[FACE 347] 劉楊婚禮獨家變通天 劉楊婚禮,劉愷威,楊冪,MF,

上週三（ 8日），劉愷威正式在峇里島迎娶內地花旦楊幕，短短 40分鐘儀式，勞施動眾豪使千五萬。話時話，新郎新娘對下巴真係好襯囉！

FBI

劉楊婚禮獨家變通天

一過元旦娛樂圈就迎來 2014年第一樁喜事， 39歲劉愷威同 27歲強國花旦楊冪拍拖 2年，上週三（ 8日）喺印尼峇里島舉行婚禮，仲盛傳雙喜臨門添，呢啲咪叫快狠準囉！

FBI收到風，雖然一早北上發展，新郎哥劉愷威今次算念舊，特登留番獨家採訪機會畀香港某報紙。不過你估劉愷威仲係當年嘅電視大茄咩？新娘仲要係內地名旦，結婚咁大件事又點會得一間報館飛去採訪？結果你有你想獨家，內地香港傳媒幾乎間間都派員飛去印尼直擊。大批傳媒去到唔畀人採訪，係咪想從此人間蒸發唱衰你 9年先？所以最後決定靜靜哋嘅婚禮，最後就被鋪天蓋地報道。

話時話，一結完婚坊間就傳出劉愷威大婚千五萬使費賬單，戒指婚紗花費 1,000萬、 30張賓客商務客位機票 200萬、兩晚蜜月別墅 130萬……咁豪，如果淨係畀一間報館報道，又邊有得威呢？

婚前被伴娘兼女星唐嫣發背照配上感言「幸福的背影」、婚禮誓詞新娘就文藝宣言「毫無保留愛你」，一齊睇煙花你話幾 sweet！

楊冪有孕一事新家翁丹爺次次被問到都四萬咁口被指默認，其實娶新抱、飲新抱茶丹爺去到邊都四萬咁口，唔等於默認抱孫嘅。

鍾意就快D Share啦！

下一篇 》