熱爆娛樂: [FACE 344] 摸頂入市　阿徐冇名　陳奕迅危揸 3億樓陳奕迅,MF,

2013年12月25日星期三

[FACE 344] 摸頂入市　阿徐冇名　陳奕迅危揸 3億樓陳奕迅,MF,

上週五及六（ 20日及 21日）， Eason在台北小巨蛋連開 2場演唱會，頻頻揾錢的他面容顯得頗為憔悴。

真面目

摸頂入市　阿徐冇名　陳奕迅危揸 3億樓

歌神陳奕迅（ Eason），今年狂唱巡迴，幾乎跑勻全世界，最近仲接埋《金雞 SSS》一戲，唱歌拍戲打孖上，忙到聲爛都冇得休息。

Eason咁搏命揾錢，除因要養起全家，更因今年先後豪花 3億分別買入商廈環匯廣場及壽臣山 Shouson Peak獨立屋。供樓支出龐大，最慘係 Eason一入市就撞正美國宣布退市計劃，各大專家又紛紛預測樓市將跌三成，難怪 Eason要搏命搵錢積穀防飢，一個男人孭起三億樓債，疑似冇加阿徐名，辛苦曬！好話唔好聽蝕入肉都唔使老婆孭，唔怕當年阿 B章小蕙因負資產婚變。咁先叫錫老婆！

Eason身為一家之主，由囡囡陳康堤入讀名校女拔萃的學費、老婆徐濠縈開設個人時裝店的使費；到父親陳裘大醫病費用都一一包辦，加上今年又豪花 3億豪買入兩物業， Eason當然亦唔會放過周圍撲錢的機會，演唱會開足一年，難得留港都要客串演《金雞》，實行做得唔好嘥。

在 Instagram自稱「跑步永不停」的徐濠縈，月初在上海參加半馬拉松比賽，全程表現輕鬆，而老公 Eason則在香港為《金雞 SSS》開工努力撲水賺錢。

週五（ 20日），徐濠縈帶同囡囡陳康堤現身台北小巨蛋支持老公 Eason，有老婆同寶貝女撐場， Eason再辛苦都要撐。

上週日（ 15日）， Eason簽署臨時買賣合約，而有傳在臨約上沒有名字的徐濠縈，就出街整指甲扮靚。

減盡 8%樓價

一向冇乜買樓癮的 Eason，先於今年 5月和 12月，以$8,300萬買入黃竹坑商廈環匯廣場，以作自家工作室及錄音室，至今月再以 2億 3千萬購入壽臣山 Shouson Peak獨立屋自住。

以往慣以公司名義持有物業的 Eason，今次為享減價和慳稅，就破例以個人名義買入。據知，在今月 15日簽臨時合約時，並未加入老婆徐濠縈名，知情人士說：「 Shouson Peak用私人名義可以減多 3%，都有差唔多成千萬， Eason梗係唔會用公司 hold啦，聽講張臨時約冇阿徐名，不過佢上星期四上律師樓簽正式約有冇加番老婆名就唔知喇！其實 Eason呢次都係經一個細行 agent買，聽講之前佢哋睇樓已好鍾意，康堤同阿徐鍾意有私人泳池同大花園， Eason鍾意夠靜，所以貴啲都撲鎚買。」

上週四（ 19日），陳奕迅到律師樓簽合約，徐濠縈上週五（ 20日）飛到台北支持老公，有新豪宅住，梗要全家慶祝嚇。

Eason一向愛妻兼痛錫獨女康堤，難得二人鍾意， Eason 3億買獨立屋都唔肉赤。

狂做一年

可惜 Eason重金入市，卻撞正美國宣布減少量寬金額，有大行更預測未來香港的樓市將會下跌 2、 3成，揸重貨的 Eason當然擔心變負資產。

好在 Eason吸金力強，由 10年開始巡唱幾乎唱足一百場，下年仲會殺入歐洲， 3月會到倫敦及法國開個唱。為搵錢， Eason連電影《金雞 SSS》都撈埋一份。賺錢固之然重要，不過 Eason之前喉嚨試過生繭出事，搵錢都要顧住健康喎！