熱爆娛樂: [FACE 347] 集郵女王　暗姣溝女王導演　低胸佘明益馬明馬明,BKD

2014年1月15日星期三

[FACE 347] 集郵女王　暗姣溝女王導演　低胸佘明益馬明馬明,BKD_S,馬國明,MF,

馬明與阿佘第一次演情侶，呢一幕講二人於河畔踩單車談情，阿佘來一招胸壓馬明，馬明當堂精神曬。

真面目

集郵女王　暗姣溝女王導演　低胸佘明益馬明

TVB劇集經常被彈冇新意，加上唔少一線小生花旦紛紛離巢到國內搵人仔，令節目更加冇睇頭。

難得今年賀歲檔， TVB終於有新花臣，豪花過千萬炮製《 A Time of Love愛情來的時候》愛情微電影，由多位小生花旦配搭日韓台星。故事分為 4個單元，其中由佘詩曼及馬國明孭飛的單元，上星期到新加坡取景，本刊直擊拍攝其間佘詩曼穿上多套吸睛低胸晚裝出現，除了姣掂 MV導演出身、同唔少女歌手傳過緋聞的導演李志倫（ Jacky）外，更向「筍盤」馬明狂發功，日日出雙入對。 38歲姣佘出馬，一直想嗒馬明的朱晨麗同朱千雪應該可以收工。

飾演女強人的阿佘唔知點解套套戲服都鬼咁性感，呢條紅裙， see-through黑紗下又見大大條事業線。

無綫投資千萬，找來多位小生花旦包括徐子珊、鍾嘉欣及王祖藍等配搭日韓台星參與演出的賀歲微電影《 A Time of Love愛情來的時候》，故事分為 4個單元，包含單元「悲」、「喜」、「都市」及「卡通」。而由回巢救亡的佘詩曼孭飛單元「都市」，上星期二便出發到新加坡取景。

千語阻林峯拍佘

姣佘今次的拍檔原本係林峯，但臨出發拍外景，突然換了由馬國明做男主角。據知林峯之所以臨時辭演，原來是因為女友吳千語呷醋，唔批准男友接近佘。知情者透露:「阿佘出名姣功了得，同佢合作親嘅男星幾乎一定同佢傳緋聞。 11年佢同林峯拍《花花世界花家姐》嗰陣就傳撻著。呢個圈咁細，其實再合作都唔係問題，問題係出埠拍外景，唔喺千語視線範圍，佢就有啲擔心囉，加上林峯同 TVB傾續約仍然未傾掂數，所以佢咪順理成章，勸男友推咗佢。」

7/1孖住落機

飛抵新加坡樟宜機場後，馬明同佘詩曼孖住落機，仲齊齊帶埋黑超，外形相當合襯。

週日啱啱返港嘅馬明，被記者問起阿佘頸椎移位傷勢進展，馬明諗都唔使諗即答：「佢已經好番，拍攝期間盡量遷就，佢只要有足夠休息就會好。」好了解阿佘喎。

進擊之姣佘

林峯臨時推戲，無綫於是找來聽話親生仔馬國明頂上。雖然要執林峯二攤，但仍未攞到視帝，仲要繼續努力的馬明其實開心都嚟唔切，於是一口答應演出。面對呢位 39歲筍盤， 38歲阿佘冇林峯都唔會失望。

這次阿佘飾演美艷上司，與飾演戇直青年的馬國明偶然撻著，而導演就是跟阿佘相識多年，經常孖住一齊蒲的 MV導演李志倫（ Jacky）。

週二出發拍外景時，馬明跟阿佘已孖住上機孖住落機。於新加坡拍攝期間，日日都著住低胸晚裝的阿佘，除了不時跟 Jacky黐埋研究劇本，更向馬明主動進擊，表現細心一面，埋位時幫馬明整理衣衫。見阿佘性感又體貼，馬明亦完全被佘溶化，幾乎每晚收工，二人都會黐實撐枱腳。

快樂時光過得特別快，週日淩晨大隊已完成拍攝飛返香港，而早上才落機的馬明，於當日下午即出席商場活動吸金，馬明接受訪問時亦繼續讚佘，「我估（雜誌）標題會係『佘詩曼嫌馬國明唔夠班，唔肯同枱食飯！』，阿佘就估『姣佘溝馬明』。阿佘演技好，我已經自薦要同佢繼續合作拍劇。」

其實二人都係一線小生花旦，最重要係二人都係單身，如果真係成功撻著，實成為 2014娛圈最矚目情侶。

服侍馬明

大隊入住聖淘沙五星級酒店，第一日早上到埗後，晚上二人就於聖淘沙名勝世界內一西裝店拍外景，埋位前姣佘見馬明條呔歪咗，即主動幫對方整理。被女神貼身服侍的馬明再現「天然呆」，宅男上身。

埋位前應工作人員要求影合照，馬明同阿佘其實都幾登對。

撐枱腳

收工後二人孖住去食飯，阿佘先搵張靚枱坐低，馬明隨即坐佘隔籬。發現記者影相後，二人即轉入 VIP房繼續食。

MV導演多女黐

97年入行的 Jacky（李志倫），屬行內有名的 MV導演，早年有 MV界餘文樂之稱。李克勤、陳慧琳和吳雨霏等常搵 Jacky執導，而 Jacky的收費亦於行內出名貴。有錢靚仔，又曾與衞蘭、方皓玟及林欣彤傳緋聞。

今次無綫想加入新元素，所以重金找 Jacky導演《 A Time of Love愛情來的時候》愛情微電影內其中一單元。