馮仁昭四圍超：梁潔華抗血癌 精神好胃口 - 馮仁昭
梁潔華抗血癌胃口好 黃芷晴：精神過我
喺今年年初有傳黃日華嘅太太梁潔華患咗血癌入院，當時華哥同囡囡黃芷晴只係話啲血出現咗少少問題，直到近排芷晴終於親口證實媽咪患上血癌，已經完成咗最後一次療程，精神都唔錯。
■黃芷晴同大家展示一家三口嘅最新近照，證明媽媽梁潔華（中）精神不俗！
芷晴：keep住覆診
前晚芷晴出席喺金鐘舉行嘅《命運交響廳》分享會，芷晴攞咗3張媽咪喺母親節時影嘅相片畀大家睇，一張係佢爹哋同媽咪嘅合照，一張係一家三口嘅相，淨番嗰張就係佢媽咪嘅獨照，喺相度見到梁潔華精神飽滿，芷晴就話媽咪好驚啲朋友太擔心，佢自己都冇諗過大家嘅反應會咁大：「媽咪情況好好，復原進度亦係好好，好多朋友都有打電話嚟關心佢。」
係咪即係話完全康復？芷晴就話：「𠵱家要keep住睇報告同覆診，媽咪有時仲精神過我，父親節嗰日媽咪好好胃口，又食羊扒又食豬扒。」不過講到會唔會出嚟見嚇大家，芷晴就話暫時唔會，暫時仲休養緊。
同場嘅羅力威俾人問到女友雨僑喺網上講「反狗肉節」言論，無端端俾網民鬧爆佢假正義，羅力威話佢唔想評論，但係講到有冇戥女友心痛？佢暗撐話：「能夠喺網上面勇敢發表言論，係一件幸福嘅事，要珍惜一嚇𠵱家仲有自由空間發表你想講嘅嘢。」
撰文：馮仁昭
■黃芷晴話媽咪雖然情況穩定，但係仲要休養，所以未有計劃見大家。
【622公投 我撐普選】毅行直播
流動版網頁：http://622popvote.appledaily.com
|
鍾意就快D Share啦！
|
|
|