打頭陣
老婆封肚 老公想生 陳茵媺陳豪冷戰
陳茵媺（ Aimee）自去年十二月誕下囝囝陳梓燁（ Aiden）後，本來鬼妹仔性格嘅佢，突然緊張大師上身， BB未夠 4個月便搵定名牌 playgroup及幼稚園。而佢亦一直堅持餵人奶，把現時僅八個月大的 Aiden養到肥肥白白逾 22磅超晒磅，加上日夜抱實囝囝，結果搞到自己患上「媽媽手」筋膜炎，要長期戴護腕兼做物理治療。
手患折騰半年，復出亦遙遙無期，壓力爆煲的陳茵媺，更因與老公為追多個而爆冷戰。日前本刊發現佢孭住 Aiden仔及外傭到上環食晏「唞氣」時，全程表現愁眉苦面，有寃無路訴，陰功。
陳豪（ Moses）與陳茵媺自 12年拍拖後，極速同居深井碧堤半島，被拍得在寓所內互餵食物，甜到漏。陳豪更多次以「 My Queen」形容對方，愛得相當癡纏高調。
唔俾人抱 BB
去年 6月，雙陳在巴黎奉子成婚，同年 12月 4日誕下兒子梓燁（ Aiden），陳豪更豪擲 3,300萬購入大埔比華利山別墅獨立屋作安樂窩。一家三口本來好幸福，可是自從 BB出世後，以往鬼聲鬼氣的陳茵媺，卻變身成緊張大師，對愛兒的一切都份外着緊，更因湊仔用錯力，導致左手患上俗稱「媽媽手」的筋膜炎，需長期戴護腕及定期做物理治療。陳茵媺身邊好友透露：「其實阿 Mo屋企請咗兩個姐姐，一個負責所有家務，另一個就照顧 Aimee同 BB。但 Aimee好少交 Aiden俾姐姐湊，無論喺屋企又好，出街又好，佢都自己抱住 BB，就連食緊飯，一聽到 BB喊都會第一時間抱 BB去飯枱。每晚仲要等 BB瞓冧咗，先肯去沖涼。 Aimee開頭唔識抱，用錯力， BB兩個月時，佢已經成日話抱到隻手好痛，但一直冇理，點知有次痛到標眼水，睇醫生照 X光，先知咁嚴重，醫生都建議減少抱 B同注意用力。但就算 Aiden依家 8個月 22磅幾， Aimee仲係成日抱到佢實。」
餵足一年人奶
Aiden僅八個月，但比同齡 BB重至少四磅，最大「功勞」當然是媽咪。 Aimee一直立定決心餵人奶， BB未出世時，她曾透露希望能堅持餵哺母乳半年。但時日過去， Aimee眼見 BB精靈又大隻，遂決定繼續餵人奶至 BB最少一歲。據知 Aiden十分大食，一天吃足 6餐，令 Aimee相當困身，有時連廁所都唔得閒去。單是湊仔已經辛苦到死，早前 Aimee因為要餵人奶以致不能吃抗敏藥，所以要忍痛把養了 6年的三隻愛貓暫居友人家，卻被網友夾攻批評「冇愛心」，受盡千夫所指。事後她澄清會待餵完人奶後，便把愛貓接回家重聚。她謂：「我唔介意一世食抗敏藥，亦相信 BB可以同貓貓共存。」
陳茵媺亦花了不少心力為囝囝的學業舖路。早在 BB未夠 4個月，已替兒子報定十多間 playgroup，她日前更大嘆：「我以為自己好早報，但好多都 full咗，喺香港讀書就要接受香港人嘅步伐，冇辦法。」近日她心儀離家較近的馬鞍山英基及九龍塘耀中兩間名牌國際學校，更曾秘密現身聽學前講座。為愛兒，事事做足 100分。
被迫推 3劇
陳茵媺自為人母後，不下數次透露照顧一個小朋友責任重大，並非單純有 400萬就夠，更要面對搵學校及教導問題，不自覺令自己增添無形壓力。奈何陳豪一直希望能夠三年抱兩，最好一子一女湊夠「好」字。他近日更經常「出口術」，單方面向傳媒透露恨追女，「唔知追唔追到呢，等個天賜俾我。有個伴始終好啲，我唔想囝囝咁孤單！」為求追多個，陳豪更講到明不想老婆咁快出山拍劇，他曾說：「 BB（ Aiden）始終係需要媽咪嘅，等 BB大啲先講」
據知陳茵媺懷孕至今，已先後辭演了《寒山潛龍》及集合黄秋生、黎耀祥等勁人合作的《梟雄》兩劇。而下月便開拍的《張保仔》，監製梁材遠早於 Aimee大肚時便親自游說她出山，坦言該劇是《情越海岸線》的延續。陳茵媺雖然心動，仍過唔到老公一關。
陳茵媺密友說：「依家見親 Aimee，變得有啲忟薑，嗰時佢佗住 Aiden時，成日話快啲生多個就收工，可以一次過修身嘛！但係最近佢精神狀態有啲差，話原來一個已經要煩好多嘢，唔想再生住。 Aimee最想快啲拍番劇，無非想唞吓氣，但阿 Mo就𠱁老婆話遲啲先。佢哋淨係呢個話題已經拗過好幾次，近排仲冷戰㖭。 Aimee惟有同班好姊妹訴苦，仲話有幾次趁 Aiden瞓晏覺，試過偷偷喺房喊過兩次！」據該密友透露，以往陳豪夫婦會經常孖公仔出席聚會，但近日聚會卻往往只見其中一人，朋友間都私下談論，擔心兩人夫妻關係現暗湧。
孕婦 look愁爆濕平
上周日（ 3日）下午，本刊發現陳茵媺孭着 Aiden與外傭到上環濕平兼 high tea。難得出街叉電，但記者見她在餐廳內不時愁眉苦面，更拿着餐牌發呆，久久未有點餐。而甚少讓愛兒曝光的她，當日卻破例不遮掩 Aiden的面容。記者見 BB皮膚白皙，五官精緻細長，眼睛和嘴仔極似媽咪，如陳豪口中所說「好靚仔」。至於 BB無論身高和如節瓜般的手仔腳仔，亦似足一個滿一歲的 BB。而緊張媽媽亦無懼左手患嚴重筋膜炎， high tea期間一直孭着 BB，睇見都戥佢辛苦。
陳茵媺離開餐廳時，記者發現她仍舊身穿孕婦師奶裝，跟以往性感花旦形象大有出入，而外傭手上拿着數袋戰利品，亦是名牌孕婦裝 Mayarya。生完 B也繼續置大肚裝，似乎未修身的她覺得孕婦裝鬆泡泡最自在，亦方便她湊 BB。
其間，記者上前做訪問，本來一直冇乜表情的陳茵媺，忽然顯露笑容，當記者追問「棄貓」事件時，她明顯不願多談，只說：「要講嘅之前都講過，我諗冇嘢好講。」提及「媽媽手」傷勢時，她卻大方透露：「 OK BB好重嘛！ OK嘅！」問到陳豪有冇幫手湊 B，她說：「佢？佢忙拍劇吖嘛！冇囉！」對於復出拍劇，陳則煞有介事：「我其實一直都有做嘢。（咁係咪暫時唔拍劇住？）……」乘電梯期間，她邊做訪問也邊按着 Aiden頭仔，以免着涼及被途人撞親。
其實生仔係開心事，最緊要兩公婆達成共識，唔啱講到啱，咪影響大家感情就好！
媽媽手手尾長
根據婦產科醫生靳嘉仁醫生所指，「媽媽手」（ dequervain）為一狹窄性肌腱滑膜炎，最常見於年輕的媽媽身上。它的主因是因為長時間抱小孩以及擠母乳所致。
最主要的症狀是大拇指關節及大拇指側的手腕出現腫脹及疼痛，尤其當用力握住物品或扭轉腕部時更使疼痛加劇。醫生建議患者用腕部護具以減少腕部活動。而嚴重者則要接受物理治療，分分鐘患者要醫一年半載。
為生Ｂ爭拗
不少圈中夫婦都因為生 B而起爭拗，各執己見，一個想生，另一個就懶懶閒，冇共識自然容易起爭執。
楊千嬅 丁子高
丁子高一向對養精蓄銳，對操 fit生仔一事直認不諱，「其實 Torres一歲時，我同老婆都想追多個女。男人有個仔，梗係想多個女，湊夠一個『好』字。」千嬅則把工作排到密密麻麻，一再拖延。老婆對生 B採拖字訣，有指丁子高為此事有微言。
陳奕迅 徐濠縈
陳奕迅一向直認自己想追多一個陪囡囡康堤，覺得康堤已經大個女，是時候有個弟弟或妹妹。但一直忙於 fashion又要跑馬拉松的阿徐一聽到追 B就即刻落閘，更說：「我唔肯同 Eason生呢！唔使佢佗同生，佢實想。如果佗十個月變一個月，我就即生！」 Eason經常為此發嘮嘈。
|
鍾意就快D Share啦！
|
|
|