扮北姑的王菀之，戲裏面夠癲夠放，除咗裝咗假哨牙，仲疑似裝假狗。
真面目
有市場 搶千嬅大笑姑婆位 王菀之賣醜：天生係笑話！
10年，王菀之因失聲推拍《志明與春嬌》，頂替的楊千嬅拍埋續集兼做埋影後。
失咗《春嬌》贏番《老表》，終於王菀之憑惹笑演技令吳君如點名拍《金雞 SSS》，做北姑兼要哨牙醜化都冇問題，搏！
唔怪得彭浩翔再翻兜搵王菀之開戲，不過，都係離唔開個醜字，做醜婆上位，王菀之笑住咁話︰「我天生就係笑話！」
14年 34歲王菀之必爆，農曆新年先上《金雞 SSS》， 5月開演唱會，之後再拍《老表》續集，仲有幾個劇本在手，據聞落實有彭浩翔和王晶。
床戰鄭中基
《老表》捧紅一眾諧星，細細粒、陳明恩長做長有，放低歌手包袱飾演晴晴的王菀之，先被君如點名接棒做金雞。首次拍電影，王菀之由客串變主角，戲分愈加愈多，造型亦愈變愈醜，仲有一場與鄭中基的床上戲，王菀之要叫到鬼鍊咁聲，她說︰「我只可以講，今次係最性感、最激嘅一次。」
《金雞 SSS》之後，據知王菀之已為另一套電影秘密開工，升呢做女主角，仲會夥拍鄭伊健；而今年已落實的還有兩套，包括彭浩翔和王晶的新戲，兩片都是搞笑喜劇，王菀之說︰「的確係有幾套劇本，但公司傾緊唔講得住。」
有傳推拍《志明與春嬌》，是因為戲中有大量吸煙和粗口戲分，但王菀之否認，但若然當日王菀之演春嬌，又可有千嬅煲煙煲得咁自然呢？
「唔會 set定底線」
3年前，王菀之本來接拍《志明與春嬌》，但當時突然失聲，所有工作都要推掉醫聲帶，事後王菀之表示無悔推拍，因為聲帶對她來說很重要。
結果，楊千嬅因《志明與春嬌》續集《春嬌與志明》獲得金像獎影後；今年彭浩翔翻兜王菀之，新片繼續搞笑、繼續被醜化，王菀之就好大方賣醜︰「我天生就係笑話，無所謂、唔介意，我以前講過就算他日接拍第一部電影，都唔會 set定底線。」
何韻詩殺出爭獎
今年商台《叱吒頒獎禮》可算是大執位，除了男、女歌手金獎陳奕迅和容祖兒外，「叱吒十大」都有驚喜，兩位《巨聲》幫許廷鏗和馮允謙入圍。而「我最喜愛男、女歌手」，去年憑〈留白〉掃獎的王菀之竟五強不入，原本不出席的何韻詩又殺入五強，據知何詩將會現身頒獎禮，祖兒年年出聲恨拎「我最喜愛」，阿詩似乎唔讓路喎！
叱吒樂壇我最喜愛女歌手五強
吳雨霏、何韻詩、容祖兒、楊千嬅、薛凱琪
|
鍾意就快D Share啦！
|
|
|
