打頭陣
抑鬱停工五年老婆獨撐 江華秘搬沙頭角
鄧萃雯近日被揭患淋巴病，要做手術切除，病況令人擔憂。原來早年與她有過一段孽緣的江華，境況比她更欷歔。
現年 52歲的江華， 03年憑《九五至尊》和《楚漢驕雄》兩劇，事業攀上高峯，及後，離開無綫向外發展，事業載浮載沉，近年更恍似在娛樂圈消失一樣，老婆麥潔文開騷，才會偶爾見他現身。
據知 06年開始，江華因腰腿傷患導致患上抑鬱。自 09年拍罷最後一套劇後，已全面停工，育有一子一女的他，生活重擔便由老婆麥潔文一手揹起。為節省支出，住慣獨立屋的江華一家，近月改以月租七千，搬到離邊境只有十分鐘車程的沙頭角村屋居住。周二（ 1日）黃昏，江華陪老婆離開寓所，對於搬到沙頭角，他在家門前不斷重複對記者說：「我窮吖嘛，冇錢住啲豪宅呀！」
一世扮劉華的江華， 96年由亞視過檔無綫拍第一部劇集《西遊記》飾演唐僧，自此事業一帆風順。雖然產量不多，但每套所拍的劇集均大收旺場，惟 04年起，江華忽然在娛圈銷聲匿跡。而他最後一次演出，要數到 09年，他和陳秀雯、廖啟智拍攝中港合資的《跟紅頂白大三元》。
愈搬愈遠
人生高潮時，江華夫婦曾擁有元朗加州花園獨立屋和北角雲景台單位，可是，近年兩個物業已先後賣出。據資料顯示，兩個物業均要蝕讓，兩公婆因而唔見接近一百萬。賣掉加州花園後，江華夫婦猶如無殼蝸牛般，先後在西貢不同地方租住村屋。直至近日本刊收到消息，指江華一家四口，已搬到距離市區近兩小時車程，離大陸邊境只有十分鐘車程的沙頭角居住。
本刊連日到上址採訪，發現江華一家所住的沙頭角凹下村，只有四、五幢村屋，村屋旁毗連著一大塊農田，更有不少流浪牛隻在馬路旁遊逛。附近沒有士多和食肆，最近的市集則有 20分鐘車程的粉嶺聯和墟。由於附近極少街燈照明，而且人跡稀少，入夜更覺荒涼。
對於有明星做新鄰居，有村民透露：「江華一家搬咗嚟幾個月佢哋住地下嗰層，江太（麥潔文）同我哋幾好傾㗎。平時見佢一早出去，話要教唱歌，到夜晚買完餸先返屋企。反而江生（江華）就成日匿喺屋入面，間中先出嚟洗嚇車。佢好 cool㗎，試過幾次同佢打招呼，佢眼尾都冇睄一眼。不過講真句，我哋班村民都覺得奇怪，話曬係明星，附近又唔係冇成幢租出去嘅村屋，有啲租兩萬蚊都唔使。佢哋一家四口，冇理由要逼住間 700呎村屋㗎！」
凸腩走樣
記者連日發現，賦閒在家的江華，幾乎每日都瞓到接近下午兩點才現身。以往出席公開場合，均會打扮四正的他，在寓所門前脫下帽子，頭髮蓬鬆兼髮線上移，加上輕微凸腩，即使動靜舉止仍覺他刻意扮劉華，但外形卻竟有一絲蔡楓華影子。現場所見，江華每天一起身，均習慣走到兩架車旁邊，時而用布抹下車身，時而打開車尾箱，摷一輪執拾一下。有村民行過，他都懶得抬高頭望一眼。鮮有外出的他，上周六（ 29日）難得車老婆到尖沙嘴「唱家班」教唱歌，他亦刻意戴上紳士帽遮掩稀疏頭頂，重拾型佬本色。
驚恐產生幻覺
江華忽然絕跡娛圈，是由於近年一直受腰腿傷患困擾，壓力更擴散至心理，患上抑鬱。他早前曾說：「醫生話我軟骨壓到神經線，足足有一年，我企唔到、坐唔落，簡直生不如死。我好驚，驚做唔到嘢屋企點算，轉行又唔知可以做乜？我覺得自己陷入一個冇出口嘅困境，個人就快崩潰，冇曬辦法，個人好抑鬱。」由於久病不癒，江華更一度產生幻覺。「我見到已經死去嘅人，我覺得係幻覺，好困擾，好驚自己會自殺，每一日都驚自己會死。」縱使江華現時的抑鬱症已受控制，但怕見人的情況仍然持續，縱使近年國內有不少製作單位找他拍劇，他都推得就推。對此他說：「演戲依家對我嚟講，好似雞肋咁，食之無味，棄之可惜，我唔會為咗生活，強迫自己接劇。」
老婆揹起重擔
江華長期休養，而他和麥潔文所生的一對仔女，雖已成年，但由於中學畢業便選擇出外打工，經驗淺，收入不算高，因此，一家經濟重擔便落在麥潔文身上。現時以教唱歌維生的麥潔文，據知每月收約 30多名學生，即使間中開音樂會賺外快，但要養起一家四口，確實不易。江華早前亦說過，多得老婆支持和體諒，而以往自己亦有積蓄，一家才可撐下去。「我有個好太太，佢唔會話你唔做嘢冇收入，佢好明白我，知我唔係不負責任嘅人，從冇俾壓力，我可以做自己要做嘅嘢。」
江華：冇錢住豪宅
周二（ 1日），江華再次出動，做柴可夫車老婆出席紀念哥哥張國榮的音樂會。江華在家門前接受訪問，不過他對於被發現搬家，似乎頗介懷，未聽完記者提問已自嘲自己窮。
江：江華記：記者
記：點解搬嚟沙頭角咁遠……
江：（噴了口氣）點解搬？窮吖嘛，冇錢住啲豪宅，咪搬嚟沙頭角囉！
記：出入會唔會好唔方便？
江：（忽然哈哈大笑）唔會啊！香港有幾大啫，香港好細之嘛！
記：你依家冇做嘢，腰患同抑鬱好番未？
江：（回復寸嘴）冇事啦，你（記者）今年幾大呀？其實你識唔識我㗎？我梗係有做嘢啦，周圍做嚇，啱嘅，鍾意咪做囉。
記：依家好似 Kitman（麥潔文）主力做嘢？
江：（忽然大力拍記者手臂）傻女嚟嘅，點講呢，即係佢做嘢，我陪佢；我做嘢嗰陣，佢咪陪嚇我囉。
記： TVB冇搵你？
江： TVB一向同我係部頭合約，唔係佢唔重用我，係我唔拍啫！係我唔同佢哋續約。
記：有冇人搵你返大陸拍劇？
江：呢排未遇到好劇本，有咪拍囉。
晚上二人出席音樂會，一直站在老公身邊的麥潔文，此時亦開口撐老公說：「其實我哋依家唔想再為名利啦，想搵番啲舒泰啲、自然啲生活。沙頭角幾好吖，人又少，空氣又清新，住得幾舒服。」
夫唱婦隨，縱使物質生活不及從前，但看來江華夫婦亦樂於歸隱田園、甘於平淡的生活！
收入掹掹緊
據知，麥潔文教學生唱歌，每堂收費約$800-$1,000（杜麗莎收約$2,000一堂，彭家麗收約$1,000），雖然收入不俗，但一家四口幾乎全靠她教唱歌收入維持。即使家住僻遠的沙頭角，慳番唔少屋租，但生活依然掹掹緊。
亞視一哥
在圈中曾風光過的江華， 86年參加亞視藝員訓練班入行，火速被捧成一線小生，無論播任何一套他主演的劇集，都一定高收視，故一直說當年的亞視是「江華年代」。
其間他參演過不少電影， 96年他過檔大台，造就事業高峰，但 04年忽然離開，從此銷聲匿跡，偶爾演出大陸劇及福音電影。
收視保證
96年他過檔大台，首部作品《西遊記》演活了唐三藏，劇集當時高收 44點收視；其後有份拍攝的《先生貴姓》、《楊貴妃》等都成績不俗， 03年更憑《九五至尊》「李大蝦」一角奪台慶「我最喜愛角色」獎（圖）。
鄧萃雯自爆孽緣
當年與江華拍《我和春天有個約會》爆出一段孽緣的鄧萃雯，無獨有偶近年亦受病患困擾。去年 6月鄧發現頸離奇脹，疑患淋巴病，接受治療後近日傳復發。上月 22日她到澳洲出席佈道會分享見證，台上她承認近年受病患困擾之餘，更毫不忌諱談及昔日有段鬧得轟烈的緋聞。
在佈道會上，鄧萃雯說：「我從小就挺孤單，在非常缺乏愛的家庭長大，所以非常渴望像《我和春天有個約會》裏的小蝶一樣，單純地渴望有一段美滿的愛情，當然了，那（段緋聞）沒有我想像中那麼簡單。」似乎當年錯愛江華，令她受傷至深。
|
鍾意就快D Share啦！
|
|
|
