[忽然1周 972] 開台無期 港視藝人垂死怒吼 港視,MW,

由上年 10月政府發牌「三揀二」否決港視申請開始，王維基諗盡辦法，不惜收購中移動嘅香港多媒體平台，希望發展流動電視，殺出血路。點知都係俾 CY政府搬龍門繼續封殺。佢話已搵律師團商討，不惜從司法途徑解決。

媽咪姐

開台無期　港視藝人垂死怒吼

對媽咪姐呢班 C9仔嚟講， 2014年 3月 11日，絕對係一個黑暗嘅日子！

其實，我哋只係想有多個電視台㩒嚇，唔想睇嚟睇去都係得嗰兩個台，唔想連黃金時段都迫住睇人炒餸，唔想嘥咗條頻道俾「重播台」重複噏「廢焦點」啫！乜好難嘅咩？依家事實話俾我哋知，喺今時今日嘅香港，係難過登天！

其他影片： >>開台無期　港視藝人垂死怒吼

周二（ 11日），香港電視主席王維基宣布開台無期：「幾時開到？仲開唔開到？我都唔知。」事關佢接獲政府律師信，話流動電視覆蓋率多於 5,000個住戶，需要先申請免費或收費電視牌照，否則違反《廣播條例》，令港視原本計劃今年 7月推出嘅流動電視頻道胎死腹中，而港視藝人同媽咪姐個心都跟住死咗！

成日自稱係 C9仔嘅劉玉翠講得好啱，「容忍有限度」㗎！唔好同我哋講乜嘢條例捉邊隻字蝨，呢兩年嚟，我哋仲聽唔夠啲語言偽術咩？把幾火！真係要用番司棋姐嘅名句：「呢度唔係法庭，唔需要證據，我對眼就係證據！」邊個針對王維基，相信任何一個香港人都有眼見！

黃日華：係一種高壓嘅打壓手法囉！口口聲聲話要帶動創業，講一套做一套，依家仲有人夠膽投資創業咩？香港幾多電訊公司呀，又唔見執笠？無競爭，唔會有好嘢！香港無㗎嘞！依家變咗人治社會！

張松枝：簡直係侮辱！政府係咪一個小朋友，係咪真係玩針對呢！依家都未同公司傾，擔心都擔心唔嚟，可能轉合作形式。總之我一定撐公司！

劉玉翠：本來傾咗續約，會減少少，但等咗幾個月，公司都未有 call我。好彩都有拍開國內劇。其實我好想簽港視，希望百花齊放，政府由始至終欠一個清楚交代！簡直係訓練我哋 C9仔啲 EQ。不過上次（不獲發免費牌）反應大啲，今次平復好多。但容忍係有限度，我哋只想要安定生活啫！

陳錦鴻：依家等公司通知，做演員都係一個等字。唉，好事多磨嘛！一直都 keep住睇劇本（原定下月拍港視新劇《別問我是誰》），但尋晚無睇嘞。依家惟有希望用法律可以解決到

元華：好無奈！我套劇拍到一半，唔知點？開唔到台，起碼幾百人失業！依家有自由行咪得囉！個政府同香港靠曬自由行，冇自由行死梗，我哋連睇電視都無權呀！

最近開 fb，一班靚太都喺度瘋傳一段節錄自網民嘅說話，講曬我哋香港人今日嘅悲哀！「想發聲、一陣出街俾人隊你兩刀；想買嘢，唔係炒家當道就係蝗蟲當道；我依家想睇電視，得一個事事旦旦同個係咁重播嘅台。你玩曬」唉，人間正道是滄桑。香港人，靠自己

香港民怨有幾勁？睇呢篇被瘋傳嘅網文就知！

港視藝人朱婉儀，忍唔住喺微博用粗口諧音鬧爆「鎮鷹」，可想而知心裏面團火有幾勁。

秦沛女兒薑麗文留言力撐老細王維基，讚佢係英雄，話自己「 can't stop crying」。

鍾意就快D Share啦！

下一篇 》