掃呢頁CODE去手機

2014年1月8日 星期三

[FACE 346] 焗攞獎保巡迴米路 陳奕迅後台仲癲:“唔知自己做乜” 陳奕迅,MF,




《叱吒》慶功, Eason接受記者訪問時繼續 hea答,由開騷到完場全程黑面,認真有性格!

封面

焗攞獎保巡迴米路 陳奕迅後台仲癲:“唔知自己做乜”

39歲陳奕迅近年專注做巡迴演唱,早前難得在港連續出席梅艷芳紀念騷同《叱吒頒獎禮》,點知竟然連番失準,黑面甩嘴 hea唱發台瘟,被網友喪插影衰香港樂壇。

歌神變瘟神,除了因為要供車供樓壓力大,最主要原因係同經理人陳家瑛為頒獎禮問題炒大鑊。據知唔想降呢同周柏豪、許廷鏗爭獎的 Eason最初拒絕蒲頭,但陳家瑛卻以取消所有巡唱威迫 Eason出席!焗上台攞獎, Eason專登玩嘢 hea唱大報復,在後台仲崩潰向人透露:「唔知自己𠵱家喺度做乜?」

被威脅條氣唔順, Eason最終決定玩嘢,結果咪又係搞到自己囉!

面新聞輪住埋身的陳奕迅,被指除夕當晚同老婆徐濠縈炒大鑊各有各閃, 1月 1日出席《叱吒頒獎禮》時又全程黑口黑面,雖然狂擸 5個獎,不過表現毫不興奮,上台唱〈遠在咫尺〉時竟然拎出手機睇歌詞,攞「至尊歌曲大獎」唱〈任我行〉嚴重走音甩嘴,連佢自己唱完都擰擰頭話「當之有愧, sorry!」

Eason多次上台領獎都逐一多謝身邊人,由染髮師到老婆徐濠縈,惟獨冇提過合作多年的陳家瑛,擺明唔妥對方。

Eason同陳家瑛本來合作無間,但近年 Eason接得太多巡迴騷搞到體力透支兼有情緒病,搞到兩人經常因接 job問題炒大鑊。

《蘋果日報》圖片

攞 5個獎都唔高興,「黑面臣」仲寸到戴超上台,真係幾唔尊重喎!

威脅 cut巡唱

連番失手被批評唔專業, Eason在慶功宴解釋心情唔靚,「我覺得 1月 1號唔需要特別開心,冇呢啲感覺!」

吹神冇 mood,全因開騷前同合作多年的經理人陳家瑛嘈交。據知 Eason不滿今年男歌手五強冇古巨基、李克勤等同級歌手,要與二線周柏豪、許廷鏗爭獎,本想打算缺席《叱吒》。「阿臣(陳奕迅)好唔想去,但 Katie(陳家瑛)企硬,因為大陸傾演唱會贊助商好睇重呢啲男歌手銜頭。大家嘈咗好耐都唔肯讓步,搞到阿臣發爛渣話會上台宣布以後唔攞獎!點知 Katie大番佢轉頭,講明如果佢玩嘢,會即刻 cut曬 2014所有巡唱,齊齊冇錢搵一拍兩散!」

嬲爆「降呢」

個個當獎項係寶,偏偏 Eason唔志在,當玩具咁拋來拋去,卒之跌崩咗!

不滿競爭對手降呢, Eason慶功時仍肯與銅獎許廷鏗(左)、銀獎周柏豪(右)合照。

週日( 5日), Eason出席簽唱會,即使有小朋友扮佢都唔肯笑,直至最尾同粉絲握手先有番笑容。

Hea玩 3場走音

台灣《蘋果日報》圖片

28/12高雄個唱

台灣高雄站, Eason突然玩嘢,走曬音唱〈單車〉,又預告會喺《叱吒》同樣玩嘢唱〈任我行〉,雖然現場有死忠粉絲讚佢搞笑,但事後唔少人喺網上鬧佢唔專業。

《蘋果日報》圖片

30/12梅艷芳騷

出席梅艷芳紀念騷, Eason唱〈胭脂扣〉唱到 flat曬,毫無感情,拍落學友、林子祥等直頭差幾班!

1/1叱吒

唱〈遠在咫尺〉要用手機睇歌詞、唱〈任我行〉更實踐高雄站「承諾」走曬音,衰過平時唱 K!

甘菁菁接棒湊

Eason喺《叱吒》慶功同商台助理總經理甘菁菁(小圖)密密斟。據知本週一( 6日)離職的甘,將會加入陳家瑛團隊,主力湊 Eason,等陳家瑛可以安心退下火線。週一甘菁菁就否認:「唔會,我會離開香港一段時間喎!」而陳家瑛則至截稿時仍未回覆。

除夕當晚,阿徐同 Eason去中環出席倒數 party,不過 Eason在場內就黑口黑面,兩公婆分頭玩,阿徐與 Yumiko、何嘉莉等狂歡,走時兩公婆亦分頭閃。

Party前,兩公婆仲有講有笑,仲識自拍擺上微博。

網上圖片

接康堤電話崩潰

慶功蒲天光湊女返學

據知《叱吒》慶功至淩晨 3時, Eason亦趕下場到叱吒作詞人得主陳詠謙的私 P,至天光才返家湊 9歲愛女康堤返學,爭取父女相處時間。

《忽然 1周》圖片

要養家又要供樓,手停口停的 Eason焗住聽話出席,不過就 chok住道氣,專登黑面甩嘴走音,擺姿態以示不滿。

嬲足 3個幾鐘, Eason慶功繼續玩嘢,大合照時忽然將個獎拋上拋落,其間甩手接唔住跌崩獎座,睇到許志安梁漢文眼都凸埋!「慶功嗰陣好多人走埋去問阿臣有冇事,佢突然好感觸話開騷時收到個女打電話嚟,問佢今晚幾點返屋企,點解咁夜仲唔返?佢覺得自己呢幾年唔同曬,想留多啲時間陪個女;後尾愈講愈激動,聲震震話『聽到個女咁講,搞到連我自己都唔知𠵱家喺度做乜?』,講到眼都紅埋!」知情人士透露。

壓力爆煲

其實近年 Eason飛勻全球做巡唱,冇得休息,身體開始頂唔順之餘,情緒亦出現問題。去年 7月香港站, Eason突然自爆患上躁鬱症,又失控鬧觀眾唔企起身跳舞:「原來跛咗!」舉行《叱吒》前的高雄站, Eason更無厘頭用走音腔玩唱〈單車〉,有粉絲睇完都嗌回水。

健康出問題,加上 Eason係家中經濟支柱,除了「供養」老婆老豆、最近又豪擲 2.3億買南區獨立屋,未計日常開支同女兒康堤的教育費,每月淨係供樓已經相當吃力。壓力接近爆煲,如果 Eason唔好好放假休息醫病,睇怕「 K歌之王」有排都回復唔到水準!

神的煩惱

《蘋果日報》圖片

供豪宅

Eason為咗老婆同囡囡愈住愈豪,早前買入 2億幾獨立屋,每月供樓最少六十幾萬!

做唔停

密密做冇停手, Eason出席完香港的頒獎禮後,又要開始新一輪巡迴,最新法國巴黎站亦已開始賣飛。

《蘋果日報》圖片

捱出病

冇時間休息, Eason近年開始捱殘,先後試過聲帶生繭,又撕裂韌帶要坐輪椅。



鍾意就快D Share啦!