23/1 11:28pm
剛到機場的柏豪對於現場有記者採訪表現愕然，但亦大方任影，仲話畀記者知係去歐洲。雖然柏豪只係單拖出現，但一個男人拖兩個大行李喼已經出賣咗佢。
真面目
二人世界 愛的宣言升級 柏豪偷運女友巴黎蜜月
樂壇頒獎禮隨住月中舉行的《勁歌總選》而圓滿結束，歌手們鬆一口氣，休息再迎戰 2014。好似天後容祖兒，就靜雞雞孖住男友師兄及屋企人蘇梅島享受陽光與海灘。
在《叱吒頒獎禮》上勇奪 3獎的周柏豪，得到「男歌手銀獎」時，向一直神秘低調、任職 I.T時裝買手的女友 Stephanie公開愛的宣言：「我會跑快啲，跑到我哋嘅終點……我愛你。」雖然冇開名，不過 Stephanie甜到入心。柏豪言出必行，為獎勵女友多年在背後默默支持，頒獎禮後決定豪請女友往巴黎、英國預支蜜月兩星期，並於上週四（ 23日）出發。當晚被本刊發現單拖現身機場的柏豪，被問到女友點解冇同行時笑說：「唔知呀，唔得閒啩？」其實二人只係分開入閘，貫徹 Stephanie樂做隱形女友作風啫！
出道 6年，周柏豪由模特兒逐步升呢，再慢慢步上各大電台年尾頒獎禮，緋聞多多的周柏豪曾與鄭融、何超雲、吳雨霏及連詩雅傳過緋聞，不過全都曇花一現，柏豪每晚返屋企對住的，仍是跟他拍拖近 6年的同居女友，任職 I.T時裝買手的 Stephanie Chu。
派定心丸
剛於 1月 1日的《 2013年度叱吒樂壇流行榜頒獎典禮》的頒獎台上，柏豪 3次上台領獎，終於在領取「叱吒樂壇男歌手」銀獎時，忍唔住要公開對女友發放愛的宣言。
「想多謝一個人，人愈大愈發覺需要認同，原來俾自己愛嘅人去認同係最重要。好感謝你，係你一路陪住我成長，陪住我度過好多難關。我會跑快啲，跑到我哋嘅終點。我愛你，多謝你嘅耐性。」
當晚柏豪雖然冇開女友名，但柏豪開口講「我愛你」，明顯想給女友 Stephanie名分。柏豪身邊人說：「柏豪其實都已經肯定 Stephanie正印地位，人人都知佢哋同居；而 Stephanie亦得到柏豪屋企人認同，所以佢唔介意向女友公開示愛，只係為免影響對方生活及自己事業，所以唔開名住。」
坐特選經濟位
完成各大頒獎禮，加上去年柏豪的成績大家有目共睹，故柏豪請埋女友 Stephanie同遊巴黎、英國預支蜜月，二人並已於上週五淩晨（ 24日）出發。據知雖然二人不是坐頭等或商務客位，但柏豪是以飛行哩數換取較經濟艙闊落的特選經濟客位，讓女友舒舒服服到達目的地。二人將於巴黎及英國各留約一星期，並於農曆年後返港。
上週四（ 23日）晚，柏豪與連詩雅等人先往紅館睇軟硬演唱會，未睇到完場，柏豪先行離開，約 11時 20分在機場見到記者初時表現錯愕，但馬上即露出笑容。柏豪被問到去邊度旅行時，柏豪猶豫：「歐洲囉！（幾時返？）過埋年啦！（女朋友呢？）唔知喎，唔得閒啩？」
完成 check-in手續，柏豪急急腳入閘，與女友展開兩星期甜蜜假期，分分鐘回港有好消息公布。
Hea遊英法
已於上週五淩晨出發往巴黎的周柏豪和女友 Stephanie，將會逗留當地一星期，再坐歐洲之星到英國過農曆年。
其實早已到過巴黎和英國的二人，今次未有特別安排行程，故每日起身想去邊就去邊，雖然巴黎 Fashion Week啱啱完，不過愛作潮流打扮的柏豪和女友都應該會狂入貨，搵到錢兩份使。
同居 2年
柏豪和 Stephanie拍拖近 6年，雖然柏豪從無親口承認女友身份，不過二人恩愛到暈，柏豪有時間都會專登揸車到黃竹坑 I.T公司接女友收工，再一齊開車返將軍澳日出康城同居竇。閒時二人都會大方拍拖行街食飯，只係近年柏豪太忙，所以機會唔多。
今次柏豪拿到兩星期大假陪女友，感情實增進一大步。
|
鍾意就快D Share啦！
|
|
|
