秋生寸爆冇嘢撈 陳芷菁：放過小女子
演藝人協會（演協）前日選新會長時爆發內訌，有意角逐的黃秋生被秘書長陳芷菁拒諸門外而嬲到地示威後，昨日二人再度隔空開火，秋生寸芷菁「咁耐冇撈嘢」，質疑她的會員資格！芷菁則稱「請放過小女子」！一波未平一波又起，秋生昨日又被指有婚外情搭上內地女星魏璐，事後他透過公司發聲明否認。
有意角逐演協新會長的秋生前日拉大隊，到演協位於觀塘會址申請入會，但遭芷菁請食閉門羹！嬲爆的秋生於門外地洩憤。昨日又有新進展，二人爆發激烈「網戰」！芷菁昨早在微博強調去年12月20日已叫秋生及其班底搞入會，又指有電郵和文字紀錄做證。10分鐘後，她再在微博發功︰「黃秋生的戲，我一直都很喜歡看。他昨天在演協外扮暈同嘔，我看過片段後，亦覺得太可愛了！但請放過我小女子，沒有會長的日子我已撐得很辛苦。我只代會籍組要求表格，何必為難我們呢？」
「我已經被玩咗鑊喇！」
昨傍晚秋生在微博和Facebook分別寫上「請陳秘放棄我」和「被拒門外怎入會呢」反擊，及後他於電話中指不知演協於21日再開會︰「冇通知我，唔好搞我啦！我已經被玩咗鑊喇，搞到人哋以為我手上嘅會章偷番嚟！」其後他開名寸爆芷菁冇嘢撈︰「要審批藝人資格，我check佢就差唔多！佢咁耐冇撈嘢，我懷疑佢冇資格！依家離開會10日都唔夠，都唔知審唔審批到！我覺得唔好罔顧個會章。」
「你邊個呀？江青呀？」
秋生揚言可動議罷免芷菁職務︰「依家法律形同冇嘢，違反會章！先唔講入會，淨係入嚟借枱填form都唔得？過嚟乞米呀依家？仲係呢個人決定，唔會係個會。你邊個呀？江青呀？我唔覺得你側邊有毛澤東喎！」他繼續轟芷菁︰「佢叫我放過佢，我求佢哋放棄我啦！佢哋內部搞清楚先啦，嘥時間！好多朋友都話呢個係三煞位，果然係咁麻煩！講咩黑箱作業，我依家喺黑箱外，唔喺入面，佢知唔知咩係黑箱呀？講嘢冇邏輯！我哋個個睇志偉頭，畀面志偉，陳芷菁我幾乎都唔記得！」至於芷菁以短訊回覆︰「要講嘅講曬，公道自在人心，有問題可找會籍組梁珊。」
邵音音：成件事好賤
此外，演協名譽理事邵音音繼昨日繼續在微博狂轟有人搞事︰「以我理解，某人對付秋生，不讓他參選會長，因為他最有可能選上。這只是我的想法。」音音姐昨日於電話中未肯透露意指何人︰「我覺得成件事好賤，唔係針對人，志偉咩咗，三哥（苗僑偉）咩咗，依家都咩咗。（『咩』指支持芷菁？）我唔知。」她直言不會退會︰「每一個會都有惡人，唔通香港有壞人我就去非洲？個會最重要聚埋，為老人家謀福利。」
演協已定於本月21日再開會選會長及委員，據知其他會員認為是二人的意氣之爭，會內的資深會員被秋生的地行為嚇怕，反而支持溫和手段的芷菁。不過秋生向身邊人透露放棄開新組織的念頭，未必退選，認為要為公義而戰。
文︰專案組
|
鍾意就快D Share啦！
|
|
|
