網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年8月1日 星期五

[忽然1周 992] 十大鬼片嚇人招 MW,




靚抽王

十大鬼片嚇人招

鬼節就快嚟(農曆 7月 14日/西曆 8月 9日),已經有兩套鬼片上畫,分別係影帝張家輝自導自演嘅《盂蘭神功》同埋鬼佬界驅魔電影《今.猛.夜》。識睇鬼片,梗係揀鬼節睇啦,人就係咁,係都要嚇自己個半死先夠刺激。不過,鬼片嚟講,來來去去都係用嗰幾招嚟嚇你,家吓就介紹番十招鬼片常用嘅嚇人招式,等你知道,戲呢啲都係拍出嚟嘅啫!

1.有鏡就有鬼影

睇慣鬼片嘅你就一定知,有鏡嘅地方就一定有鬼影,通常主角會喺車嘅倒後鏡、房間嘅化妝鏡、廁所入面嘅鏡等等地方見到有鬼出現。當主角望向後面,就會乜都見唔到!最後當然係隻鬼再出現喺主角後面。(有時係鏡入面嘅自己突然出現異樣。)

2.電話一定喺唔適當嘅時候響起

通常喺最緊張嘅時候,電話就會響起,呢個時候有三個可能性:

可能性(一):隻鬼同你講電話。

可能性(二):有人打嚟同你分享消息,例如話你聽你前兩日見到嘅老友,原來上星期已經瓜咗,等你陷入恐慌之中。

可能性(三):午夜凶鈴,一聽即死。

3.發噩夢

日間唔知發生乜事撞鬼,夜晚返屋企瞓覺豬嘅時候,就會有鬼出現殺死主角,然後主角彈起, X你個街,原來係發噩夢。

4.錄像

戲入面嘅人,通常會睇番升降機或者屋企攝錄機錄下嘅錄像,然後大家一路睇一路驚。噢!隻鬼原來昨晚瞓覺時嚟過!

5.驚到爆都要去搵真相

當主角喺間房或某個地方聽到出面有聲或者異樣,就會好勇猛咁衝出去睇,然後就會有鬼出現,同時大家會諗:「如果係我,就會留番喺原地」……係囉,整乜一定要咁有好奇心啫。

6.原來係鬼

搞咗一大輪,發覺你自己或者你同行嘅情人、好友原來就係隻鬼……著名鬼片《鬼眼》最後結局發現原來主角已經一早瓜咗。噢撈,背脊一早中晒槍瓜咗好耐。

7.進擊的核突

由幾十年前,被譽為最佳恐怖片嘅《驅魔人》開始,就有核突到爆嘅驚嚇情節出現。可見鬼片都係離唔開呢嗰幾樣嘢:蟲蟲啦,血啦,爛面啦,噴漿啦,個頭 360度扭啦,甩頭甩腳啦。係,都係嗰啲。

8.好人鬼上身

鬼片裏面通常會有啲捉鬼大師,最後都會因為唔夠隻鬼玩,或者要犧牲自己先可以拯救大家,於是俾隻鬼上身再做低自己,《回魂夜》入面星爺就係咁樣瓜柴。

9.心有鬼

十套鬼片,九套都會刻畫埋人性嘅醜惡,通常講到最尾,都係話個主角其實自己都好有問題,即係心有鬼。

10.羅蘭姐出沒注意

好多鬼片都會安排一個羅蘭姐呢種充滿靈氣嘅長者出現,佢哋可能係捉鬼大師,可能係有靈感應嘅問米婆,亦可能係一個精神失常嘅老人家。點都好,佢哋嘅目的係製造氣氛,啲鬼都未出現,搵個似鬼嘅人嚟嚇吓你先!

荒謬現象學

每期荒謬現象學為你解構娛圈嘅不尋常現象!



鍾意就快D Share啦!