汪阿姐去睇左麟右李，勢估唔到自己會成為壓軸爛 gag嘉賓。
同你吟一吟
左麟右李尾場 阿姐發爛渣
日加夜共十三場嘅《左麟右李十週年演唱會》，星期日晚（十二月十五日）唱到最後一場，席上嘉賓包括有汪阿姐、曾華倩、黃偉文、阿叻秀姑、殼王夫婦等。
左麟右李開騷，當然唔少得搞嚇爛 gag，阿倫話以前會搵阿姐做顧問，因為啲爛 gag如果阿姐都識笑，觀眾實鍾意，台下阿姐即刻投訴點解今次唔搵佢？阿倫腦筋急轉彎：「因為克勤搬咗（以前克勤同阿姐係鄰居），同埋你屋企成日俾人打劫。」
講中死穴，阿姐於是轉話題，叫坐旁邊嘅 Wyman黃偉文評一下左麟右李舞台服裝，唔識死嘅 Wyman居然冇厘反應，阿姐馬上叉腰咆哮：「你起身好唔好呀，我而家同你講嘢呀！」
Wyman呆咗五秒，好在兜得到：「今晚大家可以見到汪明荃嘅黑暗面，好明顯佢有啲嘢想講，但又唔好意思，阿姐其實妒忌你兩個今晚咁靚。」再俾人過多棟，阿姐老貓燒鬚，惡都冇用。
同場加演霍建寧好跳得
台下嘉賓，仲有阿倫波友「殼王」陳國強夫婦，以及有「超級打工皇帝」之稱嘅霍建寧同佢太座，當左麟右李叫大家一齊起身跳舞，霍建寧叉腰又扭腰勁玩得，反而殼王同殼王嫂就比較怕醜。
|
鍾意就快D Share啦！
|
|
|
