上週四（ 2日）， Niki回應說：「冇能力做親生女！」同無綫劃清界線，搵錢多咗，笑都笑得特別開心。
真面目
霸唔到 封殺壹傳媒阻搵食 Niki拒簽 TVB「冇能力做親生女」
無綫霸權非一朝一夕，去年 11月仲誇張到宣布封殺整個壹傳媒集團。傳媒封殺傳媒，一班當紅小生花旦首當其衝，曝光率急降，間接影響搵真銀。據知 TVB封殺行動，令旗下親生仔女楊怡、林峯等對續約一事採拖字訣，靜觀其變。
受影響藝人又點只咁少，當中包括 11年回巢拍劇嘅周麗淇（ Niki），早前傳出將改簽經理人約給 TVB，據知封殺令一出，有不少客戶都誤將 Niki當親生女，因擔心見報範圍少而不敢用，搞到 Niki經理人 Marianne急急向客戶澄清。為免阻住財路， Niki與 TVB劃清界線，她對本刊好灑脫地說：「冇能力做親生女！」阻人發達，猶如殺人父母嘛！
早前台慶頒獎禮期間，傳出 Niki以約換獎傳聞，有指會賣身無綫 5年簽做親生女，仲會同前度男友鄭嘉穎合作拍王心慰新劇，但實情 Niki一直未有應承，加上受到 TVB封殺壹傳媒行動，影響見報和客戶信心，據知只餘下 2套劇部頭約的她，一於拒簽親生女。
只欠兩套劇
其實做得無綫親生仔女，當然最想出活動賺大錢，不過呢支歌仔自 11月無綫宣布封殺壹傳媒集團後冇咁易唱。 Niki也針㓤到肉。「之前傳得咁行話 Niki會改簽 TVB親生女，出面啲客都以為係真，仲問 Marianne係咪，如果係就費事搵 Niki，驚會影響個 event少 coverage！ LV開幕嗰日， Niki都冇乜相出到，搞到 Marianne同大嶽（林建嶽旗下 Niki經理人公司）嗰邊要周圍同番啲客講！」知情者說。
Niki現時和無綫只餘下 2套劇集部頭，上年已拍下《女警愛作戰》和《好心作怪》，至今仍未定幾時會拍新劇。「 Niki幫 TVB拍劇，無非都係為咗 keep住曝光，有多啲客搵賺真銀咋嘛！再講，之前 TVB話冇人撐視帝視後頒獎，猛咁叫 Niki去，話會畀佢坐第一行， Niki冇獎都坐足成晚啦，豪凸畀佢哋啦！」知情者說。
「義氣仔女做到就做」
本刊致電 Marianne，她急急劃清界線，「 Niki嘅經理人約係同大嶽娛樂簽，仲有一段時間先完，至於同 TVB嘅合作，一直關係冇變。（係咪有客戶話如果 Niki係 TVB親生女就唔用佢？）的確係有客詢問過！咁 Niki唔係親生女，所以可以用囉。」而 Niki回應拒簽 TVB經理人一事，她就話：「唉，我冇能力做親生女，義氣仔女做到就做，幫到就幫！（同無綫關係？）我哋關係一直好好！（幾時開新劇？）未知住，遲啲先算！」
除夕上海 sweet爆
34歲周麗淇在橫店拍攝《大漢賢後衞子夫》時，因為高溫而曾經 2度中暑，其間內地小生徐正曦對她照顧有加，又撥扇又準備凍飲幫助降溫，兩人終於成功撻著。感情蜜月期，在大時大節的除夕夜， Niki亦到上海傍實男友，共渡 1314。
|
鍾意就快D Share啦！
|
|
|
