冇偈傾
拍攝當日，張慧儀與羅霖零交流，不用埋位時，兩人更面左左。
娛樂喧
重演 18年宿怨 霸氣羅霖寸爆張慧儀
96年，張慧儀與羅霖在處境劇《真情》大鬥法，幕前爭男人「阿海」，幕後就爭戲份。
當年，羅霖以高價由亞視過檔大台拍劇，氣燄逼人，難免令剛上位的張慧儀眼紅，有傳兩人在化妝間相遇互當透明。
今日兩女為醫學美容拍廣告再交鋒。
現場所見，今年冧莊代言的羅霖，狂擺「正印」姿態，寸爆新加入的張慧儀乃「小三」，講到明要「霸氣」登場。
老闆娘探班時，羅霖更貼身服侍，謝絕張慧儀埋身，連拍攝服裝都要揀先，藉此分莊閒，誓要對方坐歪。
羅霖今年冧莊為詩琳醫學美容代言，酬勞高見 80萬。廣告為了搞噱頭，找來羅霖 18年前的宿敵張慧儀，再加個好好先生張國強，重演昔日「兩女爭一男」的局面。
據知羅霖知道張慧儀加入，曾暗中打聽對方的酬勞，當知道自己比對方高才釋懷。「 Candy（羅霖）一向好得老闆娘歡心，佢擔心新人加入會影響自己地位。咁老闆娘 Fanny都好識做，同佢講：『慧儀邊夠你高。』始終都係 Candy代言先，女人都難免會比較。」
羅霖霸氣試衫
其實拍攝前三天，廣告商準備了共八套衫，本來一早已分給羅霖及張慧儀，每人各四套。但 fitting前，羅霖吩咐助手向廣告商要求先試衫，當日她更對工作人員說︰「呢幾套都好靚好啱我。」連本來預備給張慧儀的衫都試埋。為了宣示主權，羅霖還將當日的試衫相放上微博，所以到正式拍攝時，張慧儀穿的三條裙，變相執羅霖二攤。
8月 10日，羅霖、張慧儀前後腳到達影樓。兩女在化妝室一齊化妝時，全程零交流。面對 36D張慧儀，羅霖亦力谷 34C美魔胸迎戰。羅霖首先發功，對髮型師說︰「要 wave啲，咁先有霸氣。」拍硬照期間，羅霖一姐氣燄盡顯，一時同攝影師講︰「我覺得着長裙靚啲。」一時又要求對方︰「唉吔！好肥啊！要執瘦啲。」
影合照當冇到
反觀慧儀則與工作人員打成一片，慧儀一叫︰「開 music。」隨即聞歌扭動蛇腰，逗得在場的男士 high爆，忍不住讚︰「索！」之後慧儀更主動叫工作人員合照，但偏偏沒叫羅霖，羅霖惟有在旁冇癮站着。
這一個回合張慧儀領先。不過，講到識冧老闆娘，羅霖卻是技勝一籌。老闆娘帶着燕窩、湯水及小食來探班，未埋位的羅霖即時發功，衝埋對方旁邊大讚︰「有老闆娘嘅燕窩，食咗一定靚。」更親手幫老闆娘派發小食。其間，她倒出燕窩時又大讚︰「你哋睇吓！啲燕窩幾大條！」逗得老闆娘大樂。為免冷落張慧儀，老闆娘亦識做嗌︰「慧儀食嘢美人。」
寸小三勾男人
其後，男主角張國強到達影樓。等埋位時， KK與羅霖寒暄，透露兩人曾在電視劇《有求必應》中飾演夫妻。羅霖大讚 KK好記性，更謂︰「我記得做你正室㗎嘛！」 KK亦話︰「我同慧儀都拍過，不過唔係做夫妻。」羅霖即時寸爆︰「吓！即係做小三呀！佢勾引你呀？」
KK見狀即時為慧儀解圍︰「唔係！佢戲中飾演我細佬個老婆，我哋兩情相悅嘅。」
羅霖：我冇黐膠紙
受訪時，羅霖強調自己谷胸上陣，暗示酬勞再加都是物有所值：「今次啲裙好窄，又好 deep V，我好大膽，冇黐膠紙，所以成日都要挺胸做人。（你冧莊拍廣告，酬勞有冇加碼？）有嘅！（點解今次多咗慧儀？）廣告商想話雙雙同彩瑤十幾年前鬥到依家，睇吓依家邊個 keep得好啲，其實我哋兩個都咁靚！」
至於張慧儀就表示全靠自己帶動拍攝氣氛，暗寸有人喺現場扮阿姐玩獨家村。「今日我可以帶動成個場面，等大家有嗰種熱情，成個團隊都咁開心，效果出嚟至會好。（當年傳你哋不和？）畢竟係以前嘅事，依家大家都靚咗咪得囉。（今次酬勞吸引嗎？）係一個好合理嘅價錢。（影大合照時見到你隻腳撞到小 KK？）角度問題啫！我要撞下先，睇下佢係小 KK定大 KK先！」張慧儀說。
真係估唔到，雙雙同彩瑤冇見十八年，依然係咁有火藥味！
十八年恩仇
羅霖與張慧儀的明爭暗鬥，源於上世紀的處境劇《真情》。當時大台由亞視重金撬走羅霖，並安排她在劇中飾演「雙雙」，與張慧儀在劇中飾演的「彩瑤」，爭「阿海」黃智賢，兩女更懷有阿海的骨肉。
當時有傳兩人劇中爭戲份，因而不和。後來「彩瑤」因胃癌去世，「雙雙」亦淡出這段三角關係。及後張慧儀再在《真情》飾演「阿貴」，算是最後贏家。
|
鍾意就快D Share啦！
|
|
|