[FACE 345] 叱咤追貼 Eason 柏豪 MV抄橋「最好上埋 C1添！」 柏豪,陳奕迅,Eason,周柏豪,MF,

受華納力捧，周柏豪喺新歌〈同行〉 MV中，就動用全公司歌手，好似連詩雅及官恩娜等，連公司高層 Gordon Lee亦出埋鏡撐場，有公司錫住，柏豪一早就係華納一哥。

FBI

叱吒追貼 Eason　柏豪 MV抄橋「最好上埋 C1添！」

年尾都係樂壇派發成績表時候，雖然個個都睇好陳奕迅成為大贏家，查實同商台關係勁好嘅周柏豪亦來勢洶洶。 FBI收到風，元旦叱吒樂壇頒獎典禮， Eason將擸硬「叱吒樂壇男歌手」金獎，而柏豪就坐亞望冠咁話。

升呢同 Eason爭獎，見勢好，柏豪 2014一於去到盡，除 book定期 9月踩入紅館開騷外，最近仲拍定新歌〈同行〉 MV造勢，今次柏豪除咗搵埋同門靚女官恩娜、連詩雅客串，仲總動員唱片公司華納高層、私人化妝師、甚至華納員工一齊出鏡，碌盡人情咭。不過睇真啲，呢個「友情相關照」嘅 idea同 Eason 8年前嘅〈葡萄成熟時〉好鬼似喎。

涉嫌抄橋，嗰個仲要係叱吒前輩 Eason， FBI當然問清楚柏豪，佢話冇有怕：「唔驚，我已經去到一個百毒不侵嘅地步，最好上埋 C1添。」提到越級同 Eason爭做樂壇一哥，柏豪更費事理：「無論好嘢或者衰嘢都會被人話，所以攞親獎，我都預咗畀人講㗎啦……。」講呢啲，其實最怕係冇人講啫！

〈葡萄成熟時〉 MV中， Eason就搵埋佢嘅化妝師同形象師等亮相，一早已經搬埋班 friend上枱曬人緣；唯一唔同係 Eason嘅 MV一個一個嚟，而柏豪就一堆堆上鏡。

碌盡友情咭，除咗公司歌手及員工外，仲出動埋柏豪嘅化妝師及髮型師等共 28人出鏡，認真大陣仗。

拍攝期間，每完成一個場口，柏豪同一班 friend都會睇番 playback，其他朋友就笑曬口，但只有柏豪乸埋口面，好專心研究點樣先拍得最好效果。

父母唔出鏡

除咗友情，柏豪更動用埋親情。拍攝當日，柏豪父母專程到場為乖仔打氣，可惜周生周太冇出鏡。

MV中，柏豪抱起同事個囝囝玩人肉韆鞦不斷 fing， 29歲仲有童真。

柏豪曾經幫連詩雅作咗首〈到此為止〉紅爆 YouTube同 K場，今次柏豪拍 MV，連詩雅當然要出鏡報答師兄。休息期間，連詩雅狂擦醫肚。

鍾意就快D Share啦！

下一篇 》