媽咪姐
偷食斷正文章 hea住認錯
唉，有時真係不得不嘆句「男人靠得住，豬乸會上樹」！喺星爺嗰套《西遊•降魔篇》做唐僧嘅內地演員文章，外表同佢個名一樣斯文正派，但個人呢……咪趁演員老婆馬伊琍大肚去偷食，食完仲要 hea住認錯，再發難㖭！
話說上星期，佢同《裸婚時代》拍檔兼小三姚笛當街繑手攬錫嘅相流出，即刻全國鬧爆。有內地傳媒仲話周一（ 31日）再有勁料出，嚇到文章喺周一淩晨急急 post咗段懺悔文上微博，點知……有網友發現篇文竟然係抄內地音樂人高曉松嘅醉駕道歉信喎。 Woo，「神抄奇技」發展至此，真係強國先有！咁都不特止呀，周一晚（ 31日），文章仲喺微博搵兩位報道事實嘅傳媒人「尋仇」，叫人哋「要玩跟我玩，別涉及任何人，我陪你！我賤命一條……」媽咪姐呢，未見過天生賤命，但就啱啱見識到乜嘢係「賊喊捉賊」嘅賤人囉！
|
鍾意就快D Share啦！
|
|
|
