熱爆娛樂: [壹週刊 1269] 挑機樂大媽　 Coffee：解約就快啲！ Coffee,林芊妤,M1,

2014年7月3日星期四

[壹週刊 1269] 挑機樂大媽　 Coffee：解約就快啲！ Coffee,林芊妤,M1,

探熱針

挑機樂大媽　 Coffee：解約就快啲！

早前與上市公司 CEO林知譽，在 ifc上演「殘廁 gathering」的無綫藝員 Coffee林芊妤，連日來艷史愈揭愈多，向來對藝員私生活隻眼開、隻眼閉的無綫，今次竟然唔手軟，以維護公司形象為由，講到明要炒 Coffee魷魚。

據知，一向唔係靠 TVB份人工開飯的 Coffee，已打定輸數收大信封，甚至主動要求快啲搞掂，點知樂易玲擺明玩嘢，遲遲拒約見，又唔肯直接出信解約，逼 Coffee日日響屋企等運到。

急判死刑

自從發生「殘廁 gathering」事件之後，兩位主角 Coffee林芊妤，以及上市公司達利國際集團有限公司 CEO林知譽（ Will）均雙雙潛水，反而無綫高層樂大媽樂易玲日日搶住發聲，講到明唔會聽 Coffee解釋，即時判她死罪。

「其實都唔使再了解件事，因為個報導已經寫得好清楚，作為藝人，德行同操守都好重要，我哋相關部門會先了解佢份合約同工作狀況，再考慮點樣處理，不過今次係幾嚴重，要維護公司形象，有啲嘢唔可以輕手。」

原定樂大媽安排上星期二（六月廿四日）下午三時召見 Coffee，打算鬧完再請食豉椒魷魚，點知 Coffee臨時放飛機，話自己發燒，要求改期。

「俾人放飛機，仲要係個二打六，小姐（樂易玲）梗係嬲爆，點知 Coffee仲要話：『如果公司決定炒我，不如直接出信，唔使專登再返嚟。』聽到 Coffee咁講，小姐㷫上加㷫，向來只有佢話事，今次居然俾個二打六大佢，小姐講到明唔會就咁算，就算炒，都會玩嚇佢先。」一名工作人員說。

事發後，有指林知譽潛逃杭州，連他的家人亦避走飛鵝山住所。

自知演藝事業從此玩完的 Coffee，懶得返公司解釋，以發燒為理由避見樂易玲，令對方大為震怒。

唔肯約見

之後樂大媽透過秘書回覆，指自己工作忙，有多餘時間才會見她，叫 Coffee留在屋企等消息。講到自己公務纏身，但樂大媽卻有心有力借傳媒把口，踩多 Coffee一腳，暗示她放料，將五年前同羅天宇的親熱照發放俾傳媒，「啲相用私人相機影，係邊個流出大家心知」

據知， Coffee對炒魷有曬心理準備，並會欣然接受，因為她並非靠無綫一萬元月薪過活。

「其實無綫唔炒 Coffee，佢滿約都唔會留低，公司淨係識叫佢剝衫拋波，又冇發揮機會， Coffee依家兼職教瑜伽，收入係無綫份糧兩三倍；就算有時收到通知要拍劇，得幾集戲都要 hold佢兩三個月期，又要隨傳隨到，所以佢覺得俾人炒，都未必係一件壞事。」 Coffee身邊人說。

同羅天宇分手後， Coffee搭上公司另一有米奀星潘宗揚，當年兩人不時上載親熱照，男方現已轉行做獸醫，並在內地開設獸醫診所。

○九年同《愛•回家》的羅天宇拍拖時的親密照在殘廁 gathering後流出，當事人之一的 Coffee成為嫌疑最大的放料人。

預咗解約

Coffee連日來玩失蹤，但她以錄音短訊回覆本刊時，承認有叫公司盡快給她一個了斷。

「如果公司真係諗住解約，可唔可以就咁 send信俾我，或者就咁解決咗佢，我想盡快搞掂件事會好啲囉！（樂小姐有冇約你再見面？）我打咗電話俾公司，話我 ready啦，不過佢哋話樂小姐好忙，未必得閒見我，叫我喺屋企等囉！但係我呢排成日失眠，心情好差，我淨係想快啲解決件事，公司有乜決定我都會尊重。」 Coffee說。