢啲係偷雞行為，因為新盤每次加推，都要準買家簽署俗稱『復活 form』的意向登記作實，才能再參與新一輪單位的抽籤。我哋而家一係補簽，一係一次過簽定幾張。」
違規穀市 隨時釘牌
上述第一、二招，為客「篤手指」入票的經紀，已違反地監局執業通告不得代客墊資的相關條文。第三招則違反《地產代理條例》要求經紀不論代表買或賣方，作出的行動都須獲客戶授權。地監局回覆指，以上三招均違反指引。如被證實屬實，有可能被監管局處分，最嚴重是撤銷牌照。
某中型經紀行老闆透露，為方便做生意，自備資金池「代客墊資」的做法十分普遍，「每間經紀行都揼咗個 fund打新盤，好似中原咁就撥備咗四、五億資本，呢個資金池係每次有新盤開，出定曬啲唔同律師行同銀碼嘅本票，準備幫啲客入票。」
惟其如此，並非所有代客出票都屬違規，例如準買家碌卡予經紀行，或開出可即日過數的支票，即買家確有出資，而非「空手道」，便屬行內慣性及地監局可接受的範圍。
發展商卸責
對於經紀的違規穀票，關注香港物業市場的智庫組織土地監察，其主席李永達狠批：「現時新盤最少都有樓價百分之三作傭金，發展商同經紀打籠通，互相合作去做旺個場。現時《一手銷售條例》無要求發展商去核實入票，佢可以話唔知邊啲票係水分票。這類似事件以往都發生過唔少，要靠我哋或傳媒去舉報揭發，地監局先會做嘢。」
他指，近期新盤水分票氾濫，負責執行《一手銷售條例》的一手住宅物業銷售監管局（銷監局），應主動去了解及調查。「最少出封 e-mail去問嚇發展商，有幾多係經紀用正規方法幫客出嘅本票呢？咁做可以警惕發展商，同時檢討以後係咪要公布所收本票中，幾多係客嘅，幾多係經紀代出嘅，等市場更準確掌握新盤係咪真係咁受歡迎。」
律師梁永鏗亦認同銷監局應主動出擊：「起碼各方都會自律啲、小心啲，依家就係透明度唔夠高，又未有監管機構去監管經紀行嘅資金池，先有空間俾經紀亂嚟。」他指，違反《一手銷售條例》屬刑事，罰則較只規管地產代理的地監局條例重得多，最高罰款達五百萬元及入獄七年，不過暫時仍未有先例，執法的力度、鬆緊亦不知。
獎金名人盡出
除了違規、犯法的穀票招式，近期新盤市場亦見不少奇招。如早前市傳中原西半山區的經紀，只要有客入票就可獲發二百元獎金。一名知情的經紀透露，「獎金月結式發放，不過唔係個個盤有，只係囍滙有，區域董事揀盤俾。中原美聯向來鬥票多，主區壓力亦特別大。」美聯於囍滙都有此類銀彈獎勵，而且成功簽單更加碼至一千元。
要穀票，動之以「錢」外，還要善用名人效應。絕跡本地新盤兩年的資深投資者鄭明明，及洋參大王楊永仁就彷彿做了囍滙代言人，經紀 sell客時都以他倆為賣點，記者就收過經紀電話：「洋參大王入咗三十幾票，明明姐同史泰祖醫生都買咗，好似話蔡少芬、蔡一智都有買，你買間住入去，好快都會變名人。」
至於天璽重推時，曾出現大量公司客入票，原來經紀有提供一條龍服務。之前天璽補貼買家印花稅，其中公司客的補貼最多，因此就有經紀向準買家開價，提出八萬元包六間空殼公司，「不單齊料，抽唔中，唔啱用，還包取消買殼登記及相關費用。」一名曾代內地客買殼置業的經紀表示：「有啲經紀會開天索價，知你趕住用嚟入票，就開價三萬至五萬元安排一間空殼公司入貨。」
美聯盈警 經紀走險
經紀違規穀票，無非是為賺錢。事實上，自從一○年底起，政府相繼推出特別印花稅、買家印花稅及從價印花稅三大辣招，使樓市膠著多時。經紀正經歷嚴寒，今年整體物業交投，僅約七萬宗，為二十三年以來新低。「二手業主唔肯減，買家唔肯俾，每個週末十大屋苑得十宗八宗成交，經紀咪餓死囉，所以啲新盤一出，就湧曬出去，乜招都要出啦，擙咗大半年，仲唔搵得幾多就幾多！」有經紀行高層表示，美聯經紀特別「出位」，皆因連續多個新盤，都輸給中原，甚至連利嘉閣都不如，他補充：「美聯內部立立亂，去年初玩兵變，到今年八月連統帥陳坤興都走埋，就更加無曬士氣，但經紀都要食㗎，佢哋上星期四發咗盈警啦。」
上週四，美聯集團（ 1200）發盈警，指政府出招令交投量急降，加上《一手銷售條例》今年四月底實施等因素，令全年業績由盈轉虧；而今年截至六月底的上半年，已蝕近九千萬。
就違規事件，美聯及港置回覆指，已要求員工遵守 EAA守則及依《一手銷售條例》行事，絕不容許偷步推銷或代客墊資等。若發現違規事件，會依照內部指引作出跟進及處理。而利嘉閣則指該公司沒有「復活 form」，不存在「復活」事宜。
至於銷監局則回覆，如有證據顯示經紀作出所指的失實陳述，該局會把個案轉交律政司跟進。如有需要，亦會把個案告知 EAA，以便同步跟進。
後記 放蛇有手尾
為調查假票事件，記者以準買家身份，向多名經紀套取資料。過去兩星期，電話不斷被轟炸，包括每日收逾二十個追魂 call，再加上朝八晚十二，不停傳來的 WhatsApp。如今電話一震都有恐懼症。所有經紀都一致力推新盤，其中有港置經紀更一口氣向記者推銷近十個新盤；更有自動波指：「傭我仲可回番俾你。」算一算，本港有約三萬個經紀，但一手連同二手市場，一個月只有幾千宗生意，難怪要奇招盡出，成為香港樓市另一畸形現象。
|
鍾意就快D Share啦！
|
|
|
