出名「煙剷」的撈家，休息時間永遠煙不離手，估計他起碼每日要食兩包煙。
探熱針
羅嘉良收 25萬受靶
因為第二任老婆蘇岩大肚，再做老豆的「撈家」羅嘉良停工近一年陪產，再等埋 B女 Sela舉行百日宴，才正式復工。
在內地劇《精忠嶽飛》飾演秦檜一角奸出位後，撈家在新作《爸爸父親爹》繼續演頭號反派。今年一月中上海埋位開工，收 25萬一集做漢奸，代價是俾人爛菜雞蛋兜口兜面掟。錢，唔易賺！
大煙癮
去年七月，為囡囡 Sela在北京舉行百日宴後，羅嘉良隨即復工，密密搵奶粉錢。要養妻活兒，坐歪做奸角一樣殺！在國產劇《爸爸父親爹》飾演漢奸的撈家，暫別北京妻女，隻身到上海勝強影視基地，為新劇拍攝埋位。現場所見，即使未夠鐘，撈家已經著定戲服、化好妝在現場等「嗌咪」，同身邊人無兩句的他，大部分時間坐埋一邊，扯煙睇劇本。
正式拍攝，現場攞住爛菜、雞蛋的臨時演員各就各位，導演一聲令下，所有人邊嗌口號邊將爛菜、雞蛋掟向撈家，場面壯觀。
之後補拍近鏡，導演親自出手掟雞蛋，兜口兜面就掟。雖然成面蛋漿，但只在意拍攝效果的撈家，主動要求嚟多 take，企埋一邊扯番支煙稍作休息後，埋位再嚟過。
奸出頭
在無綫年代贏過三屆視帝，撈家轉戰國內十多年風光不再，近年擔正做男主角的劇集大幅減少，坐歪做配角照去，因為價錢不高又無要求，所以長拍長有。直至去年，與黃曉明合作《精忠嶽飛》飾演奸角秦檜，撈家演技獲一致好評，成功開拓大反派戲路，劇酬更一下子由十幾萬躍升到二十五萬一集。
再婚後將基地搬到內地的撈家，一二年中因為妻子蘇岩發現有喜，撈家決定停工陪產。「個仔（與前妻方敏儀所生）出世嗰陣我一劇接一劇，根本無時間俾到佢（兒子），呢次我要彌補之前嘅遺憾！」最終撈家帶埋老婆返香港待產，直至囡囡 Sela去年四月出世，在北京搞埋百日宴，他才放心歸位，繼續搵錢。
|
鍾意就快D Share啦！
|
|
|
