熱爆娛樂: [壹週刊 1242] 火辣聖誕　許志安夜夜報到　鄭秀文新居透視恩愛許志安,鄭秀文,BKD

2013年12月26日星期四

[壹週刊 1242] 火辣聖誕　許志安夜夜報到　鄭秀文新居透視恩愛許志安,鄭秀文,BKD_S,安仔,M1,

20/12

管接管送無間斷，許志安載 Sammi去白建時道超市入貨，玩煮飯仔。

娛頭

火辣聖誕　許志安夜夜報到　鄭秀文新居透視恩愛

今年八月，終於初嘗跟男友許志安同一屋簷下的鄭秀文，早前在電台訪問中自爆已經「分居」，搬到於九六年買入，現市值四千多萬的二千四百呎淺水灣海峰園豪宅，打回原形做「獨居老人」。

短期同居，不甘就此罷休的安仔，為進一步侵佔不婚女友的私人空間，於是「借啲意」指飼養多年的狼狗 Lucky掛住 Sammi，甚至安排愛犬跟愛人同居，安仔自己則夜夜到 Sammi香閨報到，繼續人釘人戰術。

本月十三日傍晚六時，忙著拆箱執屋的 Sammi，在男友面前手舞足蹈大耍花槍，安仔於是將她一擁入懷， sweet到暈。

耍花槍

紙箱拆不停， Sammi攰到向安仔發小姐脾氣。

呵番抱抱

許志安隨即將 Sammi擁入懷中，成功撲熄天後女友怒火。

幫手執

Sammi執屋，安仔與外傭則幫手拆紙箱。

引狼入室

上月底， Sammi在商台訪問中公開跟安仔已結束三個月的同居生活，十二月初去完布吉參加車婉婉的婚禮後，便搬入淺水灣海峰園豪宅。回復獨居寡佬生活後，安仔悶悶不樂，就連愛犬狼狗 Lucky亦掛住「媽咪」。

當日千辛萬苦搵到逼遷機會氹 Sammi同居，為結婚鋪路的安仔，睇準女友對動物愛心爆棚，不時上報 Lucky情況，又強調元旦前後接下不少登台走埠演出，擔心 Lucky無人照顧，一招順水推舟，成功觸動 Sammi疼錫 Lucky的神經，答應開放香閨，讓愛犬寄住，託 Lucky福氣，答應有空會上門湊狗的安仔，變相有更多機會和理由，進出女友的新居。

「以前好多時候係 Sammi去安仔屋企，而家 Lucky喺淺水灣住，安仔大把藉口摸上門，咁就有機會要求 Sammi再住番埋。」安仔的友人透露。

連日流連 Sammi新居的許志安，開始中年發福現肚腩。

許志安的愛犬 Lucky成功進駐 Sammi新居。

Sammi不時進出其中一個房間擺放物品，半透明的窗戶隱約見到擺滿高踭鞋（紅框）。

攬實呵番

連日所見，安仔夜夜定時定候到 Sammi香閨報到。本月十二日傍晚六點， Sammi忙著執屋開紙皮箱，睡房、客廳兩邊走，安仔幫手，又跟 Lucky玩，超級阿四。

接近九時， Sammi再次現身客廳，只見她比手畫腳，安仔則按指示擺放家中物品，雖然有個好幫手，但執屋大半日，累極 Sammi亦忍唔住抱怨，變身「出氣袋」的安仔，雙手擺後企直，任由女友發洩無駁嘴，之後更忽然將女友攬入懷中，用抱抱撲熄天後的不滿，男友呵番，只見 Sammi再次展現笑容，亦抱緊安仔回禮，甜到漏。耍完花槍，兩人才繼續投入執屋。

Sammi負責揀食物，至於「科水」的重任，則由許志安搞掂。

行超市期間， Sammi全程繑實許志安。

做柴可夫

當日許志安以「擘大眼想出街，都有人車出車入」打動 Sammi同居，為了令女友放棄獨居念頭，讓他自由駐紮淺水灣新居，安仔除了夜夜報到，做柴可夫管接送更加唔少得。

上週五（二十日）傍晚，安仔驅車到淺水灣接 Sammi，先去陽明山莊提款，再到白建時道超市入貨。 Sammi全程繑實男友揀完菜再買罐頭，買下兩大袋食品後便折返海峰園玩煮飯仔，未有再次外出。

翌日（二十一日）下午已經於海峰園蒲頭的安仔，與戴住口罩、眼鏡的 Sammi前往跑馬地買生果，由於人多車多，二人刻意保持距離，行到位處橫街窄巷的寵物店， Sammi的警覺性明顯減低，一手繑實安仔，研究寵物店櫥窗內的貓咪，之後返回 Sammi父母大寶閣寓所，一家人開餐。

21/12

許志安紅鞋襯 Sammi紅褸落跑馬地買生果，還拖住手行入鋪頭。

買完生果， Sammi捉住許志安行去寵物店睇貓。

飼養 Lucky多年的許志安，不時親自帶愛犬散步。

（《忽然 1周》圖片）

私人空間

復合兩年，今年八月因為 Sammi被業主逼遷，安仔有機可乘，幾經辛苦氹掂女友同居，入住名下位於幹德道的殷豪閣。但報導出街後， Sammi便急不及待嗌搬走。

「 Sammi自己都話，已經過曬適婚年齡，根本無衝動，亦唔相信一張紙（婚書）可以令兩個人白頭到老。同番安仔一齊之後，明明冇住埋，都俾記者話佢哋結婚，到後來因為大業主收樓要暫時同居，但有宗教信仰嘅 Sammi始終想有屬於自己嘅空間，同男友分開住，想見就見，佢覺得舒服啲。」 Sammi的好友透露。

安仔即使萬般不情願，但考慮到二人幾經波折才復合，即使想將 Sammi盡快私有化，亦擔心逼得太緊，會適得其反。

上週四， Sammi單拖去伊館睇卓韻芝《床上哈哈笑》棟篤笑，同商台高層俞琤排排坐。

撐朋友撐到底， Sammi不單為卓韻芝首執導演筒的電影《爆 3俏嬌娃》唱主題曲，還性感曬長腿為對方拍 MV。

永不放棄

Sammi獨居的海峰園，是她九六年在華納唱片事業起飛時期，以一千四百二十萬買下，並一度與家人同住。

「 Sammi同屋企人住喺海峰園有五、六年，後來買咗大寶閣搬咗過去， Sammi就將海峰園放租，十幾年都無裝修過，原本佢諗住執嚇間屋再放租，每個月收到十萬租，但考慮到出面難搵樓，佢自己要求又高，所以最後決定收番間屋，自己住番。」知情人說。

Sammi收回單位恢復獨居生活，另方面，安仔見自己令不婚女友接受短期同居，洗腦計劃已踏前一步，即使要再「分居」，仍抱著樂觀態度，以打動 Sammi答應做許太為最終目標，安仔鍥而不捨，分分鐘有轉機。

本月初 Sammi、許志安孖咇去布吉參加車婉婉婚禮。

今年八月，被逼遷的 Sammi搬入許志安位於幹德道的住所同居。

轉口風

11年， Sammi與安仔被傳媒發現在太平館撐枱腳，隨後二人承認剛剛復合，往後不時傳出二人婚訊，一向有「不婚主意」的 Sammi，最近語氣亦有所軟化：「結婚絕對有可能！」

11年 6月　唔係見一、兩次就要結婚！

復合半年，被指擁有 1.6億嫁妝的 Sammi與安仔制訂婚前協議各保身家， Sammi回應說：「大家唔好將呢段關係睇成童話，唔係見一、兩次就要結婚，一段感情需要時間經歷。」

11年 10日　我冇諗過結婚！

Sammi與安仔到日本旅行後再度傳婚訊， Sammi斬釘截鐵表示：「 2011年太趕， 2012年亦唔會，其實我冇諗過結婚。」

12年 2月　當眾求婚即走！

Sammi宣傳電影時再被追問婚事，她開始表現不耐煩：「我暫時未有結婚打算，若伴侶當眾求婚的話，我會即刻走！」

12年 12月　對婚姻唔抗拒。

第 N次傳出婚訊， Sammi回應時忽然態度軟化：「我而家同以前唔同，我對於婚姻並唔抗拒。」

13年 10月　結婚絕對可行！

Sammi接受節目《最佳女主角》訪問時，被黎芷珊問到何時結婚， Sammi笑說：「我覺得絕對有呢個可能性，不過唔會通知大家，結完之後再公開！」