面對面
給我一個讚 鄭融
話說在網上搜尋資料，瀏覽到一向以刻薄見稱的網絡大典，儘管鄭融的食煙黑面講粗口事跡一單不漏，甚至人身攻擊被恥笑像菲傭，有一點，倒實事求是：「一般網民對鄭融的歌藝水準並無疑問。」所以話，網民也不只是烏合之眾和鍵盤殺手，也懂得欣賞別人好處，值得一個讚。
話說負面新聞一直被抽秤多年、身材矮小人長得黑最近又被改圖恥笑做「鄭傭」、性格竹昇出曬名直腸直肚得罪人多，鄭融這一天竟要多謝廣大市民網友：「我做咗咁多細路仔嘢，今時今日都可以出碟開演唱會、仲可以喺呢行生存到，所以我話，香港觀眾其實唔係咁刻薄，其實接受能力同包容程度都好高……」剛被人身攻擊竟然感恩和不記仇，亦值得一個讚。
出道十年、今年 29歲，鄭融剛剛舉行了入行以來的首場個人演唱會《 LiveLike18》、剛剛憑歌曲〈非凡人生〉打入《叱吒》十大和最喜愛歌曲五強。大家都說，對於 hit歌不少的鄭融來說，這個演唱會來得有些遲，鄭融卻說，時機剛剛好：「我係呢兩年先至學識感恩、感恩我嘅幸運、感激我嘅歌運、感謝人們嘅包容。當做一場演場會，為嘅係回饋而唔係榮耀，一啲都唔會覺得遲。」
攻擊插爆需要長篇大論，點讚其實很簡單，只要動一下拇指，今天的主題，是放下負能量和偏見，學會欣賞自己欣賞別人，學會「讚」。
我抵讚
上一次和鄭融做訪問是十年前，十年不見，我的鄭融印象全靠新聞報道和網絡截圖，大多都是食煙講粗口和藐嘴藐舌黑口黑面。這一天，見到久違了的鄭融，我才想起來，她十年前就是這樣，直腸直肚、嘻嘻哈哈。當面對面時，我感到的是誠意和投入，但是站在旁觀者的角度，就只會看到她表情誇張戚眉弄眼。你看一個人，黑面又臭寸，又是站在哪個角度？
我成日都出事，張張相都黑口黑面好似發緊脾氣，我諗，出事在少年不更事，性格太隨意。我份人好隨意、又比人遲熟，成日都覺得做人計咁多做乜？唔係隨意啲輕鬆啲，做人容易啲、易開心啲咩？喺呢行做，又成日聽到人話呢個好假、嗰個係八婆。一度，我好孩子氣咁諗，扮得咁辛苦做乜喎？再面面俱圓都總要做得唔好嘅時候、都總有露出真面目嘅一刻，咁不如做自己仲好，總好過啲人笑口噬噬背後俾人話笑裏藏刀、惡毒心腸。
入行十年，我出曬名俾人話黑面、一揭開報紙雜誌就俾人影到黑面，我算係好遲鈍，最近呢幾年至意識到，人哋點睇我、呢幾年我唔覺唔覺得罪幾多人。其實我從來唔對人發脾氣，有時嬲起上嚟淨係會嬲自己；其實好多時我唔滿意唔會話人知，過咗去就唔記得咗。前排我至知，原來我啲表情擺曬上面引人誤會，前幾日我至知，原來三年前拍 MV，個導演以為我嬲佢嬲到𠵱家……
一入行我就遇到間好嘅經理人公司、一唱歌我就遇到唔少好歌，今年仲開埋演唱會、第一次打入《叱吒》歌曲五強。最近，我發覺自己唔係淨係要咁樣，我需要多啲人對我嘅人、而唔係淨係歌有肯定。開工怕準備不足做得唔夠好，咪前一日執定五對鞋帶去開工囉！萬無一失個人就擔保會寬容唔會黑面；去到公開場合，我會特登捉住啲熟人傾偈，有個人對住，我咪唔會太鬆懈俾人影到黑面囉！都係做自己、都係忠於自己，有呢個改變我唔係想做一個樣出嚟討人歡心，而係我想尊重自己同自己嘅職業，我想做一個更好嘅自己。
我出走
十年前見鄭融那次，現場其實還有薛凱琪，兩人同年出道、那次出現在同一份樂壇新人介紹稿中、至今兩人還是閨蜜。十年間，經歷過父親破產雙親離異還患上情緒病，薛凱琪成熟老練得多，鄭融卻還在少不更事摸索中，成長速度，當然與個人經歷息息相關。
我諗我太遲熟係因為我太幸福。我係屋企獨女，由細就讀國際學校、出世屋企就有工人姐姐幫媽咪湊、想去邊度玩想學啲乜，爹哋媽咪無限量支持永遠唔使擔心。十七歲陪朋友去讀形象課程，咁就遇到經理人公司 Starz People，俾佢哋當係屋企個妹一樣湊到𠵱家。十幾歲就入行，但係我其實到廿幾歲都冇接觸過社會、冇行出去過屋企同公司，我從來唔知原來好多人冇得食、好多同齡人要做暑期工同兼職幫補、唔知原來國際學校嘅學費唔係平，唔知呢個世界發生緊咩事……
三年前我開始搬出嚟自己住，又轉咗唱片公司（星娛樂），老闆轉完又轉、同事換完又換，真正係我遇到第一個人生低潮。我開始要自己負責交水電煤單、明白原來唔交會俾人 cut電，開始醒覺原來屋企傢俬電器用用嚇係會壞，要自己搵人整，唔係大大聲嗌媽咪同工人搞掂就得。返唱片公司、不停換合作對象，我開始經歷原來唔係去到邊都似屋企一樣自由自在，有人睇住有人照顧，原來我都要學識喺辦公室生存、學識嗰套溝通方法……
遲過人，但點都好過一世唔面對，唔嘗試獨立，我唔知自己原來未試過靠自己、唔知自己其實溝通能力真係差、講嘢好唔叻。本來係一個井底之蛙，淨係見到自己不足、淨係捉自己錯處，三年前我開始搬出嚟住、開始唔坐保母車，學嚇去搭巴士去搭馬鐵，我先至發覺出邊個世界好大、呢個社會發生緊嘅事唔係離我好遠、原來市區真係多咗好多大陸人……哈哈……
當眼界放大，真係可以對一個人改變好多，與其成日鑽牛角尖、捉自己錯處，不如睇嚇自己擁有幾多嘢好過。當我識感恩嘅時候，唱歌、做人同工作嘅視野變得完全唔同。所以我話呢次演唱會、呢次攞獎，對我意義好唔同，因為我唔係為咗自己去做，我係想用呢個表演同個獎，去回饋每一個愛錫我、包容我、對我有期待嘅人。
我易湊
工作和做人處事，鄭融說自己不計算、不記仇最抵讚。我問她做女朋友，又有甚麼值得讚，她傻笑著給我一個很傻氣的答案：「我好易湊囉！」與劉浩龍拍過四年拖、與監製莊冬昕試過共賦同居、現在與同齡老外舊同學拍拖三年，上月的演唱會卻難得新舊男友都來捧場、莊冬昕身兼演唱會音樂總監。再一次證明，鄭融是個好女友，並不是大多數網民心目中的港女人辦。
我係一個好識遷就人嘅女朋友，男朋友舊年開始被公司調咗去大陸長駐，我哋一樣好穩定。我唔係嗰種佗手 lung腳嘅女朋友、從來唔會 check佢行蹤迫佢交人，我阿媽都話我， BB嗰陣已經好易湊，我諗做女朋友都係一樣，係易湊嗰種。
我仲有一個優點，係夠阿 Q精神。被人飛、被人呃、分手再慘，我都唔會覺得絕望，話畀自己聽，今次唔得咪下次做好啲囉、今次信錯人咪下次醒目啲囉。同工作一樣，衰咗唔好停，迫自己向前行。根本想停都冇得停，呢個世界唔會為你一個人停止轉動。我可能轉數慢、可能做人唔夠面面俱圓，但係我都蠢唔曬㗎，同一個錯誤我唔會犯第二次、信錯一個人下一次就唔會再俾佢呃，呢樣都係一個優點啩？
|
鍾意就快D Share啦！
|
|
|
