死撐開工
江美儀日前因拍劇操勞爆肺，匆匆休息一周後便復工，做死人冇命賠。
娛樂喧
拍劇踩足三日 江美儀爆肺送院
由阿佘和林峯孭飛的《使徒行者》，開拍僅兩個月可謂多災多難。先是答應「出山」演出的影帝梁家輝，卻因肋骨受傷而辭演，配角森美亦因病而要中途易角；至於頂替森美的沈震軒，早前拍劇時亦不慎炒車致右手骨裂。
本刊收到消息，劇中飾演高級檢控官的江美儀，日前連踩三日通頂開工後，在上月 20日晚爆肺被送入院，同日她要求出院在家中休養，不過休息了一星期，就被劇組催逼復工。真係攞你命三千。
《使》劇最初以影帝梁家輝「出山」為大台助陣作招徠，可惜開拍前他跌斷肋骨，無緣演出，亦為藝員接二連三受傷意外揭開序幕，令劇組大失預算。同時由於沈震軒要重拍森美所有鏡頭，變相之前有份入鏡的藝員，都要重新拍一次。為趕及進度，劇組惟有日夜趕戲，不少藝員每日只瞓三、四粒鐘，唔病有鬼。
唞唔到氣
邪開有條路，劇中演高級檢控官的江美儀，雖然冇乜動作場面，但本刊收到消息，上月 20日她拍攝一場廠景時，呼吸一度出現困難，令在場的工作人員大為吃驚。據在現場的劇務人員透露：「美儀之前嗰三日，每日都踩咗接近二十粒鐘，嗰日佢拍到晏晝四點，就話返屋企沖個涼，通告要佢六點再埋位拍一場法庭戲。佢走嗰陣，已經見到佢腳步浮浮。到佢返嚟，塊面已經又青又白，點知佢突然揞實心口話好痛唞唔到氣，嚇到我哋死。」
休息幾日催開工
據知，江美儀當晚被送入聖保祿醫院，由於病情不輕，醫生要她留院觀察。知情人透露：「醫生做檢查後，認為美儀好大機會係爆肺，要佢住多兩日院 check真啲，但美儀唔想件事揚開，所以決定返屋企休息。出院嗰陣，醫生叫佢最好唔好開工住，要等個肺功能完全康復。」
即使醫生千叮萬囑，但仍在休養的江美儀日前已返劇組開工。「劇組點肯放人吖，佢哋同美儀講，阿佘（佘詩曼）同阿峯（林峯）都詐曬型，問幾時先拍完。佢哋話 Sammy（沈震軒）斷手都照開工，再唔拍就四月尾都煞唔到科。」據知江美儀周一（ 31日）復工時，都要控制說話的聲音和速度，以免觸動患處。
江美儀爆肺後，連日深居簡出，上周四（ 27日），本刊拍到有份拍《使》劇的陳敏之，到江位於貝沙灣的寓所探病。陳逗留接近兩小時才離開，再到附近的數碼港麥當勞買包匆匆醫肚，便趕住開工。
江：仲係好痛
江美儀出名「爛撈襟做冇投訴」，去年台慶她奪得「最佳女配角」後劇接劇，對此她曾說：「唉！無綫點肯放我走，攞咗獎喎，呢啲嘢要還㗎！」甚有暗寸意味。周二（ 1日），本刊致電給她，對於做到爆肺，她有氣冇力地說：「唉！其實我 2月 25日已開始發燒、喉嚨發炎、中耳炎，之後就開始咳，咳到心口個位好痛，醫生懷疑我爆咗肺。其實依家都好辛苦，講嘢唔可以咁大聲，仲係好痛。遲啲有一場汽車爆炸場面要拍，希望監製將佢押後！打戲最好唔好預我喇！（係咪拍劇拍得太辛苦？）……我諗唔關事啩，不過舊年 5月到依家，我都拍咗三套劇，所以我同咗公司講，拍完呢套劇，要攞八十日假唞一唞。」
輪住出事
《使徒行者》流年不利，今年 2月初開拍以來，演員相繼出事，雖然主角暫時無恙，但亦間接影響拍攝進度。
爆肺可致命
爆肺正確學名為氣胸，一般病徵乃肺部「穿咗」，以致空氣流入胸腔壓著肺部致呼吸困難，甚至有機會猝死。據呼吸系統科專科醫生表示，爆肺的病人除了少部分是遺傳外，其他的則沒有跡象可言，更趨向年輕化。歌手謝安琪更曾 4度爆肺，而方大同亦於 2010年因爆肺入院。
|
鍾意就快D Share啦！
|
|
|
