點解消防員可以帶煙仔入災場？電影同真實總是有出入。
探熱針
睇拍戲 氣爆炸彈圍炸 謝霆鋒搏命換千五萬
新鮮出爐的中港台藝人片酬排行榜中，叫價千五萬的謝霆鋒佔第十四位，單拖撐起謝家上下兼 Po朝霆（製作公司），唔想過千萬身價學似前妻張栢芝曇花一現，影帝唯有 keep住搵命搏，下月初上畫的《救火英雄》中，霆鋒在導演郭子健要求下，站在有十多磅的氣爆炸彈前，一 take過做反應拍 ending，以身犯險，心口掛個勇字的他事後說：「如果唔係佢（爆破指導），我一定唔會拍！」
唔敢一口答應
《救火英雄》的 ending場面由謝霆鋒引爆作結尾。由於導演郭子健發覺構思好的場口單靠用特效的話，效果未如理想，於是遊說謝霆鋒親身上陣，站在不足幾米距離的十多磅氣爆炸彈前，交戲做反應。
氣爆炸彈的威力足以將整個人彈起，加上無特技人先做示範，亦沒有彩排的機會，一 take過拍攝，隨時有受傷可能，工作長期排到密麻麻的謝霆鋒怕稍有失誤影響之後的工作，初時亦十五十六不敢一口應承，但又經不起哦功了得的導演，最後落疊。
「真係講個信字，無得試，又唔可以用替身，同十幾磅氣爆炸彈企得咁近，的確好易出事。難得霆鋒肯搏，亦一 take做到我想要嘅反應，其實唔怪得佢猶豫，霆鋒都話，如果唔係信得過爆破特技指導，佢一定唔會拍！」郭子健說。
收工沖兩次涼
火警題材，電影有火就有煙，為達到視覺效果，煙效不離麵粉和芝麻糊沖粉，單是 ending場口，便用了三十包麵粉（麵包店專用的 22kg裝），此外，導演說芝麻糊沖粉、生粉之類的粉劑，在每個火災場面都要大量採用。
「即使每日都戴住面罩開工，收工嗰陣，耳口鼻都一定滿布麵粉，沖兩次涼先至洗得曬。」有份演出的安志傑說。
八十後頂唔住
此外，演員在電影中的裝備，全部都跟足消防處規格，由 PBI Matrix製成，整套消防員制服連帽及呼吸器，重量足足有二十公斤之多，開拍期間正值盛夏，即使八十後的陳偉霆都嗌難頂。
「七、八月最熱嗰幾日，戴住個 BA（呼吸器）開工，好似抖唔到氣咁，好辛苦，但係見到霆鋒佢哋開工都好少除低套 BA，搞到我都唔敢成日除，怕影響進度。」陳偉霆說。
拍攝現場大多環境惡劣，加上重秤裝備不離身，就算唔使埋位，霆鋒都辛苦到「柄埋」一邊，唯獨有兩晚拍消防車撞牆，有老死陳奕迅和房祖名探班，霆鋒才有番啲表情。
|
鍾意就快D Share啦！
|
|
|