探熱針
魚蛋檔打曬骰 譚小環阿媽把炮
唔打無綫工轉行賣魚蛋，譚小環反而更好境！開檔順利，背後全賴有做過小販的小環媽幫手，附近檔主更形容：「佢阿媽好把炮！」
有個巴閉阿媽！小環全不介意：「細個家庭環境唔好，單靠爸爸一份人工唔夠，媽咪要擺檔賣睡衣。」
在熱騰騰魚蛋檔開工，小環媽不嫌辛苦，遇到串嘴客，一樣搞得掂。
「有個客一埋到嚟就話『我好串㗎！呢度有乜好食？唔好食我會鬧』，我話你試咗先講後尾仲俾埋豆漿佢飲！」
個個讚好
聲稱靚唔可以當飯食的譚小環，由冠軍港姐轉行做魚蛋阿姐一事曝光後，陳志雲、車淑梅、有線、亞視以至內地電視台，爭相訪問，在無綫十八年，譚小環現一刻最紅，不過，近日卻傳出舊主下封殺令，禁她上綜藝節目。
「始終無綫俾過唔少機會我！好多監製、導演、 PA都對我好好！機會嘅嘢，唔係你想就有，我好明白！好似轉行賣魚蛋，自己都冇預計過反應係咁好，有咁多人支持我，我好珍惜，所以會更加努力做！」譚小環說。
開檔一個月，月入已超過在無綫的人工，但當初決定搞魚蛋檔，亦遇到不少棘手問題。
「由租咗個鋪嗰刻開始，問題一個接一個，除咗研究去邊度攞貨，汁料要做到好味，全部都唔容易，小環煮食都唔係叻，今次全靠佢阿媽幫手，日日不停試煮唔同醬汁，試完唔啱從頭整過，就算依家開咗檔，小環媽收工返屋企唔係休息，係再開工炒芝麻！」小環身邊人說。
執平嘢
放下身段，譚小環生活與一般人無異。上週二（四月二十二日），小環收工後，決定在渣甸坊附近的小販檔 shop一轉，執平嘢！
見到譚小環，附近有檔主大聲說：「佢阿媽好把炮！以前做小販嘛！賣嘢好叻！」
在華富邨公屋長大的譚小環，父親行船，一家七口，要靠小環媽做小販賺錢幫手養家。
「佢阿媽喺屋邨租咗個檔口賣睡衣，佢把口好掂！做生意好叻！到小環讀中學，兩個家姐考咗入國泰做空姐，佢阿媽先改行打住家工。」知情者說。
街坊形容小環媽把炮，身為女兒的譚小環更加肉緊：「阿媽可以話瓣瓣掂！佢鍾意又識同人溝通，好 enjoy自己做嘅嘢！佢就好似一面鏡咁，令我明白到，要將客人當自己朋友咁，唔好當係一份工作！」
唔怕客串
到魚蛋檔找小環媽，正準備收工的她，見到記者表現友善，講到做小販養大小環，她邊抹汗邊說：「佢哋四姊妹，小環係最細嘅，嗰時我擺檔賣睡衣，不過佢兩個家姐好錫佢，後尾都係兩個家姐出嚟做嘢供佢去英國讀書，講真，我哋邊有能力供佢去外國吖！」
譚小環的魚蛋檔生意滔滔，小環媽更功不可沒。
「佢（譚小環）啱啱出嚟做，後生可能會唔習慣，我都係落嚟幫嚇手。其實最緊要係同人溝通！試過有個客一埋到嚟就話自己好串，問呢度有乜嘢好食，如果唔好味佢會鬧！我就叫佢試咗先講，後尾仲俾埋豆漿佢飲，個客樣樣都話要食，我話食過量唔好，唔肯再賣俾佢，咪叫佢下次再嚟幫襯。」小環媽說。
先苦後甜
娛樂圈，風高浪急，一鋪得唔代表一世掂。唔少星媽，守住頭家，與仔女捱過事業艱難期，先苦後甜的例子，圈中不少。
楊千嬅
95年入行的千嬅，初出道時成績一般，收入有限，楊父當教師，母親做銀行，公一份婆一份，當年為讓女兒著得體面，傾盡積蓄。 02年，千嬅終可在紅館開個唱，父母撐足七場，每晚完騷，千嬅媽特地在紅磡火車站流連收風收反應，母親的愛，令千嬅公開喊住感激。
|
鍾意就快D Share啦！
|
|
|