2014年1月15日 星期三

[FACE 347] 錢國偉憶六叔:嗰時 TVB有人情味! 六叔,錢國偉,TVB,邵逸夫,MF,




禦用茶僮

錢國偉要招呼老闆,先問咗佢哋鍾意飲乜就會用紙筆記低,下次唔使再問, Wilson又盛讚六叔畀好大空間同事做創作,同事可以自由發揮。

搜尋氣

錢國偉憶六叔:嗰時 TVB有人情味!

一代電視巨人邵逸夫上週二( 7日)清晨離世,享年 107歲。偉人身邊多軼事,原來《喜愛夜蒲》系列肥導演錢國偉( Wilson),當年喺無綫由辦公室助理做起,專門幫邵逸夫同一班高層斟茶遞水。六叔鍾意中國茶,老闆鍾意飲咩食咩,佢統統記得。

47歲錢國偉懷念六叔,亦懷念六叔年代嘅 TVB較有人情味。由阿四做到監製,錢國偉話:「擦得掂老細,又做到嘢,你咪叻囉!」

其他影片
  • 肥監製念六叔-錢國偉講星爺:比佢當沙包踢!

我入電視台做係為咗睇明星咋,當年考完會考見無綫請 office assistant咪申請囉,呢個係油水位嚟,好多人吼住,坐喺大班房服侍班老細!除咗六叔,其他無綫高層都要招呼,劉天賜話我知要招呼六叔飲奶茶同負責落糖,其實六叔鍾意飲中國茶,都唔使落糖,佢啲茶葉梗係靚啦,但我都唔知邊度嚟。

之後做咗監製,六叔每年嘅新年賀詞都係我拍,佢次次見親我都問我:「肥仔幾多磅?」我話 210啦,佢話:「好呀,肥好呀!」六叔真係慈祥老人家。

我做咗年幾 office assistant,之後轉職去兒童組做《 430穿梭機》助理編導,當年主持有梁朝偉、周星馳、鄭伊健,記得嗰時星爺學自由搏擊,次次返嚟都搵我做沙包,勾拳、 side kick、 turning kick,我全部受曬。我又冇咩所謂喎,做細嘅,最緊要唔好怕蝕底,唔好問幾點收工,老細自然畀機會。個個收曬工,我仲去隔籬廠睇拍戲。有冇人話我係擦鞋仔?其實每個年代都有㗎啦,但要擦到老細冧,而你又真係做到嘢嘅,咪叻囉,你估易㗎,係一門好高深嘅學問嚟㗎!

有人話六叔年代廣播道有人情味啲,其實都係㗎,但係啲人話方小姐(六嬸方逸華)好孤寒,我又唔覺喎,佢同陳志雲當年都好信任我,叫我放心去搞創作。

六叔上週二清晨離世,上週五由長孫邵在強捧住六叔遺照到達火葬場。《蘋果日報》圖片

六叔每年的新年賀詞短片都由錢國偉製作,錢國偉話次次六叔見到佢都會問佢幾磅,喺錢國偉眼中,六叔係一位慈祥長者!

錢國偉喺無綫捱咗 27年, 10年離開無綫,近年開拍的《喜愛夜蒲》系列最近已拍到第三集,首週片房都有近 400萬。



鍾意就快D Share啦!
Related Posts Plugin for WordPress, Blogger...