Beauty Hunt
氣質女流 李泳淇
靚女有時目標好簡單，應屆珠寶小姐冠軍、 22歲嘅李泳淇(Rain Lee)，比第 1代 Rain李彩華細 8年，以為佢想借選美入行，原來只係貪有免費教行 catwalk課程。最近有機會同筍盤馬明合作拍廣告，以為佢會好冧，點知佢話：「我覺得古天樂吸引啲！」
冇諗過拍電影，嫌拍戲時間長，但失驚無神又有機會拍電影《掃毒》同《 Delete愛人》。拍拍嚇竟然上咗癮， Rain最想似周迅賣氣質做影後。好多嘢，真係要慢慢講緣分嘅！
22歲李泳淇為今年珠寶小姐冠軍，理大酒店管理副學士畢業的她，原來當日參選，只為一個簡單理由。她說：「我想學行 catwalk，我知呢次比賽好認真，有人教化妝、儀態、行天橋，所以我咪試嚇囉。」無心插柳成為冠軍，正如當年 18歲的她，因為會考後冇嘢做，結果參加商台舉辦的《十人巷》。她一早講明會繼續升學，唔會做 DJ，所以當年搞手陳志雲同森美都冇畀太多意見佢，她卻因此認識了同為參賽者，後來得冠軍的大面 Bella林穎彤。她說：「我哋𠵱家仲有出嚟食飯。」
有幾多周秀娜？
一直鬥心唔算強，不過 Rain除咗做 model外，最近亦有機會拍電影，仲打孖上有《掃毒》和《 Delete愛人》。戲分少，初時李泳淇仲覺得浪費時間。她說：「做 model幾個鐘，就可以收工，係快錢，但拍電影要好耐先收得工，初時真係冇興趣，但慢慢覺得原來係咁得意，我𠵱家希望可以有多啲做戲機會。」
原先 Rain有機會喺《逃出生天》中飾演古天樂女友，可惜到最後換咗唐詩詠，她說：「唔緊要啦，我明白公司，第時實有機會。」開始找到方向嘅 Rain，亦明白騷「事業線」快上位，但絕不賣弄性感的她說：「行性感可能有人會識囉，但一陣就冇用㗎，有幾多個周秀娜、舒淇？我希望自己可以好似周迅咁就好喇，佢以前都係 model，但𠵱家係影後。」
|
鍾意就快D Share啦！
|
|
|