李雨陽
十一年前出道，拍無綫青春劇《四葉草》的李雨陽，今日他要由藝人轉行做雞販維生。
探熱針
港視絕路 DaDa前度轉行賣雞 半百艾威全裸賣身
政府攔路港視開台一波三折，一批由無綫過檔投王維基的藝人被迫到走投冇路；當 DaDa的前度、大隻仔李雨陽已轉行賣雞！由藝人變雞販，送貨派傳單一腳踢。至於開曬聲要賣錶賣車賣樓套現的艾威，已決定以半百之年拍全裸戲，賣埋身！
拖喼送貨
唔想人停口停，李雨陽早於今年初已鋪定後路，聯同三個圈外朋友，合資搞網上雞檔，出售一款叫「原味雞」的有機冰鮮雞。為減低成本，轉做雞販的李雨陽放下身段，親自做埋送貨，希望借自己僅有的明星效應招客。
「初頭開檔，李雨陽為咗賺得一蚊得一蚊，客人訂一隻雞佢都照送貨。因為要慳，所以唔租貨車，每次送貨都係自己攞住啲雞去搭港鐵。」知情者爆。
還未拍完港視劇《大眾情性》的李雨陽，上週六（三月十五日）趁無通告，即抽空返去位於觀塘區工廈的冰鮮雞工場幫手。過不久，便見他拉住個大喼行去附近港鐵站。
原來當日李雨陽約了客人在港鐵站交收，其間又主動教客人如何煮雞，有紋有路。
目標回本
送完貨返工場，轉個頭又攞住一大疊宣傳單張，出動到附近的瑞和街街市派。其間有接過傳單的師奶覺得眼前這個高大「雞佬」相當熟口熟面，一臉疑惑，但李雨陽不單沒有尷尬，反而食住上，落足嘴頭推介。
記者上前訪問，李雨陽說用了六位數字投資，包括做宣傳及買密封包裝用的機器。
至於一日究竟賣到幾多隻雞？他說：「而家一日賣六、七十隻，今年目標係一日賣四百隻，咁先回到本。每日香港市場可以消化二十萬隻雞，我哋希望將來可以做到佔市場百分之一，即係每日賣二千隻。」
轉營做雞販，李雨陽放下自尊還要犧牲健碩身形。「自從做咗賣雞，我成日要向朋友推介搞試食，食到自己都肥咗廿磅。」
艾威狂操等剝
李雨陽賣雞，身為港視烈士的艾威，在前冇去路之下，亦一股作氣。已經五十五歲的他，決定於下月開拍，與周柏豪合作的新片《陰陽大酒店》中全裸上陣，一脫求生。因為要剝，艾威近日更的起心肝搵老友錢小豪做教練狂操，銳意在一個月內減十磅踢走豬腩；每日操三粒鐘，包括跳繩、跑樓梯、踩車呔及打拳。
年過半百仲要賣肉，艾威說：「我要用最佳狀態去面對一生最壞時刻，唔想全裸見大肚腩，我決定狂操展現肌肉，同時亦想話俾人知，有啲嘢係唔受年齡限制。」
|
鍾意就快D Share啦！
|
|
|