笑曬多謝
簽好約，黃紫盈離開咖啡室時不停笑曬口，對住總監及幾位有線員工鞠躬多謝。
娛樂喧
威過宿敵張文采 黃紫盈高價簽有線
去年中，前無綫新聞主播黃紫盈，鏡頭前忽然眼紅紅落淚，爆出她與另一新聞小花張文采積怨甚深，有指她遭對方長期欺壓。最終，黃紫盈去年 11月遞信唔撈，而張文采繼續留守無綫呼風喚雨。
敗走的黃紫盈雖然冇大台護蔭，但塞翁失馬，焉知非福。
據知她已秘密簽約有線，以 3萬蚊高價做 4集美食節目主持。 1月 25日，記者便拍得她與節目監製簽約。魚唔過塘唔會肥，的確幾時都啱。
前無綫新聞主播黃紫盈，去年在直播時喊住報新聞，實在有違專業操守，但卻賺了人氣，登上 C1頭條。加上及後爆出她遭另一充滿野心的新聞主播張文采杯葛，喚起觀眾對她的同情心。因此黃紫盈離開大台後一直不愁出路，騷價 5萬蚊，直逼一線花旦。
錫身拒性感
據知王維基的港視和有線去年底分別力邀黃紫盈加入新聞部。知情人士說：「兩個台開出嘅條件都好好，除咗底薪同出鏡費比大台高一倍外，又保證佢可以上位做主播一姐。不過紫盈話做主播要維持專業形象，實在太多限制，阻住佢搵外快，於是推咗兩個台嘅好意。」
今年 26歲、畢業於中文大學新聞及傳播學系的黃紫盈，疊埋心水做藝人。有線為想將她羅致旗下，決定搵她做娛樂台的節目主持。黃紫盈上位，理應爽快答應，偏偏她並非順得人。知情人士說：「有線嚟緊有個飲食節目《為食情報局》，諗住搵紫盈擔任其中一個環節主持，要求佢著得性感啲，約啲男嘉賓出嚟飯局。但佢一聽到要性感就耍手擰頭。之後有線再遊說佢負責介紹餐廳，要做埋資料搜集，但佢又嫌煩唔制。最後佢只係肯做幾集嘉賓主持，跟稿讀出下鏡，唔肯同有線簽長約。」
時薪千二蚊筍工
黃紫盈只肯做散工，但在主持人才缺乏情況下，有線只好就範。雙方還價多次後終於達成協議，有線以 3萬蚊做四集節目主持作條件，成功利誘黃紫盈。據知黃每集只要在錄影廠錄六個鐘就收工，以一集七千五百蚊計，平均時薪千二蚊，比起當年她在無綫一星期返足五日半，上鏡之餘還要準備其他新聞特備節目，月薪只得萬六蚊的酬勞絕對幾級跳。
搵到超級筍工，難怪早前黃紫盈與該節目監製霍澤基在觀塘簽約時，黃全程四萬咁口。對於高價簽有線一事，她說：「酬勞唔講喇， OK啦，開心咪得囉！以前我嗰行淨係做時事，依家多咗娛樂商業工作，真係學咗好多新嘢。（當年同無綫不歡而散，依家係咪爭番啖氣？）唔……唔……做人應該係飲水思源嘅，我都多謝 TVB嘅栽培嘅！」
至於宿敵張文采，雖然成功去除黃紫盈這個眼中釘，穩守無綫主播之位，不過講到工作機會，似乎真的唔及對方。睇見眼中釘比自己上位快，張文采唔知有冇揼心呢？
主播撈過界
做無綫主播雖然可以頻頻出鏡，爭取不少觀眾緣，但風光背後，其實工作壓力頗重，除了 keep住上鏡狀態，還要應付不少幕後工作，而且薪酬普通，一般新入職起薪點只有萬二蚊，出鏡費每次只得五百蚊。難怪多年來，不少主播也陸續轉行搵食。
趙海珠 轉搞地產
今年 32歲、屬科技大學工商管理碩士的趙海珠， 04年加入無綫新聞部，入職兩年後便攀登一姐之列，擔任《六點半新聞報道》主播。前途一帆風順，但她 06年決心轉行，轉往法國巴黎銀行任職公關，教人買賣窩輪。現時她轉職恒基擔任高級經理，推銷新樓盤。
方健儀 坐鎮老廉
方健儀 04年於美國伯明翰大學修讀國際關係碩士，曾於聯合國工作。見識廣博的她回港後便加入無綫。由於她報道風格幽默，試過頭頂住書介紹奧運馬術的禮儀小姐，故深得網友鍾情。有「淡定女主播」稱號的她前年告別主播生涯後，加入廉政公署任高級新聞主任，試過親自示範煮咖啡，獲大批記者捧場。
黃婉曼 跳做女神
畢業於中文大學新聞及傳播學系的黃婉曼 06年加入無綫， 09年她擔任晚間天氣報告報道員，因為一句「跳出香港」，惹來網友討論，無綫更安排她擔任世界盃主持，由主播變為藝人。之後她更過檔 now，頻頻以性感打扮騎劫金像獎，惹火身材被網友封做女神。
談性講食
有線旗下的免費電視「奇妙電視」將於今年中開台，為試水溫，有線收費台近年頻頻製作綜藝節目，早前就搵袁彌明、 Mia等，以真人騷方式拍攝整容節目《魔鏡我最靚》。今次飲食節目《為食情報局》，除了搵黃紫盈做嘉賓主持外，亦搵了一班藝人談性講食，據知孫佳君和娜姐前度 Avis會在節目內大談性經。
|
鍾意就快D Share啦！
|
|
|